चितवनमा जिल्लास्तरीय भेला एवम् प्रशिक्षण कार्यक्रम सम्पन्न

नेपाल मजदुर किसान पार्टीका केन्द्रीय सदस्य एवम् भक्तपुर नगरपालिकाका प्रमुख सुनिल प्रजापतिको प्रमुख आतिथ्यमा नेमकिपा चितवन जिल्ला समितिको आयोजनामा जिल्ला भेला तथा प्रशिक्षण कार्यक्रम शनिबार रत्ननगरमा सम्पन्न भयो ।

कार्यक्रममा प्रमुख प्रजापतिले पुँजीवादी प्रजातन्त्रमा संसद विघटन गर्ने अधिकार प्रधानमन्त्रीलाई हुने बताउनुहुँदै राजनीति कहिल्यै सरल बाटोमा हिंड्दैन भन्नुभयो ।
सशस्त्र संघर्षबाट राज्य सत्ता कब्जा गरेको इतिहासबारे प्रशिक्षित गर्नुहुँदै उहाँले प्रजातान्त्रिक समाजवाद भनेको पुँजीवादी व्यवस्था भएको बताउनुभयो । पुँजीपति वर्गको हितमा काम गर्ने, राज्यको उद्योग—कलकारखानाहरु निजीकरण गर्नेहरु कम्युनिष्ट हुनै सक्दैन भन्नुहुँदै उहाँले नेपाललाई छिमेकी देश भारतले आर्थिक रुपले उपनिवेश बनाउँदैछ भन्नुभयो ।
नेपालको शासन सत्तामा जाने नेताहरु विदेशी दलाल सावित हुँदै गएको बताउनुहुँदै प्रमुख प्रजापतिले नेपालको राजनीति विदेशकेन्द्रित हुनुमा शासकहरुको कमजोरीका कारण भएको बताउनुभयो ।
उहाँले भन्नुभयो — ‘नेमकिपाले केपी ओलीको देशघाती काममा समर्थन गरेको होइन, नेपालको सार्वभौमिकता रक्षा गर्ने सवालमा मात्र समर्थन गरेको हो । नेमकिपा व्यापक जनताको राजनीतिक चेतनास्तर उठाउने अभियानमा क्रियाशील छ ।’
शासन सत्ता स्वयम् अधिनायकवादी हुने बताउनुहुँदै उहाँले चुनावदेखि डराउनेहरु प्रजातन्त्रवादी हुनसक्दैन भन्नुभयो । सशस्त्र संघर्षबाट मात्र समाजवाद स्थापना हुने धारणा व्यक्त गर्नुहुँदै उहाँले राजनीतिक स्पष्टता र शत्रुलाई सजिलै चुनावमा जित्न नदिन नेमकिपाले चुनावको उपयोग गर्ने बताउनुभयो ।
नेमकिपासँग सैद्धान्तिक बहस गर्ने शक्ति शासक दलहरुमा नभएको विचार व्यक्त गर्र्नुहुँदै नेता प्रजापतिले नेमकिपाको उद्देश्य कामदार जनताको इमानदारितापूर्वक सेवा गर्ने भएको बताउनुभयो ।
राजनीति भनेको निःस्वार्थ भावनाले देश र जनताको हितमा काम गर्ने हो भन्नुहुँदै उहाँले असल व्यक्ति राजनीतिमा नआए खराब व्यक्ति शासन सत्तामा पुग्ने खतरा हुनेतर्फ सचेत पार्नुभयो ।
भक्तपुर नगरपालिका वडा नं. १ का वडाध्यक्ष श्यामकृष्ण खत्रीले भक्तपुर नपा खेलकुदको माध्यमबाट देशको सार्वभौमिकता विरुद्ध लड्ने र आवाज उठाउने नयाँ युवा पुस्ता तयार गर्ने अभियानमा रहेको बताउनुहुँदै नेमकिपाको घोष्णापत्रअनुरुप भक्तपुर नगरपालिकाले आफ्ना गतिविधिहरु अगाडि बढाइरहेको छ भन्नुभयो । उहाँले समाजवादी गणतन्त्रले मात्र व्यापक जनताको हित गर्ने बताउनभुयो ।
कार्यक्रमका सभापति एवम् नेमकिपा चितवन जिल्ला समितिका अध्यक्ष हरिप्रसाद दुवालले पार्टी प्रकाशनहरु नियमित अध्ययनमा जोड दिनुपर्ने र सैद्धान्तिक छलफलको माध्यमबाट संगठन विस्तारमा आआफ्नो तर्फबाट अग्रसर रहनुपर्ने बताउनुभयो ।
कार्यक्रममा नेक्राविसंघका केन्द्रीय उपाध्यक्ष प्रकाश गुरुङले क्युवाली क्रान्तिबाट नेपालले सिक्नुपर्ने पाठ र क्युवाली नेता चे ग्वेभाराले क्युवाली जनता र विश्वको निम्ति भएका देशभक्तिपूर्ण गतिविधिहरुबाट शिक्षित भई अगाडि बढ्न जरुरी रहेको र नेतृत्वकर्ताहरुले नयाँ पुस्तालाई मार्गनिर्देश्न गर्नुपर्ने धारणा राख्नुभयो ।
नेक्रायुसंघ चितवनका जिल्ला अध्यक्ष ज्ञानेन्द्र चेपाङले देशको समसामयिक राजनीतिक विषयमा आफ्नो धारणा राख्नुहुँदै शासक दलको अदूरर्शिता र अकर्मन्यताले गर्दा देशको स्थिति झन् बिग्रिंदै गएको बताउनुभयो ।
कार्यक्रममा नेमकिपा चितवन जिल्ला समितिका सदस्य सुमित्रा महतोले स्वागत मन्तव्य व्यक्त गर्नुहुँदै कोभिडबाट बच्ने उपाय र रोकथामबारे प्रशिक्षित गर्नुभएको थियो ।
नेक्राकिसंघ चितवनका सदस्य मोहनबहादुर चेपाङले नेमकिपाका पार्टी प्रकाशनहरु मजदुर दैनिक, श्रमिक साप्ताहिकलगायतको अध्ययनबाट कार्यकर्ताहरुको बौद्धिक क्षमता अभिवृद्धि गर्न महत्वपूर्ण भूमिका खेलेको बताउनुभयो ।
कार्यक्रममा आयोजक समितिका उपाअध्यक्ष राजकुमार श्रेष्ठ र नेपाल क्रान्तिकारी विद्यार्थी संघ चितवन जिल्ला सचिव अर्जुन चेपाङले शासक दलले कम्युनिष्टको नाममा जनतालाई ढाँटिरहेको हुँदा जनताहरु सचेत हुनुपर्ने र युवा—विद्यार्थीहरु राजनीतिक रुपमा सचेत र संगठित हुनुपर्नेमा जोड दिनुभयो ।
यसैबीच नेमकिपाका केन्द्रीय सदस्य सुनिल प्रजापतिको प्रमुख आतिथ्यमा रत्ननगरमा विद्यार्थी भेला सम्पन्न भयो । सो भेलाले अर्जुन चेपाङको संयोजकत्वमा ९ सदस्यीय नेपाल क्रान्तिकारी विद्यार्थी संघ पाँचौं जिल्ला सम्मेलन तयारी समिति चितवन गठन भयो ।