भक्तपुर नगरपालिकाकोे आयोजनामा आइतबार प्रशिक्षकहरुको तालिमसम्बन्धी एक भेला कार्यक्रम सम्पन्न भयो ।
कार्यक्रममा बोल्नुहुँदै भक्तपुर नगरपालिकाका प्रमुख सुनिल प्रजापतिले सामुदायिक विद्यालय विद्यार्थीहरुको पहिलो रोजाई बनाउन भक्तपुर नगरपालिकाले नगरभित्रका ९२ वटा विद्यालयका शिक्षक–शिक्षिकाहरुको लागि विभिन्न विषयमा तालिमको आयोजना गर्न लागेको जानकारी गराउनुभयो ।
संस्थागत र सामुदायिक विद्यालयबीचको शैक्षिक गुणस्तरमा एकरुपता ल्याउन विभिन्न विषयको तालिमको आवश्यकता औंल्याउनुहुँदै प्रमुख प्रजापतिले विद्यार्थीको शैक्षिक क्षमता अभिवृद्धि गर्न नगरपालिकाले विषयगत तालिमको कार्यक्रमलाई अगाडि सारेको बताउनुभयो ।
भक्तपुरलाई देशकै उत्कृष्ट शैक्षिक गन्तव्यको रुपमा विकास गर्न नगरपालिकाले प्राथमिक र माध्यमिक विद्यालयका शिक्षक–शिक्षिकाहरुलाई तालिम दिनुका साथै मन्टेश्वरी सिकाइ प्रविधिको पनि तालिम सञ्चालन गर्ने बताउनुभयो ।
शिक्षकहरुले कमजोर विद्यार्थीको शैक्षिक स्तर उकास्न विशेष ध्यान दिन आग्रह गर्नुहुँदै प्रमुख प्रजापतिले भक्तपुर इञ्जिनियरिङ शिक्षामा उत्कृष्ट गन्तव्यको रुपमा स्थापित भइरहेको बताउनुभयो ।
कार्यक्रममा भक्तपुर नपा वडा नं. ७ का वडाध्यक्ष उकेश कवांले शिक्षक–शिक्षिकाहरुको तालिम सञ्चालनको उद्देश्य र आवश्यकताबारे प्रस्ट पार्नुहुँदै भक्तपुरको शैक्षिक स्थिति राम्रो बनाउन शिक्षकहरुको मेहेनत र योगदानले ठूलो भूमिका खेल्ने बताउनुभयो ।
अङ्ग्रेजी, नेपाली, गणित, विज्ञान र सामाजिक विषयमा शिक्षक–शिक्षिकाहरुलाई तालिम दिने नगरपालिकाले जनाएको छ । कार्यक्रममा भक्तपुरका विभिन्न विद्यालयका प्रशिक्षकहरुको उपस्थिति थियो । तालिम यही चैत १३ गतेबाट सञ्चालन हुने जानकारी दिइएको छ ।
