लाहान, १३ माघ २०७५, आइतबार ।
नेपाल मजदुर किसान पार्टीको ४५ औं स्थापना दिवसको अवसरमा सिरहा जिल्ला समितिको आयोजनामा आइतबार लाहनमा पत्रकार भेटघाट कार्यक्रम भयो ।
भेटघाटमा नेपाल मजदुर किसान पार्टीका केन्द्रीय सदस्य एवम् भक्तपुर नगरपालिकाका प्रमुख सुनिल प्रजापतिले नेमकिपाले नेकपा सरकारको सैद्धान्तिक रुपमा तीव्र आलोचना गरिरहेको बताउनुभयो । उहाँले नेपालमा समाजवादी व्यवस्था स्थापना गर्नु नेमकिपाको उद्देश्य भएको बताउनुभयो ।
पुँजीवादी व्यवस्था आफै फोहोर व्यवस्था भएको हुँदा नेमकिपा पुँजीवादी व्यवस्थामा सामेल नभएको प्रस्ट पार्नुहुँदै प्रजापतिले पुँजीवादी सरकारमा गएर आमूल परिवर्तनको सम्भावना नभएको बताउनुभयो ।
पत्रकारको जिज्ञासामाथि प्रस्ट पार्नुहुँदै नेता प्रजापतिले नेमकिपाले भारतीय जनताको नभई भारतको शासन व्यवस्था र हस्तक्षेपको नीतिको विरोधमा आवाज उठाइरहेको बताउनुभयो । नेकपा सरकार कम्युनिष्ट सिद्धान्तअनुसार सञ्चालन भइरहेको छैन, राज्यको स्वामित्वमा आउनुपर्ने कलकारखाना निजीकरण गर्ने र पुँजीपति वर्गको सेवा गर्ने सरकार कम्युनिष्ट सरकार हुन नसक्ने दाबी उहाँले गर्नुभयो ।
जनताको नजिकको सरकार भनेको स्थानीय सरकारको हो । नेपाल मजदुर किसान पार्टीले देशको सन्तुलित विकासको निम्ति स्थानीय तहलाई अधिकार सम्पन्न बनाउनुपर्नेमा जोड दिइरहेको छ । – उहाँले भन्नुभयो ।
उहाँले भन्नुभयो – ‘प्रजग कोरियालगायत धेरै देशहरुमा अमेरिकी साम्राज्यवादले लगाउँदै आएको नाकाबन्दीको विरोध गर्दै ती देशका न्यायप्रेमी जनताप्रति नेमकिपाले ऐक्यबद्धता जनाउँदै आएको छ ।’
सांसदहरुलाई पेन्सन दिने विधेयक, ३ प्रतिशत थ्रेसहोल्ड, उद्योगधन्दाहरुको निजीकरणजस्ता देश र जनताको हित विपरीत संसदमा प्रस्तुत विधेयकहरुमा नेमकिपाले विरोध गरेको बताउनुहुँदै प्रमुख प्रजापतिले नेमकिपाले पुँजीवादी सत्तामा गएर समाजवाद आउनेजस्ता पुँजीवादी विचारलाई कहिल्यै स्वीकार नगर्ने धारणा व्यक्त गर्नुभयो ।
जुन देशको राजनीति राम्रो हुन्छ, त्यस देशका जनता सुखी हुने बताउनुहुँदै प्रजापतिले नेपाल मजदुर किसान पार्टी समाजवादी आन्दोलनको बाटोमा अग्रसर भएर लाग्ने बताउनुभयो ।
