राष्ट्रिय महिला सामुदायिक स्वास्थ्य दिवसको अवसरमा ३ जना स्वास्थ्य स्वयम्सेविकाहरु सम्मानित

भक्तपुर नगरपालिकाले ‘राष्ट्रिय महिला सामुदायिक स्वास्थ्य दिवस २०८१’ को अवसरमा आज भक्तपुर नगरपालिकाका ३ जना उत्कृष्ट स्वास्थ्य स्वयम्सेविकाहरुलाई पुरस्कृत गरेको छ । भक्तपुर नगरपालिकाका उपप्रमुख रजनी जोशीले उत्कृष्ट स्वास्थ्य स्वयम्सेविकाहरु वडा नं. १० का रामलक्ष्मी दुवाल, वडा नं. १ का शिवलक्ष्मी दुवाल र वडां. ६ का कृष्णलक्ष्मी कासुलालाई नगदसहित प्रमाणपत्र वितरण गर्नुभयो ।

कार्यक्रममा बोल्दै उहाँले स्वास्थ्य स्वयम्सेविकाहरु समाजका महत्वपूर्ण अंग भएको बताउनुभयो । उहाँले भक्तपुर नगरपालिकाको स्वास्थ्य तथा सामाजिक गतिविधिमा स्वास्थ्य स्वयम्सेविकाहरुको भूमिका उल्लेखनीय रहेको बताउँदै नगर सफा र स्वच्छ रहे नगरबासीहरु स्वस्थ हुने बताउनुभयो ।

भक्तपुर नगरपालिकाले स्वास्थ्य क्षेत्रलाई प्राथमिकतामा राख्दै १०० शैय्याको ख्वप अस्पताल सञ्चालन गर्दै घरदैलो नर्सिङ सेवालाई पनि प्रभावकारी रुपमा सञ्चालन गरिरहेको बताउँदै घरदैलो नर्सिङ सेवामा पनि स्वास्थ्य स्वयम्सेविकाहरुले महत्वपूर्ण खेलिरहेको छ भन्नुभयो ।

प्रमुख प्रशासकीय अधिकृत वसन्त भट्टराईले स्वास्थ्य स्वयम्सेविकाहरु सरकारको प्रतिनिधित्व गरी जनताको घरदैलो पुग्ने माध्यम भएको बताउँदै तीनै तहको सरकारको काम प्रभावकारी कार्यान्वयनको लागि स्वास्थ्य स्वयमेसेविकाहरु क्रियाशीलता महत्वपूर्ण पक्ष भएको बताउनुभयो ।

भनपा ९ का वडाध्यक्ष रविन्द्र ज्याख्वले आ–आफ्नो वडामा आधारभूत प्राथमिक स्वास्थ्य सेवाभित्र पर्ने सुरक्षित मातृत्व, परिवार नियोजन, बालस्वास्थ्य तथा समुदायमा आधारित स्वास्थ्य कार्यक्रमको प्रवद्र्धन गर्नु स्वास्थ्यस्वयम्सेविकाहरुको दायित्व भएको बताउनुभयो । नजिकिँदै गएको भक्तपुर महोत्सवमा पनि स्वयम्सेविका भावनाले परिचालन हुन अनुरोध गर्दै उहाँले नगरको स्वास्थ्य प्रोफाइल बनाउनेतर्फ पनि स्वयम्सेविकाहरुले जोड दिनुपर्ने बताउनुभयो ।

कार्यक्रममा ख्वप अस्पतालका निमित्त मेडिकल डाइरेक्टर मजेशप्रताप मल्ल, स्वास्थ्य स्वयम्सेविकाको तर्फबाट प्रतिनिधि बबिमैंया लघु र स्वास्थ्य संयोजक रत्नसुन्दर लासिवाले पनि बोल्नुभएको थियो ।