Explore news and happenings at Bhaktapur

अन्धविश्वासया छाउगोठे देङ सीगुया जिम्मेवारी सुनं काइगु ?

ख्वप पौ, अंक ५, वर्ष १, २०७५ पुस ३०

0

 

पुस २४ गते चान्हेँ बाजुरा जिल्लाया छगू गामय् आना याय्पुं अम्बा बोहरा नपां वया नेम्हाकाय्पुंनं सीङ च्वंगु खबर वल । उगू बुखेँ (समाचारे) न्हिथाङ तःकाथं पुस महिनाया तस्सिकं चिकुगुइलय मांम्हानपां नेम्हा काय् मचापुंनं थः नपां थ्येंगु जुल । सुथाय् अपुंस्वम्हांतुं सीङ च्वंगु अवस्थाय् खान । थुगु घटनां पश्चिम नेपालया गरिब बस्तीयाय्गु च्यूता सरकारं तयोच्वंगु खाने मरु धाय्गु स्पष्ट जू ।

महिनावारी (थेमत्यो) जूइबले पश्चिम नेपालया अछाम, बाजुरा जिल्लाया गाँ–गामे मिसातय्ता छाउगोठे (महिनावारी जुइबल छखेलिक तय्ता दय्कतःगु छेँचा) तैगु बाँमलागु कुप्रथा अः तकनं मदिक्क कय्च्याङ वयो च्वनातिनी । २०४७ साललिपा जनताया भोटकायो यक्व जनप्रतिनिधि धःपुं त्याक वयधुंकल । सांसद जुल, मन्त्री जुल । तर जनताया चेतनास्तर धःसा छतिं हे थाहाँ मःव । अजगु छाउपदि प्रथा मदय्केगु बचं चुनाबबले यक्वसिनं बिय धुंकल गैरसकारी संस्था, अन्तर्राष्ट्रिय गैरसरकारी संस्थातय्सं अजगु ज्या मज्विकेता दक प्वंकगु धेबा फिखय् नाः तय्गुथेँ जुयो च्वंगु दः । उपलब्धी छतिं हे मरु ।

देशे न्हूगु संविधान दय् धुंकल । संविधानकाथं संघ, प्रदेश व स्थानीय याङ स्वंगू तह्या सरकारनं दय्के धुंकल । अपुं फुक्कं थःथःगु अधिकार ज्वङ ज्याखय् लगेजुय् धुंकल । छगू गरिब परिवारया स्वम्हा स्वम्हा मनू सीगुलि थी थी सरकारया ध्यान वानेमःगु खला कि मखु ? थ्व सुयागु जिम्मेवारी ? फुक्कसिनं थ्व हे खाँ नुगलय् वाय्क च्वंगु खाने दः ।

हवाइजहाज (फय् खः) व हेलिकप्टर दुर्घटनाय् लाङ मनू सीत धःसा छानबिन याय्ता उच्चस्तरीय आयोग दय्की । सीपीनिगु नामय् बिचः हाय्किपुं ग्वाःग्वाः दै । सरकारं हे क्षतिपूर्ति बिय्गु खाँ क्वछिइ । तर छाउगोठे स्वम्हां छथाय्सं सीङ च्वङा नं न केन्द्रयाहे ध्यान वां न स्थानीय सरकार याय् हे ध्यान वां । तमिपुं सीसां गरिबपुं सीसां आखिर नेपाःमिहे सीगु खःसा थजगु पक्षपात प्रजातान्त्रिक राज्यं याय् मज्यू । याय् दैमखु । थ्व जनताया सः खः ।

झीगु दे समाजवादउन्मुख राज्य खः दक क्वछिय् धुंगु दः । संविधाने च्वय धुंगु खः । कम्युनिष्ट नां तयो त्याक स्वब्वखय् नेब्व (दुई तिहाई) बहुमतया सरकार दय्क शासन याङ वपिसं जनताया निंतिं मेगु यां छु याइ ? छाउगोठ थजगु कुप्रथा मदय्केगु कूतः जक यासां धन्य जुल दक जनतां आशा याङ च्वंगु दः ।

Leave A Reply

Your email address will not be published.