सिलाई व्यवसायले देशको अर्थतन्त्रलाई टेवा पुर्याइरहेको छ ः प्रमुख प्रजापति

भक्तपुर नगरपालिकाका प्रमुख सुनिल प्रजापतिको प्रमुख आतिथ्यमा भक्तपुर टेलरिङ व्यवसायी संघको तेस्रो साधारणसभा तथा अधिवेशन शनिबार सम्पन्न भयो ।

कार्यक्रमको उद्घाटन गर्दै प्रमुख प्रजापतिले सिलाई व्यवसाय सेवा उद्योग हो भन्दै यसले प्रत्यक्ष र परोक्ष रुपमा देशको अर्थतन्त्रलाई टेवा पुर्याइरहेको बताउनुभयो ।

सिलाइ व्यवसायलाई व्यापक रुपमा विकास गर्न सके विदेशिने धेरै रकम जोगाउन सकिने बताउँदै उहाँले देशको रकम बाहिरिनबाट जोगाउन सक्नु देशको आम्दानी बढाउनु हो भन्नुभयो ।

भक्तपुर नगरपालिकाले भक्तपुरमा पाएसम्म बाहिरबाट सामानहरु खरिद नगर्न निर्देशन दिँदै आएको बताउँदै भक्तपुरमा व्यवसाय गर्नेहरुले नगरपालिकालाई केही प्रतिशत कर तिर्नुपर्ने हुँदा व्यवसायीहरुको हितमा नगरपालिकाले विभिन्न कदमहरु चाल्दै आएको बताउनुभयो ।

नेपालमा प्रशस्त तयारी पोशाकहरु विदेशबाट भित्रिन नदिन र नियन्त्रण गर्नेतर्फ सरकारले ध्यान दिएमा हजारौं युवाहरुले सिलाइ व्यवसाय गरेर जीविकोपार्जन गर्न सकिने बताउँदै उहाँले तयारी सामान आयातले नेपाललाई खासै फाइदा नहुने बताउनुभयो ।

नेपालको आर्थिक अवस्था झन् झन् कमजोर हुँदै गएको बताउँदै उहाँले नेपालले कपडा उद्योगमा आत्मनिर्भर बन्न सके देशको अर्थतन्त्रलाई सहयोग पुग्ने बताउनुभयो ।

कार्यक्रममा भक्तपुर टेलरिङ व्यवसायी संघका अध्यक्ष गणेशभक्त गोसाइँले संघ स्थापनाको महत्व र उद्देश्यमाथि प्रकाश पार्दै संघमा आबद्ध सदस्यहरुको हकहितमा काम गर्दै आएको बताउनुभयो ।

नेपाल टेलरिङ व्यवसायी महासंघका अध्यक्ष सदिस श्रेष्ठले सिलाइ व्यवसायीहरुले सिलाइसँगै कपडाको व्यवसायलाई पनि सँगसँगै अगाडि बढाइ उपभोक्ताको मागअनुसारका सामानहरु उत्पादनमा जोड दिन व्यवसायीहरुलाई आग्रह गर्नुभयो ।

कार्यक्रममा नेपाल टेलरिङ व्यवसायी महासंघका वरिष्ठ उपाध्यक्ष राजमान डंगोल, नेपाल टेलरिङ व्यवसायी महासंघका सल्लाहकार वीरमणि बज्राचार्य र उत्तमबहादुर श्रेष्ठ, नेपाल टेलरिङ व्यवसायी महासंघका सदस्य धिपेन्द्र कारञ्चित, भक्तपुर घरेलु तथा साना उद्योग संघका प्रेम कृष्ण खर्बुजा, भक्तपुर च्याम्बर्स अफ कमर्स महिला चेम्बरका अध्यक्ष रीना श्रेष्ठ, काभ्रे टेलरिङ व्यवसाय संघका सुरेश श्रेष्ठ, भक्तपुरका महासचिव सुदिप गणेशले संघ स्थापनाको इतिहास, उद्देश्य र यसका गतिविधिहरुमाथि प्रकाश पार्नुभएको थियो ।

कार्यक्रममा प्रमुख अतिथि प्रजापतिले संघमा आबद्ध टेलरिङ व्यवसायीहरुलाई प्रमाणपत्र वितरण गर्नुभएको थियो ।