भक्तपुर नपाद्वारा आयोजित आधारभूत तह (कक्षा १ देखि ५) मा अध्यापनरत शिक्षकहरूको विषयगत पाठ्यक्रममा आधारित विद्यार्थी केन्द्रित शिक्षक प्रशिक्षण बुधबारबाट सुरु भएको छ ।
शिक्षकहरुको प्रशिक्षण उद्घाटन कार्यक्रममा बोल्नुहुँदै भक्तपुर नगरपालिकाका प्रमुख सुनिल प्रजापतिले सामुदायिक र संस्थागत विद्यालयको सन्तुलन मिलाएर अगाडि बढेमा एउटै शैक्षिक गुणस्तरीय शिक्षा दिन सकिने विचार व्यक्त गर्नुभयो ।
भक्तपुर नगरभित्रका सामुदायिक आधारभूत विद्यालयहरूमा मन्तेश्वरी सिकाइ प्रविधिको तालिम सञ्चालन गरी अनुगमन समेत भइरहेको र अब नगरपालिकाले स्थानीय पाठ्यक्रमअनुरुप नयाँ पुस्ताका विद्यार्थीहरूलाई आधुनिक प्रविधिसँग जोडेर शिक्षा दिने उद्देश्यले विषयगत तालिमको आवश्यकतालाई जोड दिइरहेको बताउनुभयो ।
नगरभित्रका विद्यालयहरूको शैक्षिक गुणस्तर, विद्यार्थी अनुशासन र शुल्कमा एकरुपता ल्याउने हिसाबले विद्यार्थीहरूलाई व्यवहारिक ज्ञान दिन पाठ्यक्रमको आवश्यकता भएको बताउनुहुँदै प्रमुख प्रजापतिले शिक्षक–शिक्षिकाहरू प्रविधिमैत्री हुनुपर्ने, फरक विशेषता आवश्यक भएको र विद्यार्थीलाई हीनताबोधको भावनाबाट मुक्त पार्न भूमिका खेल्नुपर्ने बताउनुभयो । ‘एक घर एक स्नातक’ को घोषणाले भक्तपुरको शैक्षिक मुहार फेरिएको बताउनुहँुदै प्रमुख प्रजापतिले योग्य र असल नागरिक तयार गर्न शिक्षकहरूले आ–आफ्नो क्षेत्रबाट योगदान पु¥याउनुपर्ने बताउनुभयो ।
भक्तपुर नपा वडा नं. ७ का वडाध्यक्ष तथा कार्यक्रमका संयोजक उकेश कवांले तालिमको उद्देश्यबारे प्रस्ट पार्दै शैक्षिक क्षेत्रलाई नयाँ ढंगले अगाडि बढाउनुपर्नेमा जोड दिनुभयो । उहाँले चैत १३–१४ गणित, १५–१६ अंग्रेजी, १७ गते सामाजिक शिक्षा, १८ गते नेपाली र १९–२० गते विज्ञान विषयको प्रशिक्षण सञ्चालन हुने जानकारी गराउनुभयो ।
नगर शिक्षा अधिकारी मेघनाथ रिमालले पाठ्यक्रमको प्रभावकारी उपयोगको निम्ति भक्तपुर नगरपालिकाले शिक्षक–शिक्षिको तालिमलाई अगाडि सारेको र घोकन्ते शिक्षालाई अब निरुत्साहित गरी विद्यार्थीलाई व्यवहारिक शिक्षा दिनुपर्ने बताउनुभयो । उहाँले विद्यार्थीलाई बोझिलो शिक्षा नभई विद्यार्थीको रुचि र क्षमताअनुसार पढाउनु आवश्यक भएको बताउनुभयो ।
भक्तपुर नपा वडा नं. ९ का वडाध्यक्ष रविन्द्र ज्याख्वले शैक्षिक उन्नतिको निम्ति तालिमको आवश्यकता भएको र भक्तपुर नगरपालिकाको उद्देश्य शिक्षाको उत्कृष्ट गन्तव्य बनाउने रहेको बताउनुभयो ।
