नेमकिपाको राष्ट्रिय–अन्तर्राष्ट्रिय विषयमा पत्रकार भेटघाट
भक्तपुर, २०७६ जेठ २० गते, सोमबार
नेपाल मजदुर किसान पार्टीका अध्यक्ष नारायणमान बिजुक्छेँ (रोहित)ले विश्व व्यापार संगठनको सदस्य देश संयुक्त राज्य अमेरिकाले संरक्षणवादको नीति अवलम्बन गर्नु गलत भएको बताउनुभयो ।
नेपाल मजदुर किसान पार्टी विदेश सम्बन्ध विभागको सोमबार आयोजित राष्ट्रिय–अन्तर्राष्ट्रिय परिस्थितिको विषयमा भएको पत्रकार भेटघाट कार्यक्रममा बोल्नुहुँदै अध्यक्ष बिजुक्छेँले चीनलाई एसियाका देशहरूसँग द्वन्द्वमा फसाएर संरा अमेरिका ल्याटिन अमेरिका र अफ्रिकामा आफ्नो स्वार्थ पूरा गर्न लागिपरेको हुनसक्ने आशंका व्यक्त गर्नुभयो ।
संयुक्त राज्य अमेरिका ताइवानको काँधमा बन्धुक राखेर चीनमा आक्रमण गर्ने योजनामा रहेको बताउनुहुँदै अध्यक्ष बिजुक्छेँले अमेरिकाले कमजोर देशहरूलाई हात–हतियार देखाएर डकैती गरिरहेको बताउनुभयो ।
निकोलस माडुरोले अमेरिकी साम्राज्यवादको विरुद्ध लडिरहेको बताउनुहुँदै भेनेजुयलालाई अन्तर्राष्ट्रिय सहयोग मिलेको कारण अमेरिका अल्मलिएको बताउनुभयो । उहाँले संरा अमेरिकाले नाटोलगायतका देशलाई कम्युनिष्टहरूबाट जोगाउन सैन्य सहयोग गर्दा अमेरिका कमजोर भएकोले ती देशले रक्षा बजेटको २ प्रतिशत दिनुपर्ने धम्की दिएको बताउनुभयो ।
नेमकिपाका सचिव एवम् संघीय सांसद प्रेम सुवालले अमेरिकी साम्राज्यवादले चीनविरुद्ध सुरु गरेको व्यापार युद्धले मानव जातिको हित नगर्ने बताउनुहुँदै अमेरिकी साम्राज्यवादले भेनेजुयालाको आन्तरिक मामिलामा गरेको हस्तक्षेप, प्रजग कोरिया र क्युवाविरुद्ध गरेको नाकाबन्दीको विरोधमा नेमकिपाले संसदमा आवाज उठाइरहेको बताउनुभयो ।
सरकार गठन गर्न भारतीय विदेशमन्त्रीलाई नेपाल निम्ता गर्नु गलत गर्नुभएको बताउनुहुँदै सांसद सुवालले हिन्द–प्रशान्त गठबन्धनमा संलग्न हुने सरकारी नीतिको भत्र्सना गर्नुभयो । उहाँले जन्मको आधारमा नेपाली नागरिकता पाएकालाई वंशजको आधारमा नागरिकता दिने प्रावधान देशको हितमा नभएको बताउनुभयो ।
कार्यक्रममा नेमकिपा प्रदेश नं. ३ का सांसद सुरेन्द्रराज गोसाईंले गणतन्त्र स्थापनाको १२ औं वर्षमा प्रवेश गरिसक्दासमेत प्रदेश सरकार गणतान्त्रिक पद्धतिमा चल्न नसकेको बताउनुहुँदै सरकारले गणतन्त्रको अनुभूति दिने ढंगमा व्यवहार नगरेकोप्रति आपत्ति जनाउनुभयो ।
नेमकिपा प्रदेश नं. ३ का सांसद सृजना सैंजुले प्रदेश सरकारले सुखी नेपाली समृद्ध नेपालको नारा दिए पनि त्यो व्यवहारमा उतार्ने खालको बजेट र योजनाहरू ल्याउन असफल भएको बताउनुहुँदै प्रदेशसभा डन, मेडिकल माफिया, ठेकेदारहरू, घर–जग्गा दलाल, गिट्टी बालुवाका ठेकेदारहरूको छायामा परेको जनगुनासो रहेको प्रस्ट पार्नुभयो ।
कार्यक्रममा नेपाल क्रान्तिकारी विद्यार्थी संघका अध्यक्ष सबिन ख्याजुले पनि बोल्नुभएको थियो ।