नेपाल मजदुर किसान पार्टीयाता दुनुगलंनिसें भिन्तुना ¤

नेपाल मजदुर किसान पार्टी पिङादा क्यंगु भिं दिंया लसताय् थी थी ज्याझ्व यासे दे ङांक थी थी जिल्लाय् तस्कंं उत्साह कायो पिङागूगु पार्टी स्थापना दिवश मानेयाङ च्वंगु दः । नेमकिपा माक्र्सवाद, लेनिनवाद व माओत्सेतुङ विचारधाराता मू (निर्देशक) सिद्धान्त काथं कायो जनताया प्रजातन्त्रया लाँपु ज्वङ समाजवाद हय् धुंक साम्यवादी समाज निस्वानेगु आजु खं २०३१ साल माघ १० गते निस्वांगु खः ।

नेमकिपा स्थापना जुसांनिसें नेपालयागु कम्युनिष्ट आन्दोलने खानेदगु बामपन्थी व दक्षिणपन्थी अवसरवादया विरोध मदिसें व विचलित मजुसें संघर्ष न्ह्याकंतुं च्वंगु दः । कानुनी व गैरकानुनी संघर्षयाय्गु लाँपुखे समाजय् ह्युपा हय्ता नेमकिपां सामन्तवाद व पूँजीवादी व्यवस्थायागु फुकं निर्वाचनयाता छ्यो छ्यों जनताया दथ्वी वानेगुस नपां पूँजिवादी सरकारे वाङ समाजवाद वैमखु धाय्गु विश्वास याइगु माक्र्सवादी लेनिनवादी पार्टी खः । पञ्चायत व अकिं लिपायागु निर्वाचनता छ्यल शासक दल तय्गु जनविरोधी ज्यायाता विरोध याय्गु व जनताया दथुई उल केनेगु ज्या नपां जनता तय्ता सचेत यायां समाजवादया निंतिं हचिल, धात्थें खःपुं कम्युनिष्टया विचः व्यवहार गथे जुयमः धाय्गु खाँ काँ कां खोटा विचःया खण्डनयायां नेपःया कम्युनिष्ट आन्दोलने थःगु बिस्कं पहः दय्क इमान्दार, सिद्धान्तनिष्ट पार्टीकाथं हचिल वयो च्वंगु पार्टी खः ।

नेमकिपा संसदीय निर्वाचने भाग कायो सरकारे च्वंपु शासक दल व शासक तयसं यागु देशघाटी संधि, सम्झौता, जनता तय्ता मछिंक दय्कगु जनविरोधी विधेयकत व राष्ट्रघाती नागरिकता विधेयक थजगु राष्ट्रियताया मुद्दाया विषयले जनताया पक्ष संसदे नुवाङ वयो च्वंगु प्रखर प्रतिपक्ष काथं हज्याङ च्वंगु पार्टी खः । जनतानपां तप्यंक स्वापु दैगु मोहियानी हक सुरक्षाया आन्दोलन, बाली काट्ने (वालय्गु) आन्दोलन, भ्रष्टाचार विरोधी आन्दोलन व बजारभः थिके जूगुया विरुद्धय् आन्दोलन यायां ज्यासाङ नैपुं ज्यापु ज्यामिया पक्ष नुवाङ समाजवादया निंतिं जनतातय्ता सचेत याङ नक्कली कम्युनिष्ट तय्गु चरित्र उल जनताया हःने ततं समाजवादी प्रचार अभियान हज्याक च्वंगु पार्टी खः ।

थुगु पार्टीं २०३६, २०४२, २०४६, या प्रतिगमनया विरुद्धय जूगु आन्दोलन नपां देशे जुगु थी थी आन्दोलने, न्हयलुवाकाथं हचिल महत्वपूर्ण भूमिका म्हेत, अन्तर्राष्ट्रिय कर्तब्यनं निर्वाह याङ वयो च्वंगु द । अथेहे भियतनामे अमेरिकी साम्राज्यवादं यागु आक्रमण, क्यूबा व प्रजग कोरियाय् यागु नाकाबन्दी, इराक व लिबियाय् यागु साम्राज्यवादी हमला व भारतीय विस्तारवादया विरुद्धय मदिसें संघर्ष न्ह्याक वयो च्वंगु पार्टी ख । नपां नेमकिपां स्वतन्त्र व स्वाधीन देया नागरिक तय्गु न्यायोचित संघर्षता ऐकेबद्धता क्यक्यं वयो च्वंगु दः ।

थुगु पीङादाया पार्टी स्थापना दिवस देङांक ज्याझ्व यायां झन परिपक्व जुयो समाजवादया झण्डा ब्वय्केता सक्रिय जुयो हज्याङ च्वंगु दः । पार्टीयाता क्वातुगु विश्वास याइपुं इमान्दर, दे व जनताप्रति समर्पित ज्या साङ झपुं सकल नेमकिपाया नेता व कार्यकर्तां न्ह्याक च्वंगु समाजवादी आन्दोलनया सफलताया निंतिं ख्वप–पौ परिवार दुनुगलं निसें भिन्तुना देछायो च्वङा ।