नगर प्रमुख सुनिल प्रजापतिसँग महाकाली नपाका प्रमुख नरसिंह चैंसिरको भेट

भक्तपुर नगरपालिकाका प्रमुख सुनिल प्रजापतिसँग सुदूरपश्चिम प्रदेश दार्चुलाको महाकाली नगरपालिकाका प्रमुख नरसिंह चैंसिरले भेट गर्नुभएको छ । भेटमा उहाँहरुबीच दुई नगरपालिकाको शैक्षिक, पर्यटन, विकासका सम्भावनाका क्षेत्र आदिबारे अनुभव आदानप्रदान भयो ।

नगर प्रमुख प्रजापतिले स्थानीय तहको स्वायत्ततामाथि कहींकतैबाट हुने हस्तक्षेप स्वीकार्य नभएको बताउँदै उहाँले भक्तपु्र नपा स्वायत्तै ढंगले अगाडि बढिरहेको बताउनुभयो ।

बागमती प्रदेशले कानुनबमोजिम प्रदान गर्नुपर्ने विशेष र समपूरक अनुदान समेत भक्तपुर नगरपालिकालाई नदिएको प्रसंग जोड्दै उहाँले भक्तपुर नपाले निर्वाचनको बेला जनताबीच गरेका प्रतिबद्धताअनुसार शिक्षा, स्वास्थ्य, सरसफाइ, सम्पदा संरक्षण, विकास निर्माणलगायतका कार्यहरु गरी जनताको सेवा गरिरहेका बताउनुभयो ।

भक्तपुर नपाले जनताका छोराछोरीलाई सस्तो र गुणस्तरीय शिक्षा प्रदान गर्ने उद्देश्यले विभिन्न शिक्षण संस्थाहरु सञ्चालन, छात्रवृत्ति र शैक्षिक ऋणहरु प्रदान गर्दैै आइरहेको बताउँदै उहाँले विदेशीको सहयोगविना भक्तपुर नपाले आत्मनिर्भर ढंगले यहाँको विकास निर्माण कार्यलाई अगाडि बढाइरहेको छ भन्नुभयो ।

नगर प्रमुख चैंसिरले महाकाली नगरपालिका उच्च हिउँ पर्ने हिमाली क्षेत्रदेखि नदी किनारामा रहेका फाँटहरु समेटिएर बनेको धार्मिक एवम् सांस्कृति हिसाबले पनि महत्वपूर्ण नगरपालिका भएको बताउनुभयो ।

महाकाली नगरपालिका पर्यटनको राम्रो सम्भावना बोकेको ठाउँ भएको बताउँदै उहाँले ¥याफ्टिङ, जडिबुटी, कपडा उद्योग र फलफूल खेतीबाट पनि यहाँको आर्थिक गतिविधि चलायमान भइरहेको बताउनुभयो ।

नगर प्रमुख प्रजापतिले प्रमुख चैंसिरलाई भादगाउँले टोपी र खादाले स्वागत गर्नुभई नगरपालिकाका महत्वपूर्ण प्रकाशनहरु उपहारस्वरुप प्रदान गर्नुभयो । भेटमा भक्तपुर नपाका प्रमुख प्रशासकीय अधिकृत वसन्त भट्टराईको पनि उपस्थिति थियो ।