भनपा प्रमुख सुनिल प्रजापतिसँग नेपाल भ्रमण वर्ष २०२० का राष्ट्रिय कार्यक्रम संयोजक सुरज वैद्यको भेटघाट

भक्तपुर नगरपालिकाका प्रमुख सुनिल प्रजापतिसँग नेपाल भ्रमण वर्ष २०२० का राष्ट्रिय कार्यक्रम संयोजक एवं कार्यक्रम कार्यान्वय उपसमितिका उपाध्यक्ष सुरज वैद्यको नेतृत्वमा आएको एक प्रतिनिधि मण्डलले विहीबार भेट गर्‍यो ।

भेटघाटमा नेपाल भ्रमण वर्ष २०२० लाई सफल पार्न भक्तपुरको मौलिक संस्कृतिलाई नेपालको राष्ट्रिय पर्यटनको आकर्षणको रुपमा अन्तर्राष्ट्रिय पर्यटन बजारमा ब्राण्डिङ्ग गरी प्रचार प्रसार गर्ने र सो को लागि आवश्यक तयारीको विषयमा छलफल भयो । साथै यसलाई सफल पार्न सम्बन्धित विभिन्न संघसंस्थाहरु र सरोकारवालाहरुको सहकार्य, समन्वय र सहयोग हुनुपर्ने विषयमा पनि दुई पक्षबीच छलफल भयो ।
छलफलमा भक्तपुर नगरपालिकाका प्रमुख प्रजापतिले भक्तपुरलाई पर्यटकीय गन्तव्य स्थलको रुपमा विकास गर्न २०७२ सालको भूकम्पले क्षति पुर्‍याएका सम्पदाहरुको आफ्नै स्रोतबाट तीब्र गतिमा पुननिर्माण गरिरहेको र यहाँका मौलिक सँस्कृतिको संरक्षण, सम्बद्र्धन र प्रबर्द्धनको लागि विभिन्न कार्यक्रम र योजनाहरु कार्यान्वयन गरिरहेको जानकारी गराउनुभयो । उहाँले भेटमा पर्यटनका पूर्वाधारहरु पर्यटक बसपार्क, पर्यटक शौचालय, पर्यटक सूचना केन्द्र र सेवा केन्द्रहरुको निर्माण गरी पर्यटकहरुलाई सेवा प्रदान गरिरहेको जानकारी गराउनुहुँदै सम्पदा क्षेत्रको विशेष सरसफाई, हकर्स नियन्त्रण, सवारी निषेध लगायतका कार्य गरी भक्तपुरमा पर्यटकीय वातावरण तयार गरिरहेको बताउनुभयो ।
भेटमा संयोजक वैद्यले नेपाल भ्रमण वर्ष २०२० को नारा Lifetime Experience अन्तर्गत २० पर्यटकीय स्थलहरुको व्यवस्था गर्ने बताउनु हुँदै साँस्कृतिक पर्यटनको लागि भक्तपुर छनौट भएको जानकारी गराउनुभयो । उहाँले पर्यटक बसाई लम्ब्याउन Bhaktapur By Night कार्यक्रम छनौट गरी सो अन्तर्गत नमस्ते सेन्टर खोल्ने र सम्पदाहरुमा बत्तिको व्यवस्था गर्ने योजना रहेको बताउनुभयो ।