ख्वप कलेज अफ लमा कानुन निर्माण प्रक्रियामा कानुन मन्त्रालयको भूमिका विषयक अन्तरक्रिया कार्यक्रम सम्पन्न

भक्तपुर नगरपालिकाद्वारा सञ्चालित ख्वप कलेज अफ ल को आयोजनामा त्यहाँ अध्ययनरत विद्यार्थीबीच ‘कानुन निर्माण प्रक्रियामा कानुन मन्त्रालयको भूमिका’ विषयक अन्तरक्रिया कार्यक्रम बिहीबार सम्पन्न भयो ।

कार्यक्रमको उद्घाटन सत्रमा कलेज व्यवस्थापन समितिका अध्यक्ष एवम् भक्तपुर नगरपालिकाका प्रमुख सुनिल प्रजापतिले संविधान र कानुनले प्रदान गरेको अधिकार क्षेत्रभित्र रही भक्तपुर नगरपालिकाले नीति निर्माण गर्ने, त्यसको कार्यान्वयन गर्ने र व्यापक जनताको हितको निम्ति शिक्षा र स्वास्थ्य जस्ता विषयहरु न्यून शुल्कमा गुणस्तरीय सेवा प्रदान गर्दै आएको प्रष्ट पार्नुभयो ।

संविधानले दिएको एकल अधिकारको प्रयोग गर्दै भक्तपुर नपाले ६७ वटा कानुन निर्माण गरिसकेको अवगत गराउँदै प्रदेश कानुन निर्माणमा ढिलाइ हुँदा स्थानीय तहलाई आफ्नो कार्य सम्पादनमा बाधा पुगिरहेको छ भन्नुभयो ।

संविधानमा धेरै वटा विषयमा ‘प्रदेश कानुनबमोजिम’ भन्ने उल्लेख गरिएको हुँदा स्थानीय तहले कानुन निर्माणको समयमा भोगिरहेको बताउँदै उहाँले कतिपय विषयहरु संघ र प्रदेशहरुले कानुन नबनाएसम्म स्थानीय तह अगाडि बढ्न नसक्ने अवस्थामा पनि रहेको उहाँले प्रष्ट पार्नुभयो ।

कानुन मन्त्रालय नेपालको कानुन तर्जुमा, कानुन संशोधनलगायत न्याय प्रशासनसँग सम्बन्धित कार्यहरु सम्पादन गर्ने महत्वपूर्ण निकाय भएको बताउँदै उहाँले शासकले शासन गर्ने सशक्त हतियारको रुपमा कानुनलाई व्याख्या गर्नुभयो ।

प्रमुख प्रजापतिले शासन सत्ताले आफ्नो अनुकूल कानुन निर्माण गर्ने थलो नै संसद हो र पुँजीवादी व्यवस्थामा अवैध कामलाई वैध बनाउने सामथ्र्य राख्ने थलोको रुपमा संसदलाई लिन सकिन्छ भन्नुभयो ।

राम्रो कानुन निर्माण गर्ने भन्दा पनि कानुनको सफल कार्यान्वयनतर्फ कानुन मन्त्रालयले जोड दिनुपर्ने भन्दै उहाँले देशको सिमाना रक्षाको निम्ति बहस गर्ने अधिवक्ताहरु आवश्यक भएको बताउनुभयो ।

कानुन मन्त्रालयका सचिव उदयराज सापकोटाले कानुनको उल्लंघन दण्डनीय हुने बताउँदै कानुन विषयमा विशेषता हासिल गर्ने विषयले विद्यार्थीले अध्ययन गर्न जरुरी रहेको बताउनुभयो । उहाँले कानुन शिक्षालाई विद्यार्थी जीवनदेखि अध्ययन अध्यापन गर्ने व्यवस्था हुनु जरुरी रहेको बताउँदै खेती योग्य जमिन संरक्षणतर्फ भक्तपुर नगरपालिकाले पहल गर्न आवश्यक भएको बताउनुभयो ।

त्यस्तै ख्वप कलेज अफ लका प्राचार्य अनिता जधारीले कानुन अध्ययरत विद्यार्थीलाई नेपालको महत्वपूर्ण अंग कानुन मन्त्रालयसँग साक्षात्कार गर्ने उद्देश्यले कार्यक्रमको आयोजना भएको बताउादै कानुन मन्त्रालयको महत्व र चुनौतीबारे विद्यार्थीलाई अवगत गराउन उक्त कार्यक्रम फलदायी सावित हुने विश्वास व्यक्त गर्नुभयो ।

उक्त कर्याक्रममा कलेजका शिक्षक मनज ज्याख्वले पनि कार्यक्रमको उद्देश्यमाथि प्रकाश पार्नुभयो ।

उक्त अन्तरक्रिया कार्यक्रममा कानुन मन्त्रालयका उपसचिव, सहसचिव र शाखा अधिकृतले कानुन निर्माण प्रक्रियामा कानुन मन्त्रालयको अनुभवबारे आ–आफ्नो धारणा व्यक्त गर्नुभएको थियो ।