(भक्तपुर नगरपालिका र शाननान नगरपालिकाबिच २०८२ असोज ४ गते सम्पन्न भगिनी सम्झौता नवीकरण समारोहमा शाननान नगरपालिका नगर स्वास्थ्य उपसमितिका सहसचिव छिमी लाझेन (Qimi Lazhen) को मन्तव्यको सम्पादित अंश)
शाननानमा कुल ६६९ वटा सार्वजनिक स्वास्थ्य संस्थाहरू छन्, जसमा ६ वटा नगरपालिका स्तरका सार्वजनिक स्वास्थ्य संस्थाहरू, ४८ वटा जिल्ला
(काउन्टी, सहर) स्तरका सार्वजनिक स्वास्थ्य संस्थाहरू, ८३ वटा नगर स्वास्थ्य केन्द्रहरू, ५२८ गाउँस्तरका स्वास्थ्य क्लिनिकहरू रहेका छन् । यहाँका सार्वजनिक अस्पतालहरूमा कुल १,५८८ खुला शøयाहरू छन् । यसले सहर, जिल्ला, नगर र गाउँ स्तरलाई समेट्ने चिकित्सा तथा स्वास्थ्य सेवा प्रणाली निर्माण गरेको छ । सहरका सार्वजनिक चिकित्सा संस्थाहरूमा हाल ३,८९५ जना चिकित्सक तथा अन्य स्वास्थ्य प्राविधिकहरू र ३२६ जना वरिष्ठ विशेषज्ञहरू छन् ।
शाननान सहरमा स्वास्थ्य बीमाको सहभागिता दर शत प्रतिशत पुगेको छ । स्वास्थ्य बीमाले आधारभूत चिकित्सा बीमा, गम्भीर रोगको उपचार बीमा, बहिरङ्ग सेवा बीमाजस्ता विभिन्न प्रकारका बीमा समेट्छ । आधारभूत चिकित्सा बीमाले सामान्य रोग, बारम्बार दोहोरिने रोग र जटिल रोगहरूको उपचार खर्च समेट्छ । गम्भीर रोग बीमाले क्यान्सर, मृगौलालगायतका गम्भीर रोग भएका बिरामीहरूका लागि अधिकतम उपचार खर्च प्रदान गर्छ । बहिरङ्ग सेवा बीमाले अस्पताल तथा स्वास्थ्य संस्थाहरूमा बहिरङ्ग उपचारका लागि हुने सबै खर्च प्रदान गर्छ । सरकारले ६५ वर्षभन्दा मुनिका नागरिकहरूका लागि प्रतिव्यक्ति वार्षिक १६४ युयान (चिनियाँ रकम) र ६५ वर्षभन्दा माथिका नागरिकहरूका लागि प्रतिव्यक्ति वार्षिक २०० युयान
(चिनियाँ रकम) लगानी गरेर सबै नागरिकहरूलाई निःशुल्क स्वास्थ्य जाँचको सेवा उपलब्ध गराएको छ ।
केन्द्र सरकारले सिचाङ प्रान्तको स्वास्थ्य उपचार सेवामा प्रविधि तथा जनशक्तिसहितको विशेष सहयोग गर्दछ । चीनका विकसित तीन प्रान्तहरू हुनान, हुपेई र आन्हुइ प्रत्येक वर्ष १०० भन्दा बढी उत्कृष्ट विशेषज्ञ चिकित्सकहरूलाई शाननानका सबै स्तरका स्वास्थ्य एकाइहरूमा सहयोग गर्न पठाउँछन् । यहाँका विशेषज्ञ चिकित्सक तथा स्वास्थ्यकर्मीहरूसँग सहकार्य गर्दै जनताको स्वास्थ्य उपचार सेवालाई सहज र उत्कृष्ट बनाउने प्रयास भइरहेको छ । यहाँको स्वास्थ्य उपचार सेवा र प्राकृतिक हावापानीको कारण पनि जनता कमै मात्र बिरामी हुन्छन् ।