स्थानीय स्वायत्तता याता हस्तक्षेप (क्वत्यलेगु) यायमज्यू

संघ, प्रदेश व स्थानीय तहया कर्मचारीत उखेंथुखें छ्वयो समायोजन याय्गु जक सरकारं अध्यादेश जारीयात । दुई तिहाई अथे धायगु स्वब्व खय् नेब्व बहुमत दःम्हा नेकपाया सरकारं संसद अधिवेशन सुरु जुय छुं दिन न्हयो अध्यादेश जारी यागु खङ राजनीतिज्ञ व संविधानविदत छक्क जुयो च्वंगु दः । संसदता मिखापीक छाय् अध्यादेश जारी याय्माला ? सकसिनं थ्व न्ह्यसः तयो च्वंगु दः ।

अध्यादेश जारी याय् धुनेवं समायोजनय् लापुं कर्मचारीत व स्थानीय तहया कर्मचारीत फुक्कसिनं आन्दोलन यात । निजामती कर्मचारीत प्रदेश वा स्थानीय तहखय् वांसां लिपा सचिबतक वाने दय्मागु ब्यवस्थाया माग याङ च्वंगु दःसा स्थानीय तहया कर्मचारीत थः पिन्ता मेपुं कर्मचारीत स्वयो पाकः ब्यवहार याङ च्वंगु विभेदया विरुद्धय ल्वाङ च्वंगु खः । अध्यादेशं निजामती कर्मचारीत ५ दा स्वयो अप्वः ज्यासांपिन्ता छगू तह वृद्धि याय्गु व ङादा स्वयो म्हव जूपिन्ता ग्रेडवृद्धि याय्गु सुविधा बिल तर स्थानीय निकायया कर्मचारी तय्ता थ्व सुविधा मरु । संघ, प्रदेश वा स्थानीय न्हयागु हे थासय् ज्या सानिपुं कर्मचारीत थजु अपुं राष्ट्रसेवक हे खः । बैधानिक रुपं वहेंतु तहया राष्ट्रसेवकतय्ता छुं छुं हे पाकय् मज्यू । विभेदयाय्मज्यू राज्यं उथिंखाङ ज्या सानेमः । व्यवहार याय् मः ।

अःतक स्थानीय तहं थःता मःगु जनशक्ति थमनं हे तयो वयोच्वंगु खः । कर्मचारीत करारं तय्गु अस्थायी तय्गु नपां स्थाथी याय्गु ज्या स्थानीय तहं यङ वयो च्वंगु खः । तर संघीयता कार्यान्वयन (छय्लेगु) झ्वलय् स्थानीय तहता मःपुं जनशक्ति नपां केन्द्रंहे छोयोह्यगु याय् तांगु दः । थ्व स्थानीय स्वायत्तता क्वतेलेगु ज्या (हस्तक्षेप) खः । थ्वज्या स्थानीय स्वायत्त शासन ऐन २०५५ स्वयो नं प्रतिगामी खः । क्वहयोंगु खः । संघीयताया भावना व संघ, प्रदेश व स्थानीय सरकार फुक्क थःथःगु थास्य स्वतन्त्र खः । सुंसुयागुं अधिनय् च्वने म्वः । नेःपया संविधानया मतिया अखः छुं नं खाँ ज्या जुय फैमखु । संविधानया भावना विपरित ज्यासानेगु अधिकार सुयातां मरु । फुक्कज्या केन्द्रंहे याय्गु खःसा संघ छाय् माला ? उकिं संघीयता खाँखय् मखु ज्याखय् छ्यलेमः । गुकिं संघीयता हज्याङ वाने फै ।