स्वास्थ्य स्वयम्‌सेवकहरुले असल सामाजिक कार्यकर्ताको रुपमा काम गर्नुपर्ने

‘महिला स्वास्थ्य स्वयम्‌सेविकाको सेवा, स्वस्थ समृद्ध राष्ट्र निर्माणमा टेवा’ भन्ने नाराका साथ जनस्वास्थ्य केन्द्र भक्तपुरको आयोजनामा बुधबार १५ औं राष्ट्रिय स्वयम्सेवक दिवस सम्पन्न भयो ।

कार्यक्रममा बोल्नुहुँदै भक्तपुर नगरपालिकाका प्रमुख सुनिल प्रजापतिले समाजको समस्या राम्ररी बुझ्ने स्वयम्सेवक भनेका सामाजिक कार्यकर्ता हुन् र सामाजिक कार्यकर्ता राजनैतिक कार्यकर्ता भएर समाजको सेवाको निम्ति काम गर्नुपर्ने बताउनुभयो ।

उहाँले नेपाल मजदुर किसान पार्टीले आफ्नो घोषणापत्रअनुसार घरदैलो नर्सिङ सेवाको प्रारम्भ गरेको र नगरवासीको रोग पहिचान गरी त्यहीअनुरुप सहज स्वास्थ्य सेवा उपलब्ध गराउन नगरपालिका अग्रसर हुने बताउनुभयो । समाजको स्तरअनुसार स्वयम्सेविकाहरूले काम गर्नुपर्ने विचार राख्नुहुँदै प्रमुख प्रजापतिले विद्यार्थीलाई स्वास्थ्य सेवा दिन प्रत्येक विद्यालय तथा कलेजमा नर्स वा डाक्टरमार्फत् निरन्तर सेवा दिने सोचका साथ अगाडि बढेको बताउनुभयो ।

समाजको तल्लो वर्ग र गरिब जनताको सेवा गर्ने लक्ष्य नगरपालिकाले बोकेको बताउनुहुँदै पैसा कमाउने भन्दा जनताको सेवामा ध्यान केन्द्रित गर्नुपर्छ भन्नुभयो ।
कार्यक्रममा भक्तपुर नगरपालिका वडा नं. ९ का वडाअध्यक्ष रविन्द्र ज्याख्वले घरदैलो नर्सिङ सेवाले नगरवासीको सेवा, वडा–वडाको समस्या पहिचान र तथ्याङ्क संकलनको काम भइरहेको बताउनुभयो । उहाँले नगरवासीको स्वास्थ्य अवस्था बुझ्न र नपाको नीति तथा कार्यक्रम तर्जुमा गर्न पनि यो सेवाले महत्त्वपूर्ण भूमिका खेल्ने बताउनुभयो ।
जनस्वास्थ्य केन्द्रका इन्चार्ज रत्नसुन्दर लासिवाले स्वयम्सेविकाहरूले जनताको सेवा गरिरहेको र वडा नर्सिङ परिचालनको उद्देश्य समाजका ज्येष्ठ नागरिक, गर्भवती महिला, बालबच्चा तथा गरिब जनताको सेवा गर्नु रहेको स्पष्ट पार्नुभयो ।

कार्यपालिका सदस्यद्वय सुनिता अवाल र छोरीमैयाँ सुजखूले नर्सिङ सेवा मानवीय धर्मसँग सम्बन्धित कार्य भएको हुँदा आ–आफ्नो क्षेत्रमा इमान्दारीपूर्वक काम गर्न मार्गनिर्देशन गर्नुभयो । भक्तपुर नपा जनताको संस्था भएको कारण स्वयम्सेविकामा जनताको भावना बुझ्ने र त्यहीअनुसारको व्यवहार गर्नुपर्ने बताउनुभयो ।

उक्त कार्यक्रममा महिला स्वयम्सेविका अध्यक्ष तारादेवी धन्छा, जमुना काफ्ले, कमलकेशरी शिल्पकार र रचना सुवालले पनि बोल्नुभएको थियो । कार्यक्रममा भक्तपुर नपाका प्रमुख सुनिल प्रजापतिले उत्कृष्ट तीन स्वयम्सेविका लक्ष्मीकेशरी तुईतुई, रहनसिला ग्वाछा र सरोजा अवाललाई प्रमाणपत्र र नगद पुरस्कार प्रदान गर्नुभएको थियो ।