ख्वप पौ, वर्ष १ अंक ३
थौं मोहनी नखः नं मखु
अथेसां, मोहनी स्वयानं कम मखु
थौं जिगु म्हिचाय् द्वलंद्व धिबा नं दु
नेपामित लयलय् ताया भ्वय नयाः च्वंगु दु
थौं भोत क्वफ्वायगु दिं
जि लय् लय् ताया भ्वय नयाः
म्हिचाय् जायक धिबा तयाः
भोत कुर्कागु दु।।
नेतात जिगु छें वल
छ्यों क्वछुका निपाल्हा पेपुंका
ज्वज्वलपा धाधां भोत पःवँवल
जिं छ्यों फस्वका
अलेजिगु म्हिचाय् नेता जिं
द्वलंद्व धिवा तयाः बिल
भ्वे नयत इनाप नं यात
उकिं
जिं भ्वय् नया भोत तया
आ थौं भोत वियागु दच्छी मदुनि
लं तः ब्याके माल धकाः
जिगु छें थुनाहल
जिं ख्वयाः हालाः विन्ति यानाः
जिगु छें थुइमते धकाः
कन्हे वा धाधां नेता फस्वया वन।
कन्हे नं धाः बलय् धाः थाय् जिवना
नेताया छें नं बिन्ति यावना
नेतानं तम्वया छ सु धया हल
आ छ गुब्लें वयमते धकाः
खापा ध्याम्म तिना हल
उब्ले हें जि भ्वय नया भोत वियागु
झसझस लुमंना वल ।
लच्छी हे मरुनि जि बुइँ च्वँ वनागु
आ हाकनं देशय् समृद्धिया नारां
जिगु बुइँ रङ्गशाला दयकेगु सुचं वल
छें नं मरुम्ह बुँ नं मरुम्ह
जि थःगु देशय् हे कतः जुइगु जुल ।
द्वलंद्व धिबा कया भ्वय् नया भोत कुर्कागु
थौं जि पश्चातापया गालय लात ।