स्थानीय जनतालाई सदस्य बनाउने, कृषि र साना तथा घरेलु उद्योगलाई जोड दिने सहकारी संस्थाको प्रमुख सिद्धान्त

नेपाल मजदुर किसान पार्टीका सचिव एवभ् संघीय सांसद प्रेम सुवालले भक्तपुर महोत्सव २०८१ को अवसरमा भक्तपुर नगरपालिकाद्वारा प्रकाशित ‘सहकारी आवाज’ बुलेटिन आज एक कार्यक्रमबीच विमोचन गर्नुभएको छ ।

सहकारी गतिविधिसम्बन्धी प्रदर्शनी स्थल गोल्मढीमा आयोजित उक्त कार्यक्रममा बुलेटिन बिमोचन गर्दै सांसद सुवालले स्थानीय जनतालाई सदस्य बनाउने, कृषि र साना तथा घरेलु उद्योगलाई जोड दिने सहकारी संस्थाको प्रमुख सिद्धान्त भएको बताउनुभयो ।

सहकारी संस्था नयाँ पुस्तालाई सभ्य र सुसंस्कृत बनाउनेतर्फ लाग्नुपर्ने भन्दै उहाँले सहकारी संस्थाहरु आर्थिक कारोबारमा मात्र सीमित नभई सदस्यहरुको सांस्कृतिक स्तर उठाउनेतर्फ पनि ध्यान दिनुपर्ने बताउनुभयो ।

छिमेकी देश भारतले नेपालको सीमाना, नदीनाला र जलस्रोत र देशको राजनीतिमा हस्तक्षेप गरिरहेको बताउँदै उहाँले देशको अर्थतन्त्र कमजोर भएपछि सरकार पनि कमजोर हुने हुँदा सहकारी संस्थाहरुमार्फत देशको आर्थिक गतिविधिलाई चलायमान र सुदृढ पार्नेतर्फ सहकारी संस्थाहरु क्रियाशील हुनु जरुरी रहेको बताउनुभयो ।

सहकारी संस्थाहरुले सामाजिक सेवामा पनि बजेट विनियोजन गर्दै सदस्यका छोराछोरीहरुलाई सीपयुक्त तालिम, भाषाका तालिमहरु दिएर सुसंस्कृत बनाउनु उपयुक्त हुने धारणा सांसद सुवालले व्यक्त गर्नुभयो ।

कार्यक्रमका सभापति एवम् भक्तपुर नगरपालिकाका प्रमुख सुनिल प्रजापतिले भक्तपुर नपाद्वारा प्रकाशित सहकारीसम्बन्धी बुलेटिनमा संग्रहित लेखहरुको अध्ययनबाट सहकारी संस्थामा काम गर्ने सञ्चालक र कर्मचारीहरुलाई सहकारीको सिद्धान्त र नीतिबारे स्पष्ट हुने र सहकारी सही दिशामा अघि बढ्न मार्गनिर्देश गर्ने बताउनुभयो ।

भक्तपुर नपा वडा नं. २ का वडाध्यक्ष एवम् सहकारी समितिका सदस्य हरिप्रसाद बासुकलाले पाँचदिने महोत्सव भव्य र सफल रुपमा सञ्चालन भइरहेको बताउँदै महोत्सवकै अवसरमा भक्तपुर नपाले सहकारी गतिविधिहरु प्रदर्शनमा राखिएको बताउनुभयो ।

उक्त कार्यक्रममा भक्तपुर नपा वडा नं. ७ का वडाध्यक्ष उकेश कवांले सहकारी गतिविधिलाई उजागर गर्न भक्तपुर महात्सवको अंगको रुपमा सहकारी गतिविधि प्रदर्शनी स्थलको व्यवस्था गरेको बताउनुभयो ।

कार्यक्रममा भक्तपुर नगरपालिकाका प्रमुख प्रशासकीय अधिकृत वसन्त भट्टराईले धन्यवादज्ञापन मन्तव्य राख्नुभएको थियो भने भक्तपुर जिल्ला बचत संघका अध्यक्ष कृष्णगोविन्द लाखाजुले सहकारी मूल्य र सिद्धान्तबारे सहकारीकर्मी र सदस्यहरु सुसूचित हुनुपर्नेमा जोड दिनुभयो ।

कार्यक्रममा सहकारी समितिका सदस्यद्वय जितेन्द्र मुनंकर्मी र कार्यपालिका सदस्य रञ्जना त्वातीले पनि बोल्नुभएको थियो भने विभिन्न विद्यालयका विद्यार्थीहरुले सांस्कृतिक नाचहरु प्रस्तुत गरेका थिए ।