इन्दिरा लाछिमस्युको जीवनमा आधारित फिल्म ‘इन्दिरा धिमे मैचा’ को उद्घाटन

भक्तपुर नगरपालिकाका प्रमुख सुनिल प्रजापतिले पहिलो महिला धिमेवादक इन्दिरा लाछिमस्युको जीवनमा आधारित फिल्म ‘इन्दिरा धिमे मैचा’ को एक समारोहबीच रिबन काटेर उद्घाटन गर्नुभयो । कार्यक्रममा बोल्दै प्रमुख प्रजापतिले ३ दशक अघि महिलाहरुले धिमे, धाँ जस्ता बाजा बजाउन त के छुन समेत नहुने भन्ने परम्परागत चलनविरुद्ध संघर्ष गरेर महिलाहरुलाई धिमेलगायतका बाजा बजाउन उत्साहित गर्नु क्रान्तिकारी कदम हो भन्नुभयो ।

उहाँले सामान्य परिवारमा जन्मेका इन्दिराको जीवनमा आधारित फिल्म बनाएर इन्दिरा र उहाँको परिवारको मात्र होइन भक्तपुरको गौरव बढाएको चर्चा गर्दै ‘धिमे मैंचा’ फिल्मले भक्तपुरको सांस्कृतिक सम्पदाहरुबारे समेत विश्वभर फैलाउने आशा व्यक्त गर्नुभयो । उहाँले फिल्म सफलताका लागि निर्माता, कलाकार सबैका लागि शुभकामना व्यक्त गर्नुभयो र देशका विभिन्न ठाउँका जनता र विश्वका विभिन्न देशमा रहेका नेपालीहरुलाई फिल्म हेरेर सहयोग गर्न आग्रह गर्नुभयो ।

प्रमुख अतिथि प्रजापतिले इन्दिरा लाछिमस्यूलाई दोसल्ला ओढाई सम्मान गर्नुभएको थियो भने कार्यक्रममा उपस्थित सबैलाई मुख्य निर्माता गोपालकृष्ण महर्जनले स्वागत तथा निर्माता सुरेन्द्र तुलाधरले फिल्म निर्माणको उद्देश्यमाथि प्रकाश पार्नुभएको थियो ।

फिल्ममा पहिले महिलाहरुले बाजा बजाएमा समाजले कतिको हेप्ने, अपमान गर्ने र हेयको दृष्टिले हेर्ने गर्थे भन्ने स्पष्ट देखाइएको छ । परिवर्तन ल्याउन रुढीवादी परम्पराविरुद्ध कठोर संघर्ष गर्नुपर्छ भन्ने फिल्मले शिक्षा दिन्छ । २ घण्टासम्म प्रस्तुत फिल्म दर्शकले समय गएको चाल नपाउने किसिमको छ । अधिकांश सुटिङ इन्दिराको निवासस्थान भक्तपुरमै भएको देखिन्छ । फिल्ममा इन्दिराको जीवनसँगै भक्तपुरका सम्पदाहरु पनि प्रष्टै देखाइएको पाइन्छ ।