भक्तपुर नगरपालिकामा धनकुटा नगरपालिकाका उपप्रमुख शकुन्तला बस्नेतलाई स्वागत

भक्तपुर नगरपालिकाका प्रमुख सुनिल प्रजापतिले शनिबार धनकुटा नगरपालिकाका उपप्रमुख शकुन्तला बस्नेतलाई भक्तपुर नगरपालिकामा स्वागत गर्नुभयो । उपप्रमुख बस्नेतको नेतृत्वमा आएको टोलीमा धनकुटा नपाका प्रमुख प्रशासकीय अधिकृत उम्बर रोगु र वरिष्ठ अधिवक्ता कुमार शर्मा आचार्य पनि हुनुहुन्थ्यो ।

भेटमा प्रमुख प्रजापतिले भक्तपुर नगरपालिकाद्वारा सञ्चालित शैक्षिक संस्था र स्वास्थ्य क्षेत्रमा भइरहेको गतिविधिहरुबारे बिस्तृतमा जानकारी गर्नुभयो ।

भक्तपुर नगरपालिका ख्वप विश्वविद्यालय सञ्चालनको तयारी रहेको जानकारी गराउनुहुँदै सस्तोमा गुणस्तरी मेडिकल शिक्षा दिने उद्देश्य नगरपालिकाको रहेको बताउनुभयो । भक्तपुर नगरपालिकाले घरदैलो नर्सिङ सेवा नगरको सबै वडामा प्रभावकारी ढंगमा सञ्चालन गरिरहेको जानकारी गराउनुभयो ।

नगरपालिकाको गतिविधिबारे जनतालाईसुसूचित गर्न भक्तपुर नगरपालिकाले आफ्ना सबै गतिविधिहरु वेभ पेज, फेसबुक फेज र मासिक पत्रिकामार्फत् सार्वजनिक गर्दै आएको र ख्वप एफ.एम. सञ्चालनको तयारी भइरहेको जानकारी गराउनुभयो ।

उपप्रमुख बस्नेतले जनप्रतिनिधिहरुको काममा कर्मचारी प्रशासनको आवश्यक सहयोग पाउन नसकेको गुनासो व्यक्त गर्नुहुँदै संघीय सरकारको औचित्य प्रभावकारी नभएको बताउनुभयो । उहााले निजी कलेज सञ्चालनले गर्दा गरिब जनतालाई आर्थिक भार बढेको र जनताको आधारभूत आवश्यकता प्राप्त गर्न असक्षम भइरहेको बताउनुभयो ।

भेटमा भक्तपुर नगरपालिकाका वडाध्यक्षहरू रबिन्द्र ज्याख्व, महेन्द्र खायमली, प्रेमगोपाल कर्माचार्य, कार्यपालिका सदस्यद्वय सरिना द्योला, सुनिता अवाल र पर्यटक सेवा केन्द्रका प्रमुख गौतमप्रसाद लासिवा पनि उपस्थित हुनुहुन्थ्यो ।