ख्वप कलेज अफ इन्जिनियरिङको QAA प्रक्रियाको लागि पूर्व परीक्षण भ्रमण कार्यक्रमको उद्घाटन

विश्वविद्यालय अनुदान आयोगकोEducational Quality Assurance and Accreditation Council बाट ख्वप कलेज अफ इन्जिनियरिङको QAA प्रक्रियाको लागि गठित Peer Review Team बाट २०८२ बैशाख ८, ९ र १० गते हुने पूर्व परीक्षण भ्रमण कार्यक्रमको उद्घाटन भयो ।

कार्यक्रमको उद्घाटन गर्दै भक्तपुर नगरपालिकाका प्रमुख सुनिल प्रजापतिले २१ औं शताब्दीका चुनौतीहरु सामना गर्न सक्ने प्राविधिक तयार गर्ने उद्देश्यले भक्तपुर नपाले दुईवटा इन्जिनियरिङ कलेजहरु सञ्चालन गरेको बताउनुभयो ।

कलेजले सार्वजनिक विदाहरु कटौती गरी अध्ययन अध्यापन र कार्यक्रमहरु सञ्चालनमा जोड दिँदै आएको बताउँदै आंगिक क्याम्पस बाहेकलाई थप कार्यक्रमको सम्बन्धन नदिने त्रिविको नीतिले कलेजमा नयाँ नयाँ कार्यक्रमहरु सञ्चालन गर्न नसकिरहेको बाउनुभयो ।

विश्वविद्यालय र कलेजहरु अनुसन्धान केन्द्र हुनुपर्ने बताउँदै उहाँले नपाबाट सञ्चालित कलेजहरूमा ७७ जिल्लाका विद्यार्थी र प्राध्यापकहरु अध्ययन अध्यापनमा आबद्ध रहेको बताउनुभयो ।

ख्वप कलेज अफ इ. का प्राचार्य सुनिल दुवालले वार्षिक कार्यक्रमअनुसार कलेजले भक्तपुर नपाबाट सञ्चालित ख्वप अस्पतालसँग सम्झौता गरेर चिकित्सकको व्यवस्था गरिरहेको, कलेजका प्राध्यापक, विद्यार्थी र कर्मचारीहरुको लागि स्वास्थ्य परिक्षणको सुविधा दिँदै आएको बताउनुभयो ।

उहाँले कलेजका कक्षाकोठाहरु स्मार्ट बोर्डको सुविधासहित आधुनिकीकरण गरेको बताउँदै पुस्तकालय आधुनिकीकरण तथा आरामदायी रुपमा अध्ययन अनुसन्धानको ब्यवस्था पनि गर्दै आएको बताउनुभयो ।

प्रा. डा. जीवराज पोखरेलले कलेजले परम्परा र परिवर्तनलाई सँगसँगै लग्न सकेको बताउँदै कलेजको वास्तुकला हेर्दा गौरवको अनुभुति भएको बताउनुभयो ।

उहाँले कलेज भौतिक रुपमा सुसज्जित र प्राज्ञिक रुपमा सुसंगठीत भएको बताउँदै हाल सम्म १०२ वटा शैक्षिक संस्थाले QAA प्राप्त गरिसकेको जानकारी दिनुभयो ।

कलेजका प्रा.डा. राजुभाइ त्यातले कलेजले तयार गरेको स्वाध्ययन प्रतिवेलन SSR को सार संक्षेप प्रस्तुती गर्नुभयो ।

तीनदिने भ्रमणको पहिलो दिन कलेजका विद्यार्थीहरुसँग बैठक, प्राध्यापकसँग बैठक र कलेज अवलोकनको कार्यक्रम रहेको छ ।