तीनै तहका सरकारबीचको समन्वयले मात्र कोरोनाको प्रतिरोध सम्भव
सुनिल प्रजापति १५ भाद्र २०७७, सोमबार
(भक्तपुर नगरपालिकाका प्रमुख सुनिल प्रजापतिसँग नोबेल कोरोना महामारी रोकथाममा भक्तपुर नगरपालिकाले पछिल्लो अवस्थामा गरेका गतिविधिहरूबारे ‘मजदुर’ दैनिक÷‘श्रमिक’ साप्ताहिकले लिएको अन्तर्वार्ता प्रस्तुत छ–स. )
काठमाडौँ उपत्यकालगायत भक्तपुर जिल्लामा पछिल्ला दिनहरूमा कोभिड–१९ सङ्क्रमितहरूको सङ्ख्या बढ्दो छ । हाल भक्तपुर नपामा कोभिड–१९ को सङ्क्रमणको अवस्था के कस्तो रहेको छ ?
यतिबेला कोभिड–१९ को सङ्क्रमण देशभर भुसको आगोझैँ फैलिरहेको छ । दिनको हजारभन्दा बढीमा सङ्क्रमणको पुस्टि हुँदै छ भने घना बस्ती भएको काठमाडौँ उपत्यका सङ्क्रमणको केन्द्र बनिरहेको छ । शनिबारसम्ममा उपत्यकामा मात्र ४ हजार ९७५ जनामा सङ्क्रमण पुष्टि भइसकेको छ । नगरपालिकाका जनप्रतिनिधिहरू आ—आफ्नो क्षेत्रभित्र बसोबास गर्ने जनतामा सङ्क्रमण नफैलियोस् भनी सतर्कतापूर्वक काम गरिरहेका छन् । विपद्को बखत जतिसुकै काम गरे पनि त्यो पर्याप्त हुँदैन । त्यसैले जनताको सेवामा अहोरात्र खटिरहेका जनप्रतिनिधिहरू नै आलोचनाको पात्र पनि बनिरहेका छन् ।
भक्तपुर नगरपालिकाले नगरभित्रका कोभिड सङ्क्रमितहरूको लागि क्वारेन्टिनको व्यवस्थापन के कसरी गर्दै आएको छ ?
नेपाल सरकारले विदेशमा बसेका नागरिकहरूलाई नेपाल फर्काउने निर्णय गरेपछि भक्तपुर फर्कन चाहने नागरिकहरूलाई अनलाइन फाराम भर्न सूचना जारी ग¥यो । सयौँको सङ्ख्यामा नेपाल फर्कन चाहने नागरिकहरूले फाराम भरे । त्यसको आधारमा नगरपालिकाले होटल क्वारेन्टिन, घर क्वारेन्टिन र नगरपालिकाको छुट्टै क्वारेन्टिनको व्यवस्था ग¥यो । अहिलेसम्म होटलमा ३३ जना, नपाको क्वारेन्टिनमा ४० जना र घर क्वारेन्टिनमा ३३ जना गरी १०६ जना क्वारेन्टिनमा बसिसकेका छन् भने विदेशबाट आउने क्रमसँगै यो सङ्ख्या बढ्दै जानेछ । यसको लागि नगरपालिकाले होल्डिङ सेन्टर, क्वारेन्टिन र सम्पूर्ण रेखदेख गर्नाका लागि ९ जना कर्मचारीको व्यवस्था पनि गर्दै आएको छ ।
सांस्कृतिक एवम् ऐतिहासिक नगर भक्तपुरको विभिन्न समयमा मनाइने यहाँका चाडपर्वहरूबारे भक्तपुर नगरपालिकाले कसरी जनतालाई अनुरोध गर्दै आएको छ ?
भक्तपुर सांस्कृतिक नगर हो । यहाँ हरेक महिना कुनै न कुनै चाडपर्वहरू भई नै रहन्छन् । नगरपालिकाले सरोकारवालाहरूसित छलफल गरी बिस्का जात्रा, गाईजात्रा, मातातीर्थ औँसी, गोकर्ण औँसी, देवाली पूजाजस्ता चाडपर्वहरूलाई औपचारिकतामा मात्रै सीमित गर्ने निर्णय ग¥यो भने पञ्चदान, गुँला पर्व, यन्याँपुन्हीजस्ता पर्वहरू स्थगित ग¥यो । सबै सरोकारवालाहरूसित छलफल गरेर निर्णय लिने गरेको कारण नगरपालिकाका हरेक निर्णयको प्रभावकारी कार्यान्वयन भएको छ । नगरवासीहरूले नगरपालिकाका हरेक निर्णयलाई सकारात्मकरूपमा लिई साथ र सहयोग गर्दै आउनुभएको छ ।
कोभिड–१९ सङ्क्रमण रोकथामको लागि भक्तपुर प्रवेश गर्ने नाकामा सुरक्षा व्यवस्थापनका कुरा पनि उठेको थियो नि !
हो, कोभिडको सङ्क्रमण बढ्दै गएपछि बाहिरबाट भक्तपुर नगर प्रवेश गर्ने नाकाहरूमा कर्मचारी खटाएर लगत सङ्कलन गर्ने कार्य गरियो । नगर प्रवेश गर्ने १३ वटा प्रमुख नाकाहरूमा लिइएको लगतले भक्तपुरमा रामेछाप, बागलुङ, दोलखा, सिन्धुपाल्चोक, काभ्रे, ओखलढुङ्गा, दोलखा, सर्लाही, रौतहट, सिराहा, पर्सा, हुम्ला र भारतबाट समेत रोजगारी र स्वास्थ्य जाँचको क्रममा दैनिक सयौँको सङ्ख्यामा आउने गरेको देखायो । सीमा नाका कडा गर्दै लाने क्रममा कतिपयलाई फिर्ता पनि पठाइएको छ । सङ्क्रमण रोक्न बाहिरका मानिसहरूको पूरै आवतजावत रोक्ने प्रयासको रूपमा त्यो काम सुरु गरिएको हो । निषेधाज्ञा जारी गरेपछि त्यो समस्या देखिएन ।
काठमाडौँ उपत्यकामा चल्ने छोटो दुरीका सवारीसाधन आवागमन पनि बन्द गर्ने निर्णय गर्नुभयो नि होइन ?
भक्तपुरबाट उपत्यकाभित्र सयौँका गाडीहरू चल्ने गर्छन् । निषेधाज्ञा जारी गर्नुअघि नगरपालिकाले रुट नं. १, ७ र ९ का समितिका पदाधिकारीहरूसँग बैठक गरी सम्पूर्ण गाडी रोक्ने निर्णय ग¥यो । एक ठाउँका जनता अर्को ठाउँमा आवतजावत गर्नाले सङ्क्रमण बढ्ने सम्भावनालाई ध्यानमा राखेर यो निर्णय गरिएको हो ।
बन्द विद्यालयहरूबारे भक्तपुर नगरपालिकाले के सोचेको छ ?
सरकारी कार्यालय, विद्यालय, कलेजहरू बिदा घोषणा नगरेको अवस्थामा निषेधाज्ञा लागु गर्नु अगाडि नगरपालिकाले पठन संस्कृतिको विकासको लागि सम्पूर्ण विद्यालयमा शिक्षकहरूका लागि पाठ्यपुस्तकसँग सम्बन्धित किताब तथा साहित्यहरू अध्ययन गर्ने र त्यसबारे छलफल
गर्ने, शिक्षकहरूलाई विद्यालयबाटै प्रविधिको प्रशिक्षण दिने र अभिभावकहरूलाई कोरोनासम्बन्धी जनचेतना फैलाउन सन्देशहरू पठाउन तथा विद्यालय कलेज वरिपरि सरसफाइ गर्न निर्देशन दियो । त्यसरी नै नगरपालिकाद्वारा सञ्चालित कलेजहरूमा अनलाइन कक्षा सञ्चालन तथा परीक्षासमेत अनलाइनबाटै लिइयो । यसले निषेधाज्ञाबीच पनि कलेजका विद्यार्थीहरूको पढाइले निरन्तरता पाइरहेको छ ।
लकडाउनको समयमा सर्वसाधारण जनतालाई घरमै बस्न र मानिसको भीडभाड हुन नदिन नगरपालिकाले सचेतना गतिविधि कसरी अगाडि बढाइरहेको छ ?
हरेक दिन फोहर सङ्कलनसँगै कोभिड–१९ बारे सचेतनाका सन्देशहरू टोल—टोलमा गुञ्जिरहेका हुन्छन् । नेपाल र नेपालबाहिर भएका सङ्क्रमित तथा मृत्यु भएका विवरणसहित दैनिक हुने माइकिङले जनतालाई थप सचेत पार्ने कार्य भएको छ । यो सँगै टोलटोलमा किटनासक औषधि (क्लोरिन) छर्ने काम निरन्तर भइरहेको छ भने टोल—टोलमा रहेका साबुन पानीको व्यवस्थाले हात धुने कार्यलाई निरन्तरता दिँदै आएको छ ।
कोभिड–१९ शङ्का लागेका वा स्वास्थ्यसँग सम्बन्धित कुनै समस्या देखिएका बिरामीहरूको लागि भक्तपुर नपाले कसरी सेवा प्रदान गर्दै आइरहेको छ ?
कोभिडको शङ्का लागेका वा अरू कुनै स्वास्थ्यसँग सम्बन्धित समस्या देखिएमा तत्काल सेवा लिन सक्ने गरी २ जना डाक्टरहरू डा. बालकृष्ण चाँगुभारी र डा. विवेक बोय्जूलाई परामर्श सेवाको लागि तोकिएको छ । अस्पतालमा तत्काल पुग्न समस्या पर्ने बिरामीहरूलाई यो सेवाले ठूलो मद्दत मिलेको नगरवासीहरूको भनाइ छ । त्यसका साथै जनस्वास्थ्य सेवा केन्द्रले इमर्जेन्सी सेवा र ओपीडी सेवालाई निरन्तरता दिँदै आएको छ ।
भक्तपुर नगरपालिकाले आफ्नो छुट्टै आइसोलेसन वार्डको व्यवस्था गरेको छ वा छैन ? आइसोलेसन स्थापनाको लागि के कस्तो पहल गरिरहनुभएको छ ?
अहिलेसम्म भक्तपुर नगरपालिकाले छुट्टै आइसोलेसनको व्यवस्था गरेको छैन । जिल्लाका सबै नगरपालिकाका लागि एकीकृत आइसोलेसनको व्यवस्था गरिएको छ । खरिपाटीस्थित विद्युत् प्राधिकरणको तालिम केन्द्रमा २ सय शय्याको आइसोलेसन छुट्टयाइएको छ भने भक्तपुर अस्पताललाई कोभिड अस्पतालमा रुपान्तरण गरी त्यहाँ लक्षण देखिएका १५ र नदेखिएका १० गरी २५ शय्याको व्यवस्था गरिएको छ । भक्तपुर अस्पताल प्रादेशिक अस्पताल भएकोले पीसीआर परीक्षणको मेसिन व्यवस्थापनको लागि प्रदेशको स्वास्थ्यमन्त्रीसँग छलफल भइरहेको छ । उहाँले छिट्टै नै मेसिन भक्तपुर अस्पतालमा जडान गरिदिने आश्वासन दिनुभएको छ ।
कोभिड–१९ सङ्क्रमण भएका व्यक्तिहरूको कन्ट्याक्ट ट्रेसिङ कतिको प्रभावकारीरूपमा भइरहेको छ ?
भक्तपुर नगरपालिकाभित्र हालसम्म ५० जनाभन्दा बढी सङ्क्रमितहरू भइसकेका छन् भने तिनको सम्पर्कमा आएका ३ सत्न्दा बढीको सङ्ख्यामा कन्ट्याक्ट ट्रेसिङको काम भइरहेको छ । अहिलेसम्म सुरुमा पोजेटिभ देखिएका परिवारको सदस्यहरूमै पोजेटिभ देखिएका छन् । पीसीआर परीक्षणको रिपोर्ट ढिलो आएका कारण कतिपय सङ्क्रमितहरूले अरूलाई सार्न सक्ने सम्भावना धेरै छ । यसर्थ, नेपाल सरकारले नै सबै ठाउँमा आवश्यक जनशक्तिसहित पीसीआर परीक्षण मेसिनको व्यवस्था गर्न ढिलाइ गर्नुहुन्न ।
भक्तपुर नगरपालिकाको विपद् व्यवस्थापन समितिले महामारी रोकथामको लागि कस्तो भूमिका खेलिरहेको छ ? यसमा सरकारको तर्फबाट के कस्तो सहयोग पाउँदै आउनुभएको छ ?
विपद् व्यवस्थापनसम्बन्धी एकल अधिकार संविधानले स्थानीय तहलाई दिएको छ भने त्यो साझा अधिकार सूचीमा पनि समावेश छ । अधिकांश स्थानीय तहहरूले विपद् व्यवस्थापन ऐन बनाई कार्यान्वयन गरिरहेका छन् । कोभिड–१९ पनि विपद् नै हो तर सरकारले यसलाई प्रकोप व्यवस्थापन भनेको छ । जे होस् अहिले फैलिँदै गएको कोभिडको सङ्क्रमण नियन्त्रण कुनै एक तहले सम्भव हुने देखिँदैन । यसर्थ, सम्पूर्णरूपले नियन्त्रण गर्न सङ्घ, प्रदेश र स्थानीय तीनै तहको समन्वयात्मक भूमिका अपरिहार्य छ । समन्वयविना आ—आफ्नो तरिकाले काम गरेको खण्डमा सङ्क्रमण नियन्त्रणबाहिर जाने खतरा बढ्दै जाने सम्भावना छ । बेलैमा यसबारे ध्यान पु¥याउनु आवश्यक छ ।
सङ्क्रमितहरूप्रति समाजले नराम्रो व्यवहार गरेको भन्ने गुनासोप्रति यहाँ के भन्नुहुन्छ ?
विभिन्न ठाउँमा कोरोना सङ्क्रमित स्वास्थ्यकर्मी र अन्य सर्वसाधारणलाई नराम्रो व्यवहार गरेका समाचारहरू हामीले पनि पढेका छौँ । यो राम्रो कुरा होइन । स्वास्थ्यकर्मीहरू बिरामीको सेवामा निरन्तर खटिइरहनुभएको छ । हामी बिरामी भएमा जाने ठाउँ भनेकै अस्पताल हो । उहाँहरूले काम गर्नुभएन भने बिरामीको उपचार कसले गर्छ ? उहाँहरूलाई विभिन्न कारणबाट सङ्क्रमण हुनसक्छ । स्वास्थ्यकर्मीहरू कारोनाविरुद्ध पहिलो पङ्क्तिमा बसेर लड्ने लडाकूहरू हुनुहुन्छ । उहाँहरूलाई त झन् सम्मान गर्नुपर्छ । त्यसरी नै अरू नागरिकहरू पनि आफूले चाहेर कोही सङ्क्रमित हुने होइन । उहाँहरूको मनोबल बढाउने काम सबैबाट हुनुपर्छ । जनप्रतिनिधि, कर्मचारी र सबै छर—छिमेकले पनि सङ्क्रमितहरूलाई आ—आफ्नो तर्फबाट सहयोग गरौँ र कोभिड–१९ लाई समुदायमा महामारीको रूपमा फैलन नदेऔँ !