भक्तपुर नगरपालिकाबाट नगरपालिका क्षेत्रभित्रका विद्यालयहरुमा लागु गर्ने गरी स्थानीय पाठ्यक्रम प्रभावकारी ढंगले पाठपाठनको निम्ति ‘ख्वपको पहिचान’ नामक सन्दर्भ सामाग्री प्रकाशनमा ल्याएको छ ।
भक्तपुर नगरपालिकाका प्रमुख एवम् भक्तपुर नपाद्वारा गठित शिक्षा, संस्कृति तथा स्वास्थ्य समितिका संयोजक सुनिल प्रजापतिले ‘ख्वपको पहिचान’ नामक सन्दर्भ सामाग्री पुस्तक मंगलबार एक समारोहबीच सार्वजनिकीकरण गर्नुभयो ।
साथै सोही कार्यक्रममा उहाँले एसईई विद्यार्थी लक्षित भर्चुअल कक्षा व्यवस्थापनको निम्ति सहयोग गर्ने व्यवस्थापक र १८ वटा विद्यालयका २५ जना शिक्षक–शिक्षिकाहरुलाई धन्यवाद पत्र र मायाको चिनो पनि वितरण गर्नुभयो ।
कार्यक्रममा नगर प्रमुख प्रजापतिले कम्प्युटरको माध्यमबाट पठनपाठन गरिने भर्चुअल कक्षा भक्तपुर नगरपालिकाको लागि नयाँ विषय भएको र नगरपालिकाले सञ्चालन गरेको कक्षा र प्रसारणले देशभरिका विद्यार्थीहरु लाभान्वित भएको बताउनुभयो ।
स्थानीय सरकार सञ्चालन ऐन २०७४ मा व्यवस्था भएअनुसार भक्तपुर नगरपालिकाले स्थानीय पाठ्यक्रम निर्माण कार्यदल गठन गरी कक्षा १ र ६, २ र ७ समेत गरी चारवटा कक्षामा स्थानीय पाठ्यक्रम तयार गरी सोहीअनुसार अध्ययन अध्यापन भइरहेको र आगामी दिनहरुमा थप कक्षाहरुको पाठ्यक्रम निर्माणको तयारी भइरहेको बताउनुभयो ।
नेपाल सरकारले लगाएको लकडाउनका कारण नगरपालिकालाई ठूलो आर्थिक भार पर्ने हुँदा भक्तपुर नपाका जनप्रतिनिधि तथा कर्मचारीहरुले बैठक भत्ता, पोशाक भत्ता र खाजाभत्ता बापत गरेको सहयोगबारे अवगत गराउनुहुँदै प्रमुख प्रजापतिले नपाभित्र सञ्चालिक विद्यालय र संघसंस्थाहरुबाट सहयोगको लागि आग्रह गर्नुभयो ।
क्युवा, कोरियालगायतका समाजवादी देशहरुमा संकटको समयमा कसरी काम ग¥यो, कस्तो नीति अवलम्बन ग¥यो, त्यसको पनि अध्ययन गरी त्यसबाट प्रेरणा लिन आवश्यक भएको बताउनुहुँदै उहाँले नगरको सरसफाइमा विद्यालयहरुले पनि आवश्यक सहयोगको लागि आह्वान गर्नुभयो ।
उहाँले नेपालकै अग्लो भक्तपुरको ऐतिहासिक पाँचतले मन्दिर जीर्णोद्धारमा चार हजारभन्दा बढी नगरबासीहरुबाट सहयोग र लाखौं रुपैयाँ आर्थिक सहयोग प्राप्त हुनु गर्व गर्न लायक भएको बताउनुभयो ।
भक्तपुर नपाका उपप्रमुख रजनी जोशीले स्थानीय पाठ्यक्रमलाई परिमार्जन गर्दै लाने उद्देश्यले पाठ्यपुस्तक तयार भएको बताउनुहुँदै नयाँ पुस्तामाझ भक्तपुरको संस्कृति र संस्काराबारे व्यवहारिक ज्ञान प्रदान गर्न यसको आवश्यक भएको बताउनुभयो । उहाँले भक्तपुर नगरपालिकाले आर्थिक वर्ष २०७७/७८ को वार्षिक बजेटमा शिक्षा, स्वास्थ्य र सांस्कृतिक सम्पदामा विशेष प्राथमिकता दिएको बताउनुभयो ।
त्यस्तै भनपा वडा नं. ७ का वडाध्यक्ष उकेश कवांले कोभिड १९ को संक्रमण जोखिमका कारण लामो समयसम्म विद्यालय नखोल्ने स्थिति सिर्जना भए विद्यालयहरुले वैकल्पिक शिक्षण विधि अपनाउनुपर्ने हुन सक्ने बताउनुभयो ।
स्थानीय पाठ्यक्रम कार्यदल अध्यक्ष योगेन्द्रमान बिजुक्छेँले पाठ्यक्रमविना नै पठनपाठन गराउन सिकाउनु स्थानीय पाठ्यक्रमको विशेषता भएको बताउनुहुँदै ‘ख्वपको पहिचान’ पाठ्यक्रमलाई सहयोग पुग्ने सन्दर्भ सामाग्री मात्र भएको बताउनुभयो ।
एसईई भर्चुअल कक्षा व्यवस्थापन गर्नुहुने बागेश्वरी माविका शिक्षक ज्ञानसागर प्रजापतिले भक्तपुर नपाले सञ्चालन गरेको इसईई लक्षित भर्चुअल कक्षा स्थानीय तहले गरेको उदाहरणीय कार्य भएको बताउनुभयो ।
कार्यक्रममा नगर शिक्षा प्रमुख हरिप्रसाद निरौलाले विद्यालय तहको सिकाइलाई सहजीकरण गर्न पाठ्यपुस्तकको आवश्यकता भएको र भक्तपुर नपा वडा नं. ९ का वडाध्यक्ष रबिन्द्र ज्याख्वले पाठ्यक्रमलाई विस्तृत रुपमा पठनपाठन गराउन विज्ञसँग छलफलपश्चात ‘ख्वपको पहिचान’ पुस्तक प्रकाशन भएको बताउनुभयो ।
कार्यक्रममा नगर प्रमुख प्रजापतिले भर्चुअल कक्षा निःशुल्क प्रसारण गर्ने भादगाउँ टेलिभिजनलाई पनि धन्यवादपत्र र मायाको चिनो प्रदान गर्नुभयो ।
