विपद् व्यवस्थापनसम्बन्धी अभिमुखीकरण कार्यक्रम सम्पन्न
भक्तपुर, २०७६ असार १७ गते मंगलबार।
भक्तपुर नगरपालिकाको आयोजनामा विपद् व्यवस्थापन तालिम शिक्षालय, नेपाली सेनाको प्राविधिक सहयोगमा विपद् व्यवस्थापनसम्बन्धी चारदिने अभिमुखीकरण समापन तथा प्रमाणपत्र वितरण कार्यक्रम एक समारोहबीच मङ्गलबार सम्पन्न भयो ।
कार्यक्रममा भक्तपुर नगरपालिकाका उपप्रमुख रजनी जोशीले नगरवासीहरूलाई हरेक कुराले पोख्त बनाउन शिक्षाको माध्यमबाट विपद् व्यवस्थापन तालिम आयोजना गरेको बताउनुभयो ।
उहाँले तालिम प्राप्त प्रशिक्षार्थीहरू स्वयम्स्फुर्त देशको सेवा र समाजको उद्धार गर्न लागिपर्नुपर्ने बताउनुभयो । उहाँले मानवीय र प्रकृति विपद्को लागि आवश्यक सामानहरू नगरपालिका र हरेक वडामा तयारी गर्ने बताउनुभयो ।
कार्यक्रममा १ नं वडाका वडाध्यक्ष श्यामकृष्ण खत्रीले विपद् व्यवस्थापन कोष परिचालन समिति नगर प्रमुखको संयोजकत्वमा बनिसकेकोले विपद्मा तालिम प्राप्त प्रशिक्षार्थीहरूबाट विपद्मा उद्धार गरी प्राथमिक उपचार हुने आशा व्यक्त गर्नुभयो ।
विपद् व्यवस्थापन तालिम शिक्षालय, नेपाली सेनाका सेनानी एवम् प्रशिक्षक टोलीका संयोजक भगिरथ महतले तालिमबाट आँखा खोलिन्छ भन्नुभयो ।
उहाँले नगरपालिकाले यो तालिमलाई कसरी सदुपयोग गर्ने हो सो नगरपालिकाको हातमा रहेको बताउँदै विपद् व्यवस्थापनमा नगरपालिकाले एउटा इँटा थप्ने कार्य गरेको बताउनुभयो ।
प्रशिक्षार्थी वडा निरीक्षक रामकृष्ण प्रजापति, चन्द्रलक्ष्मी खत्री गोठे र नगर निरीक्षक दिलिपकुमार सुवालले पनि बोल्नुभएको थियो ।