गुठीया सम्पूर्ण जिम्मेवारी स्थानीय तहता बियमः

गुठी सम्बन्धीया कानुन एकीकरण व संशोधन याय्ता सरकारं संसदे दर्ता याःगु विधेयकया विरुद्धय् गुलिं मनूत सडके वयो हाल । धर्म व संस्कृति न्हांक छोइगु जुलदक अपुं चियाँमियाँ हाल च्वन । अः गुठीया नामे अरबौं अरबया सम्पति दः । व फुक्क महन्त व मठाघिसपिसं नयो च्वंगु दः । गुठी याय्गु आयस्ता दक्व नैपुं अले ज्या छुं मयाइपुं गुठी संस्थानया छुंहे औचित्य मरु ।

गुठी संस्थानया अधिनय् यक्व यक्व जग्गा जमिन, मठ–देगःत जात्रात चलेयाय्गु ज्यात दः । यक्व यक्व सम्पदा पुलांजुयो, दुङ वाङ मदैगु अवस्थाय् थ्यङानं ल्ह्वनेगु व म्वाकतय्गुलि भ्या भति हे बिचः याङ च्वंगु खानेमरु । ज्या साङ च्वंगु खानेमरु । ई स्वयो जात्रा न्ह्याकेता मः काथं धेवाताङ मब्युगु, न्हुगु पुस्ताके जात्रा प्रतिया माया–मोह म्ह्व जुयो वांगु अले गुठीया हिसाब न्हय्कने स्वय्थें पारदर्शी याय् मफुगुया हुनिं संस्कृति, चाडपर्व, जात्रा त झन झन संकटे लः वांगु खः ।

अः प्रस्ताबयागु विधेयकं ताःई निसें दिकतःगु गुठी जग्गा रैतानी याय् दैगु ब्यवस्था याङ ब्युगु दः । थ्व लसकुसयाय बहःगु खाँ खः । सुनुं बुंथुवया जग्गा याङ च्वंम्हाम्हवैयाता मोहियानी हक दैगु अले गुठी जग्गा कमेयाङ च्वंम्हासिता मोहियानीहक मदैगु खाँ जुयफैमखु । गुगु नं गुठी याःगु जग्गा कमेयाङ च्वंम्हासिता मोहियानी हक दय्हे मः । बच्छी जग्गाजक संरक्षण याय् फःसां व छगू उपलब्धी हे जुइ ।

अः जात्रा ङाय्केगु व सम्पदा म्वाकेगु ज्या स्थानीय तहं याङ वयोच्वंगु दः । ज्या फुक्क स्थानीय तहता अले आम्दानी काय्गु जक गुठी संस्थानता याङ वयो च्वंगु ज्या तस्कं मिले मजु । उकिं स्थानीय जनतात गुठीसंस्थान खाङ असन्तुस्त जूगु खः । जात्राखय् स्थानीय मनूत मुङ थःगु भःपियो थःगु म्हासिइका पिब्वइकाथं लय लय् तायो जात्रा ङाय्की । अः जनप्रतिनिधित वय धुंकगुलिं जात्रा न्हयाकेगु ब्यवस्थापन याय्गु थें फुक्क जिम्मा व अधिकार स्थानीय तहता वियगु तस्कं आवश्यक जु । नेपःया संविधान २०७२ या मति काथं संस्कृति संरक्षण व विकासया फुक्क जिम्मेवारी स्थानीय तहता बियमः । थुगु अवस्थाय् सम्पदा, संस्कृति व परम्परा म्वाक तयगु जिम्मेवारी स्थानीय तह याय्गु हे जक खः । थुकी स्थानीय तहया अधिकार जक जुय् मः । स्थानीय भाय्, जात्रा, संस्कृतिया छुं हे खाँ मथुपूं गुठी संस्थानया हाकिमतय्सं याङ हे गुठी जग्गा कमेयाङ च्वंपुं मोहि व जात्रा परम्परा व संस्कृतिखय् समस्या वःगु खः । उकिं गुठी संस्थान खारेज याङ उकिया फुक्क अधिकार स्थानीय तहता वियमः धाय्गु थौ या आवश्यकता खः । थथेयाःसा जक बुद्धी पूवांकगु जुइ धाय्गु खाँ सकल थू पिंन्सं धायो च्वंगु दः ।