सांस्कृतिक बाजा प्रतियोगिता गर्ने विषयमा छलफल

भक्तपुर नगरपालिकाका प्रमुख सुनिल प्रजापतिको अध्यक्षतामा भक्तपुरमा सांस्कृतिक बाजा प्रतियोगिता गर्ने विषयमा सोमबार संस्कृतिकर्मीहरुको भेला सम्पन्न भयो ।

कार्यक्रममा नगर प्रमुख प्रजापतिले स्थानीय तहको निर्वाचनमा निर्वाचित भएपछि निर्वाचन घोषणापत्रअनुसार नगरपालिकाले २०७४ सालमा बाँसुरी बाजा, २०७५ सालमा धाँ बाजा र २०७६ सालमा धिमाय बाजा, २०७७ मा कोभिडका कारण प्रतियोगिता गर्न नसकेको, २०७८ मा पछिमा बाजा प्रतियोगिता र २०७९ मा प्रगतिशील भजन प्रतियोगिता गरेको अवगत गराउनुभयो ।

उहाँले भक्तपुरलाई जीवन्त सहरको रुपमा प्रस्तुत गर्न नगरपालिकाले विविध गतिविधिमा जोड दिँदै आएको बताउनुभयो ।

उक्त कार्यक्रममा भक्तपुर नगरपालिकाका उपप्रमुख रजनी जोशी, प्रमुख प्रशासकीय अधिकृत वसन्त भट्टराई, शिक्षा, संस्कृति तथा स्वास्थ्य समितिका सदस्यद्वय भक्तपुर नपा वडा नं. ९ का वडाध्यक्ष रबिन्द्र ज्याख्व र भनपा ७ का वडाध्यक्ष उकेश कवांको पनि उपस्थिति रहेको थियो ।