भक्तपुर नगरपालिका र शानान नगरपालिकाबीचको सम्बन्ध थप सुदृढ हुने विश्वास
सुनिल प्रजापति, प्रमुख भक्तपुर नगरपालिका
भक्तपुर र चीनको शान—नान नगरबीच मिति २०७३ साउन ३० गते भगिनी सम्बन्ध स्थापना भएको हो । दुई नगरका जनताबीच पर्यटन, संस्कृति, कूटनीतिक सम्बन्धलाई थप बिस्तार गर्ने र सांस्कृतिक, आर्थिक, शैक्षिक, पर्यटन, सहरी विकास र जनताबीच आपसी सहयोग आदानप्रदान गर्ने सहमतिको उद्देश्य थियो ।
नेपाल र चीन दुई छिमेकी देशहरु हुन् । दुई देशबीच युगौंदेखिको पुरानो सम्बन्ध छ । लिच्छविकालीन राजा अंशुबर्मा(बि.सं६६२—६७९)की छोरी भृकुटीको बिवाह तिब्बतका राजा स्रङचङम्पोसँग भएको र नेपाली वास्तुकलाविद् अरनिकोले आजभन्दा साढे सात यस वर्ष अघि(सन्१२७१—१२७९) चीनको राजधानी पेचिङमा बनाएको श्वेत चैत्य दुई देशबीच सम्बन्धका बलिया आधारहरु हुन् । प्राचीन कालदेखिको त्यो सम्बन्धलाई हामी थप बिस्तार गर्न चाहन्छौं । शानान नगरका उपप्रमुखको नेतृत्वमा आएको यो प्रतिनिधि मण्डलले भक्तपुर नगरपालिका र शानान नगरबीचको सम्बन्ध थप बिस्तार हुने हामीले विश्वास लिएका छौं ।
विश्वव्यापी महामारीको रुपमा फैलिएको कोरोना संकटको बेला भक्तपुरका जनताको जीवन रक्षाको निम्ति शानान नगरपालिकाले गरेको सहयोग भक्तपुरबासीहरुले कहिल्यै बिर्सने छैन । उहाँहरुले मिति २०७८ जेठ २८ गते भेन्टिलेटर १ वटा, अक्सिजन कन्सनट्रेटर ३२ वटा, आइसीयु बेड ५० वटा, अक्सिजन सिलिन्डर (४० लिटर) को १०० वटा र २०७९ सालमा भेन्टिलेटर १ वटा, अप्रेसन टेबल १ वटा र अप्रेसनको लिड ओ.टी. लाइट दिएर सहयोग गर्नुभयो । त्यस सहयोगको निम्ति भक्तपुर नगरपालिकाको तर्फबाट शान—नान नपाका उपप्रमुखज्यूमार्फत प्रमुखज्यूलगायत सम्पूर्ण शान्नानबासी जनतालाई हार्दिक धन्यवाद ज्ञापन गर्दछौं । संकटको बेला भक्तपुरबासी जनतालाई सहयोग गरेर उहा“हरुले एक असल मित्रको परिचय दिनुभयो ।
भक्तपुर नगरपालिकाले यहाँको जनताको स्वास्थ्य उपचारको लागि पहिलेदेखि जन स्वास्थ्य केन्द्र सञ्चालन गर्दै आएको थियो । कोरोना महामारीबीच जनस्वास्थ्य केन्द्रलाई २०७८ सालमा ख्वप अस्पताल घोषणा गरी सेवा प्रदान गर्दै आएका छौं । शानान नगरबाट प्राप्त स्वास्थ्य उपकरणहरु पनि ख्वप अस्पतालमा राखेर सेवा प्रदान गर्दैछौं । सीटी स्क्यान र एमआरआई जस्ता आधुनिक स्वास्थ्य उपकरणहरुको अभावमा अझै हामीले सोचेअनुसार जनताको सेवा गर्न सकेका छैनौं । आ.ब. २०७९।८० को १ वर्षमा देशका ७० भन्दा बढी जिल्लाका २ लाख ५३ हजारभन्दा बढी जनताले ख्वप अस्पतालबाट स्वास्थ्य उपचार सेवा प्राप्त गरेको रेकर्ड छ ।
भक्तपुर नगरपालिका नेपाल मजदुर किसान पार्टीका शत प्रतिशत जनप्रतिनिधिहरु निर्वाचित भएको नगर हो । नेपाल मजदुर किसान पार्टी बैज्ञानिक समाजवादलाई विश्वास गर्ने कम्युनिष्ट पार्टी हो । नेपाल मजदुर किसान पार्टीको नेतृत्व नेपालका वरिष्ठ राजनीतिज्ञ का. नारायणमान बिजुक्छेँले गर्दै आउनुभएको छ । जनताको इमान्दारीपूर्वक सेवा हाम्रो एकमात्र हाम्रो उद्देश्य हो । नेपाल मजदुर किसान पार्टी र चिनियाँ कम्युनिष्ट पार्टीबीच राम्रो सम्बन्ध छ । चिनियाँ कम्युनिष्ट पार्टीका नेता तथा सरकारका उच्च पदस्थ पदाधिकारीहरुले पटक पटक भक्तपुरको भ्रमण गर्नुभएको छ । यसले नेपाली जनता र चिनियाँ जनताबीचको सम्बन्ध बिस्तारमा सहयोग पु¥याएको छ ।
२०८० जेठ १७ गते जनवादी गणतन्त्र चीनको स्–छुवान प्रान्तका पार्टी सचिव वाङ स्याओहुईले, २०८० साउन ८ गते चिनियाँ कम्युनिष्ट पार्टीका पोलिटब्युरो सदस्य तथा छोङछिङ नगरपालिकाका पार्टी सचिव युआन चियाच्युनले र २०८० कार्तिक २६ गते चीनको सिन्चाङ (तिब्बत) स्वायत्त क्षेत्रका चिनियाँ कम्युनिष्ट पार्टीका सचिव वाङ च्युङचङले नेपाल मजदुर किसान पार्टीका अध्यक्ष का. नारायणमान बिजुक्छेँ (रोहित)सँग भेट गरी दुई देश र दुई पार्टीबीचको सम्बन्ध विस्तारबारे छलफल गर्नु भयो । त्यस क्रममा उहाँहरुले भक्तपुरको ऐतिहासिक र सांस्कृतिक महत्वका क्षेत्रहरु दरबार क्षेत्र, टौमढी क्षेत्रको अवलोकन भ्रमण गर्नु भएको थियो ।
त्यसैगरी २०८० असार १४ गते जनवादी गणतन्त्र चीनको सान्तोङ प्रान्तको हुआन थाइ नगरपालिकाका प्रतिनिधिमण्डल, २०८० मंसिर ३ गते चिङकाङसाङ नगरपालिकाका ह्वामिङको नेतृत्वमा आएको प्रतिनिधिमण्डललाई पनि भक्तपुर नगरपालिकामा स्वागत गर्ने अवसर प्राप्त भयो । त्यस क्रममा आपसी सहयोगबारे दुई पक्षीय छलफलहरु भए । २०८० मंसिर २६ गते भक्तपुर नगरपालिका र चीनको लसान नगरपालिकाबीच मैत्रीपूर्ण सहकार्य सम्बन्ध स्थापनाको सहमति पत्रमा हस्ताक्षर भयो । दुई नगरबीच आर्थिक, पर्यटन, सांस्कृतिक आदानप्रदान गर्ने सहमतिको उद्देश्य रहेको छ ।
भक्तपुर क्षेत्रफलको हिसाबले देशकै सानो नगरमध्ये एक हो । सांस्कृतिक, ऐतिहासिक र पुरातात्विक दृष्टिले भक्तपुर देशकै महत्वपूर्ण नगर हो । १२ औंदेखि १५ औं शताब्दीसम्म नेपालमण्डलको राजधानी रहेको यो नगर १८ औं शताब्दीसम्म एक स्वतन्त्र राज्य थियो ।
सांस्कृतिक नगर, नाचगानको राजधानी, जीवित संग्रहालयको रुपमा परिचित भक्तपुर नगरको दरबार क्षेत्रलाई सन् १९७९ मा युनेस्कोले विश्व सम्पदा सूचिमा सूचिकृत गरेको थियो । भक्तपुरका दरबार क्षेत्रमा अबस्थित ५५ झ्याल दरवार रहेको र सुनको ढोका, टौमढी क्षेत्रमा अबस्थित ङातापोल्हँ (५तल्ले मन्दिर) र दत्तात्रय क्षेत्रमा रहेको दत्तात्रय मन्दिर काष्ठकला, धातुकला र प्रस्तरकलाका अनुपम नमुनाहरु हुन् । त्यसका अलावा प्राचीन भक्तपुर स्वयम् एक सम्पदा सहर हो । भक्तपुर नगरपालिकाले यसको संरक्षण र सम्बद्र्धन गर्दै आएको छ ।
राजनैतिक हिसाबले १० वटा वडामा विभाजित यो नगरपालिकामा ८० हजार स्थायी बासिन्दाहरु छन् भने त्यतिकै संख्यामा बाहिरबाट आएर बसेका अस्थायी नागरिकहरु पनि छन् । यहाँका अधिकाँश जनताको पेशा कृषि हो । भादगाउँले टोपी, जुजु धौ, माटोको भाँडा, हस्तकला, काष्ठकला, धातुकला, प्रस्तरकला, हाकु पतासी, ताइचीन च्युरा यहाँका प्रमुख उत्पादनहरु हुन् ।
भक्तपुर नगरपालिकाले शिशुस्याहार केन्द्रदेखि कलेजहरु समेत सञ्चालन गरी जनताका छोराछोरीहरुलाई गुणस्तरीय शिक्षा प्रदान गर्दै आएको छ । यस नगरपालिकामा ९२ वटा विद्यालयहरु छन् । ती विद्यालयहरुमा कूल ३५ हजार विद्यार्थीहरु अध्ययनरत छन् । नगरपालिकाले उच्च शिक्षा प्रदान गर्ने २ वटा इन्जिनियरिङ कलेजसहित ७ वटा शैक्षिक संस्थाहरु संचालन गरिरहेको छ । ती कलेजहरुमा कूल ७ हजार विद्यार्थीहरु उच्च शिक्षामा अध्ययनरत छन् ।
भक्तपुर आत्मनिर्भरताको बाटोमा अगाडि बढिरहेको नगरपालिका हो । नेपाल मजदुर किसान पार्टीको नीति र निर्देशनमा रहेर वडा वडामा स्वास्थ्य केन्द्र सञ्चालनदेखि १०० शैय्याको ख्वप अस्पताल सञ्चालन गरेर जनतालाई छिटो छरिटो स्वास्थ्य उपचार सेवा प्रदान गर्दै आएको छ । यस नगरपालिकाभित्र क्यान्सर अस्पताल, सहिद धर्मभक्त राष्ट्रिय अङ्ग प्रत्यारोपन केन्द्र र भक्तपुर अस्पताल गरी चारवटा सरकारी अस्पतालहरुले जनतालाई स्वास्थ्य उपचार सेवा प्रदान गर्दै आएका छन् ।
भक्तपुरलाई पर्यटकीय गन्तव्यको रुपमा विकास गर्न हामी प्रयासरत छौं । नेपाल भ्रमणमा आउने पर्यटकहरुमध्ये करिब २५ प्रतिशत विदेशी पर्यटकहरुले भक्तपुर भ्रमण गर्ने गरेको तथ्याँङ्क छ । एक वर्षमा भक्तपुरमा साढे दुई लाख विदेशी पर्यटकहरुले भ्रमण गरेका थिए । पर्यटकहरुसित केही पर्यटन शुल्क उठाउने गरेका छौं । पर्यटन शुल्कबाट उठेको रकम भक्तपुरका कला संस्कृति संरक्षण, सम्पदा पुनःनिर्माण र जीर्णोद्धार, शिक्षा, स्वास्थ्य उपचार, सरसफाइ र अन्य विकास निर्माणमा खर्च गर्दै आएका छौं । पछिल्लो वर्ष चिनियाँ पर्यटकहरुको नेपाल भ्रमण पनि बढ्दो क्रममा छ । भक्तपुरको रेकर्डले भक्तपुर भ्रमण गर्ने पर्यटकहरुमध्ये चिनियाँहरु तेस्रो स्थानमा पर्छ । गत आ.व. २०८०।८१ मा भक्तपुरमा ४० हजार ४०१ जना चिनियाँहरुले भ्रमण गरेका थिए ।
आजको यस अवसरमा भक्तपुरका जनताको तर्फबाट शानान नगरपालिकाका प्रमुखलगायत तमाम शानानबासी जनतालाई हार्दिक बधाई र शुभकामना दिन चाहन्छौं । यस अवसरमा भक्तपुर नगरपालिका र शानान नगरपालिकाबीच भगिनी सम्बन्धले निरन्तरता पाउने छ । आगामी दिनमा २०७३ साउन ३० गते हस्ताक्षर भएको भगिनी सम्बन्धको सहमति पत्रअनुसार भक्तपुर नगरपालिका र शानान नगरपालिकाबीच समानता र पारस्परिक हितलाई ध्यानमा राखेर अर्थतन्त्र, व्यापार, शिक्षा, स्वास्थ्य, संस्कृति, पर्यटन, हस्तकला, खेलकुदलगायतका क्षेत्रमा सहयोग आदानप्रदानको आशा गर्दछौं ।
नेपाली जनता र चिनियाँ जनताबीचको सम्बन्ध बिस्तारका साथै भक्तपुर नगरपालिका र शानान गरपालिकाबीचको सम्बन्ध थप सुदृढ हुने विश्वास गर्द छौं ।
(भक्तपुर नगरपालिकाको आयोजनामा शाननानका प्रतिनिधिमण्डललाई स्वागत कार्यक्रममा नगर प्रमुख सुनिल प्रजापतिको मन्तव्य)
