ख्वप अस्पताल विमा सेवा प्रदान गर्ने देशकै शीर्ष सातौ स्थानमा

स्वास्थ्य विमा बोर्डले हरेक वर्ष स्वास्थ्य विमा सेवा प्रदान गर्ने देश भरका अस्पतालहरुको उच्च १० अस्पतालको नाम सार्वजनिक गर्ने गरेको छ । गत वर्ष ख्वप अस्पताल आठौं स्थानमा रहेको थियो ।

हरेक दिन आठ सयदेखि नौ सयसम्म बिरामीहरुलाई स्वास्थ्य सेवा प्रदान गर्दै आएको ख्वप अस्पताल १०० शय्याको स्विकृति प्राप्त अस्पताल हो । उक्त अस्पतालमा बिशेषज्ञ र मेडिकल अफिसर गरी ५५ जना चिकित्सक र ५९ जना नर्स सहित अन्य प्रशासनिक कर्मचारीहरु गरी हाल कूल २२३ जना जन शक्ति कार्यरत छन् ।

ख्वप अस्पतालले गत आ.ब.२०८०।८१ मा देशका ७० भन्दा बढी जिल्लाका २ लाख ५३ हजारभन्दा बढी बिरामीलाई सेवा दिएको थियो । अस्पताल आउने बिरामीहरुमध्ये ८० प्रतिशतभन्दा बढी विमा आबद्ध छन् । चालू आ.ब. २०८१।८२ मा साउनदेखि असोज २२ गतेसम्ममा ६६ हजार भन्दा बढी बिरामीहरुलाई स्वास्थ्य सेवा प्रदान गरि सकेको अस्पतालेको तथ्याङ्कले देखाउँछ । भनपा वडा नं. ९ च्याम्हासिह स्थित उक्त अस्पताल २०७८ साल बैशाख १७ गतेबाट औपचारिक रुपमा ख्वप अस्पतालको नाउँबाट सेवा शुरु गरिएको थियो । २०७३ सालमै जिल्ला जन स्वास्थ्य केन्द्रबाट २५ शय्याको ख्वप अस्पताल स्विकृति प्राप्त गरिए पनि जन स्वास्थ्य केन्द्रको नाउँमा सेवा दिइ आएको थियो । बिरामीको चाप र आवश्यकतालाई ध्यान दिएर थप सेवा बिस्तार गर्दै लगेको अस्पतालले जनाएको छ । चालू आर्थिक वर्षदेखि सिटी स्क्यान सेवा प्रदान गर्ने उद्देश्यले खरिद प्रकृया अगाडि बढाइएको जनाइएको छ ।

सरकारी मापदण्ड भित्र रहेर अस्पतालले सस्तो र गुणस्तरीय सेवा प्रदान गर्दै आएको छ । सम्पूर्ण नगरबासीहरुलाई निःशुल्क अक्सिजन वितरण गर्ने नेपालको एक मात्र नगर भक्तपुर नगरपालिका हो । भक्तपुर बासीहरुका लागि उपचारमा चाहिने आवश्यक रगत पनि नगरपालिकाले निःशुल्क उपलब्ध गराउँदै आएको छ ।

स्वास्थ्य विमा बोर्डले विमा वापतको भुक्तानी समयमा नगरेको कारण अस्पतालले भने आर्थिक समस्या भोग्दै आएको छ । गत वर्ष पौषदेखि भाद्रसम्मको विमा वापतको भुक्तानी २० करोडभन्दा बढी बाँकी भएकोमा अस्पताल व्यवस्थापन समितिका पदाधिकारीहरुले पटक पटक विमा बोर्डका पदाधिकारीहरुको ध्यानाकर्षण गर्दै आएका थिए । भाद्र महिनामा अस्पताल पदाधिकारीहरुले स्वास्थ्य मन्त्री प्रदिप पौडेल, विमा बोर्डका अध्यक्ष गुणराज लोहनी, कार्यकारी निर्देशक दामोदर बसौलासमेतसँगको छलफल पछि ती पदाधिकारीहरुले दशैं अगाडि दाबी रकमको ५० प्रतिशतभन्दा बढी भुक्तानी पठाउने प्रतिबद्धता गरेका थिए । तर असोज २२ गते जम्मा ४ करोड ५२ लाखमात्र रकम प्राप्त भएको अस्पतालले जनाएको छ ।

आठ महिनादेखि भुक्तानी बाँकी भएको कारण देखाउँदै शिक्षण अस्पताल महाराजगञ्जले असोज महिनादेखि स्वास्थ्य विमा सेवा रोकेको जनाएको छ । पाटन अस्पतालले १८ करोडभन्दा बढी बाँकी भएकोले कर्मचारीलाई तलब खुवाउन समेत नसक्ने अबस्थामा पुगेको बताएको छ भने विमा बोर्डकाअनुसार वीर अस्पताललाई पनि १८ करोडभन्दा बढी भुक्तानी गर्न बाकी छ ।

अहिले नेपाल सरकारले रु.एक लाखसम्मको स्वास्थ्य विमा सेवा प्रदान गर्दै आएको छ । स्वास्थ मन्त्री प्रदिप पौडेलले स्वास्थ्य विमा सेवा बिस्तार गरी रु. ५ लाख पुर‍्या‍उने बताएका थिए । रु. १ लाखको विमा गर्दा समेत सरकारले समयमा भुक्तानी गर्न नसकेर सरकारी अस्पतालहरुले विमा सेवा बन्द गर्नु पर्ने अबस्था आएको बेला मन्त्री पौडेलको त्यो घोषणा चर्चा कै लागि त होइन भन्ने शंका गर्नेहरु धेरै छन् । सरकारी नीति भित्र रहेर सेवा प्रदान गरिरहेका देश भरका अस्पतालहरुलाई शिघ्र विमा वापतको भुक्तानी गरी सेवालाई निरन्तरता दिने वातावरण बनाइयोस् । यही नै स्वास्थ्य मन्त्रालय र विमा बोर्डलगायत सम्बन्धित पदाधिकारीहरुसँग जनताकोे अपेक्षा हो ।