भक्तपुर बचत तथा ऋण सहकारी संस्था लि. को संरक्षकत्वमा सञ्चालित भक्तपुर आदर निकेतनका ज्येष्ठ नागरिकहरु आज सम्मानित भएका छन् ।
अन्तर्राष्ट्रिय ज्येष्ठ नागरिक दिवसको अवसरमा भक्तपुर नगरपालिकाका प्रमुख सुनिल प्रजापतिले ज्येष्ठ नागरिकहरुलाई फलफूल, पानी तताउने इलेक्ट्रिक जग र बिस्कुट सम्मानस्वरुप हस्तान्तरण गर्नुभयो ।
कार्यक्रममा बोल्दै नगर प्रमुख प्रजापतिले ज्येष्ठ नागरिक समाजका सम्मानित र आदर्श व्यक्ति भएको बताउँदै ज्येष्ठ नागरिकहरुले सम्मानजनक ढंगले बाँच्ने अधिकारको सुनिश्चितता आवश्यक भएको बताउनुभयो ।
समाज निर्माणमा अग्रजहरुको भूमिकाबाट नयाँ पुस्ता लाभान्वित हुन्छन् भन्दै उहाँले ज्येष्ठ नागरिकको आदर्श र मार्गनिर्देशमा नयाँ पुस्ताले काम गर्न जरुरी रहेको बताउनुभयो ।
स्वार्थी भावना भएका व्यक्तिले कहिल्यै समाजको हितमा काम गर्दैन भन्दै प्रमुख प्रजापतिले ज्येष्ठ नागरिकको सहज जीवनयापनमा परिवारको महत्वपूर्ण भूमिका हुने बताउनुभयो ।
कार्यक्रममा भक्तपुर आदर निकेतनका सञ्चालक लक्ष्मीप्रसाद कुसीले भक्तपुर साकोसले सदस्यहरुको हितमा आदर निकेतन सञ्चालनमा ल्याएकोे बताउँदै ज्येष्ठ नागरिक लक्षित विभिन्न मनोरञ्जनात्मक गतिविधि सञ्चालन गर्दै आएको बताउनुभयो ।
कार्यपालिका सदस्य रोशनमैंया सुवालले आदर निकेतन सञ्चालनमा भक्तपुर साकोसको उल्लेखनीय कार्य गरेको बताउँदै ज्येष्ठ नागरिकको उचित स्याहारसुसारमा परिवारले सहयोगी भूमिका खेल्नुपर्ने बताउनुभयो ।
आदर निकेतनका ३५ जना ज्येष्ठ नागरिकलाई सामाग्री हस्तान्तरण गरिएको थियो उक्त कार्यक्रममा भनपा वडा नं. ९ का वडाध्यक्ष रविन्द्र ज्याख्वले पनि बोल्नुभएको थियो ।
