३५ औं अन्तर्राष्ट्रिय पथप्रदर्शक दिवसको अवसरमा उत्कृष्ट पथप्रदर्शक सम्मानित

भक्तपुर स्थानीय पथप्रदर्शक परिचालन समितिले ३५ औं अन्तर्राष्ट्रिय पथप्रदर्शक दिवस २०८० को अवसरमा प्रवचन तथा प्रशंसा वितरण कार्यक्रम आयोजना गरेको छ ।

नेपाल मजदुर किसान पार्टीका सचिव एवम् संघीय सांसद प्रेम सुवालको प्रमुख आतिथ्यमा सम्पन्न उक्त कार्यक्रममा सांसद सुवालले उत्कृष्ट पथप्रदर्शकहरुलाई सम्मानपत्र सहित सम्मान गर्नुभयो ।

कार्यक्रममा बोल्दै सांसद सुवालले एकपटक भक्तपुर घुमेर फर्केका पर्यटकहरुलाई दोहो¥याई तेह¥याई भक्तपुर आउने वातावरण निर्माण गर्नुपर्नेमा जोड दिँदै उहाँले पथप्रदर्शकहरुमा स्थानीय भाषासँगै विदेशी भाषाहरुमा दख्खल हुनुपर्ने बताउनुभयो ।

नेपालमा आन्तरिक पर्यटन विकासको अवधारणालाई अगाडि बढाइनुपर्नेमा जोड दिँदै सांसद सुवालले नेपालजस्तो विकासशील देशलाई आर्थिक समृद्धितर्फ दो¥याउन आन्तरिक पर्यटनले उल्लेखनीय भूमिका खेल्न सक्ने धारणा राख्नुभयो ।

उहाँले भारतीय एकाधिकार पुँजी र भारतीय विस्तारवादी नीतिले नेपाललाई आर्थिक रुपले परनिर्भर बनाइरहेको बताउँदै नेपालले आत्मनिर्भरतातर्फ जोड दिनुपर्ने धारणा व्यक्त गर्नुभयो ।

चिनियाँ शैलीको पर्यटन विकासबाट नेपालले पनि सिक्नुपर्ने बताउँदै उहाँले नेपालमा चीनबाट वर्षेनी लाखौंको संख्यामा चिनियाँ पर्यटकहरु भित्रिरहेको बताउनुभयो ।

त्यस्तै भक्तपुर नगरपालिकाका प्रमुख सुनिल प्रजापतिले देशको अर्थतन्त्र मजबुत बनाउने माध्यमको रुपमा पर्यटन क्षेत्रलाई विकास गर्नुपर्ने धारणा राख्नुभयो ।

पर्यटन क्षेत्रले नेपालको विकासमा महत्वपूर्ण भूमिका खेलिरहेको बताउँदै पथप्रदर्शकहरुमा स्वअनुशासन र इमानदारिता अपरिहार्य भएको बताउनुभयो ।

नेपाल पर्यटनको प्रशस्त सम्भावना भएको देश हो र पर्यटकका लागि सुरक्षा सुनिश्चिततता, स्वस्थकर खाना र गुणस्तरीय सेवा प्रदानले पर्यटकको बसाइँ लम्ब्याउन सकिने विचार उहाँले राख्नुभयो ।

एसियालाई आर्थिक केन्द्र बनाउन सबैले आ–आफ्नो क्षेत्रबाट आवश्यक भूमिका खेल्नुपर्ने बताउँदै प्रमुख प्रजापतिले देशको राज्य व्यवस्था र राजनीतिक व्यवस्था राम्रो भए मात्र देशमा शान्ति सुरक्षा कायम हुने र त्यहाँका जनताले सुख पाउने बताउनुभयो ।

भक्तपुर स्थानीय पथप्रदर्शक परिचालन समितिका संयोजक गौतम लासिवाले पथप्रदर्शक दिवस मनाउनेको उद्देश्यमाथि प्रकाश पार्दै उहाँले पथप्रदर्शकहरुले देशको भूगोल, इतिहास, सम्पदाबारे अध्ययन गरी पर्यटकहरुलाई सही सूचना उपलब्ध गराउनुपर्ने बताउनुभयो । देशको सार्वभौमिकता रक्षामा पनि पथप्रदर्शकको भूमिका महत्वपूर्ण रहेको उहाँले बताउनुभयो ।

भक्तपुर पर्यटन विकास समितिका अध्यक्ष दिपेशराज शर्माले र्यटकहरुलाई सत्यतथ्य सूचना प्रवाह गर्नु पथप्रदर्शकहरुको कर्तव्य भएको बताउँदै नेपालको पर्यटन प्रवद्र्धनमा स्थानीय पथप्रदर्शकहरुको उल्लेखनीय भूमिका रहेको बताउनुभयो ।

पर्यटक प्रहरी नायब निरीक्षक दामोदर कुइकेल अन्य ठाउँहरुको तुलनामा भक्तपुरको पर्यटन र पथप्रदर्शकहरुको कार्य व्यवस्था उत्कृष्ट रहेको बताउनुभयो ।

उक्त कार्यक्रममा भक्तपुर पर्यटन विकास समितिका रामसुन्दर भेलेले पनि बोल्नुभएको थियो ।

आज सम्मानित भएका पथप्रदर्शक टिकाप्रसाद दाहाल, रामकेशरी भैल, सुजन छुजु, विकास खड्का, अजित थापा र कृष्णकुमार थापा रहेका छन् ।