श्रमको सम्मान गर्ने संस्कृतिको निर्माण गर्नुपर्छ : प्रमुख प्रजापति
भक्तपुर । २०८० फागुन १८ गते, शुक्रबार
भक्तपुर नगरपालिकाद्वारा सञ्चालन गरिने हाउस वायरिङ र आधारभूत कम्प्युटर तालिमका लागि आवेदन दिएका प्रशिक्षार्थीहरुको अभिमुखीकरण कार्यक्रम शुक्रबार भक्तपुर नपाको सभाकक्षमा सम्पन्न भयो ।
कार्यक्रममा बोल्दै नगर प्रमुख प्रजापतिले नेपालमा सीपयुक्त जनशक्तिको अभाव रहेको बताउँदै जनशक्तिलाई योग्य र दक्ष बनाउन भक्तपुर नपाले विभिन्न सीपमूलक र जीवनउपयोगी तालिमहरु सञ्चालनलाई जोड दिँदै आएको बताउनुभयो ।
सीपमूलक तालिम र दक्ष जनशक्ति उत्पादन तथा विकासमा भक्तपुर नपाले आवश्यक पहल गरिरहेको बताउँदै उहाँले देशलाई गरिबीबाट मुक्त गर्न युवाहरुलाई स्वदेशमै रोजगारीको व्यवस्था गरिनुपर्ने बताउनुभयो ।
तालिमले युवाहरुलाई सीप आर्जन र रोजगारीको अवसर सिर्जना गर्नुका साथै आत्मनिर्भर बनाउन महत्वपूर्ण भूमिका खेल्ने बताउँदै उहाँले विदेशबाट सिकेर आफ्नै देशको सेवा गर्ने भावना युवाहरुमा दिनुपर्ने बताउनुभयो ।
श्रमको सम्मान गर्ने संस्कृतिको निर्माण गर्नेतर्फ सबैको प्रयास जरुरी रहेको बताउँदै प्रमुख प्रजापतिले श्रमको सम्मान गर्न सके मात्र देश विकासको सम्भावना रहने बताउनुभयो ।
कार्यक्रममा भक्तपुर नगरपालिकाका प्रमुख प्रशासकीय अधिकृत वसन्त भट्टराइले तालिममा सहभागी प्रशिक्षार्थीहरु अनुशासन र समय परिपालनामा विशेष जोड दिन आग्रह गर्दै तालिमको सही सदुपयोग गरी आत्मनिर्भर बन्न प्रेरित गर्नुभयो ।
त्यस्तै भक्तपुर नपा वडा नं. ९ का वडाध्यक्ष रविन्द्र ज्याख्वले भक्तपुर नगरपालिकाद्वारा सञ्चालन गरिने हाउस वायरिङ तालिम मिति २०८० फागुन २० गते आइतबार र आधारभूत कम्प्युटर तालिम मिति २०८० फागुन २७ गते आइतबार बिहान ७ बजेबाट प्रारम्भ हुने र सो तालिम भक्तपुर नगरपालिकाद्वारा सञ्चालित ख्वप बहुप्राविधिक अध्ययन संस्थान, कमलविनायकमा हुने जानकारी गराउनुभयो ।
कार्यक्रममा कम्प्युटर तालिमका प्रशिक्षक सुनिल दथेपुथे र हाउस वायरिङका प्रशिक्षक पुन्यराम बासीले पनि तालिमको आवश्यकता र महत्वमाथि प्रकाश पार्नुभयो ।
![](https://scontent.fktm19-1.fna.fbcdn.net/v/t39.30808-6/430023426_774224234760378_8334936716345502484_n.jpg?stp=dst-jpg_p526x395&_nc_cat=102&ccb=1-7&_nc_sid=3635dc&_nc_ohc=YkiL7Zvqu7UAX88icK2&_nc_ht=scontent.fktm19-1.fna&oh=00_AfBWjCL274usS_vkiruFELlyGMLw-500oquEqBlXoVwsQQ&oe=65E8D19C)
![](https://scontent.fktm19-1.fna.fbcdn.net/v/t39.30808-6/429676564_774224221427046_8830999800714584880_n.jpg?stp=dst-jpg_p526x395&_nc_cat=108&ccb=1-7&_nc_sid=3635dc&_nc_ohc=Hd2EvrNcOYAAX8Oetxm&_nc_ht=scontent.fktm19-1.fna&oh=00_AfDCKlc5qV6T0CdOn-H7UTfGzGjLuxwv2lC4IIMYe240vw&oe=65E92899)
![](https://scontent.fktm19-1.fna.fbcdn.net/v/t39.30808-6/429946370_774224084760393_8420282219574264662_n.jpg?stp=dst-jpg_p526x395&_nc_cat=106&ccb=1-7&_nc_sid=3635dc&_nc_ohc=OlzIqL7lDgcAX--7KRL&_nc_ht=scontent.fktm19-1.fna&oh=00_AfCljHO25rJ-dGwe2rRu3BypA2fr70ualiCia0rEZxWudA&oe=65E9D642)
![](https://scontent.fktm19-1.fna.fbcdn.net/v/t39.30808-6/429782969_774224114760390_4789806322196766919_n.jpg?stp=dst-jpg_p526x395&_nc_cat=100&ccb=1-7&_nc_sid=3635dc&_nc_ohc=LA-dTAJgS6YAX-f7pYN&_nc_oc=AQm86fkUP8VlmosEw-BN64jCdUZ9mS9cXLTT5FiRrmv07_EF2cuYqe2l1trqazUEIvVSAZ7XUtEiC0-bsTH_457I&_nc_ht=scontent.fktm19-1.fna&oh=00_AfCoiKy5rPBKaz8aEGBdTHeKlf8PnYV-L6wVXFqfPPaGVQ&oe=65E964F6)