शान—नानका प्रतिनिधिमण्डललाई ख्वप अस्पतालमा स्वागत

भक्तपुर नगरपालिकाको भगिनी शहर मित्र राष्ट्र जनगणतन्त्र चीनको सीचाङ (तिब्बत) स्वशासित क्षेत्र, शान—नान शहरका कार्यकारी उपप्रमुख मु योङवन नेतृत्वको प्रतिनिधिमण्डललाई भक्तपुर नगरपालिकाद्वारा सञ्चालित ख्वप अस्पतालमा मंगलबार स्वागत गरिएको छ ।

ख्वप अस्पतालका डाक्टर र चिकित्सकहरुसँगको छलफल कार्यक्रममा बोल्दै भक्तपुर नगरपालिकाका प्रमुख सुनिल प्रजापतिले विश्वव्यापी महामारीको रुपमा फैलिएको कोरोना संकटको समयमा भक्तपुरका जनताको जीवन रक्षाको निम्ति शान—नान नगरपालिकाले गरेको स्वास्थ्य उपकरणहरुको सहयोगको लागि नगरपालिका र नगरबासीहरुको तर्फबाट धन्यवादज्ञापन गर्नुभयो ।

ख्वप अस्पतालले आर्थिक पक्षलाई भन्दा पनि बिरामीहरुको गुणस्तरीय उपचार सेवालाई प्राथमिकतामा राख्दै सेवा प्रवाहमा जोड दिँदै आएको बताउँदै भक्तपुर नपाले समाजवादी नीतिअनुसार जनताको सेवामा समर्पित भइ काम गर्दै आएको बताउनुभयो ।

ख्वप अस्पतालले यस वर्ष सीटी स्क्यान राख्ने योजनाका साथ अगाडि बढिरहेको बताउँदै उहाँले जनतालाई गुणस्तरीय स्वास्थ्य सेवा प्रदान गर्नु अस्पतालको प्रमुख उद्देश्य रहेको बताउनुभयो ।

भक्तपुरका करिब ८० प्रतिशत जनता स्वास्थ्य बीमामा आबद्ध रहेको बताउँदै उहाँले ख्वप अस्पतालको व्यवस्थापन र सञ्चालनमा भक्तपुर नपाले विशेष प्राथमिकतामा राखी जनशक्ति व्यवस्थापन र स्वास्थ्य उपकरण खरिदको लागि आर्थिक सहयोग गर्दै आइरहेको बताउनुभयो ।

ख्वप अस्पताल नगर अस्पताल भए पनि राष्ट्रिय स्तरको सेवा दिने लक्ष्य रहेको उल्लेख गर्दै प्रमुख प्रजापतिले अस्पतालबाट वार्षिक २ लाख ५३ हजारभन्दा बढी बिरामीहरुको सेवा र ७० भन्दा बढी जिल्लाका बिरामीहरुलाई स्वास्थ्य सेवा प्रदान गर्दै आइरहेको जानकारी गराउनुभयो ।

त्यस्तै शान—नान नगरपालिकाका उपप्रमुख मु योङवनले शान—नानको स्वास्थ्य स्थिति र अवस्थाबारे विस्तृतमा जानकारी दिनुहुँदै दुई नगरबीच स्वास्थ्यअन्तर्गत धेरै क्षेत्रमा आपसी समन्वय र सहकार्य गरी अगाडि बढ्न सकिने धारणा राख्नुभयो ।

शान—नानका शत प्रतिशत जनता चीनको केन्द्रीय स्वास्थ्य बीमामा आबद्ध रहेको बताउँदै उपप्रमुख योङवनले चीनको केन्द्र सरकारले पनि शान—नानको स्वास्थ्यलाई विशेष प्राथमिकता दिएको बताउनुभयो । प्रत्येक वर्ष १०० जना विशेषज्ञ डाक्टर शान—नानमा काम गर्न आउने तथ्य पनि उहाँले प्रस्तुत गर्नुभयो ।

शान—नान नगरपालिकाले वडा वडामै जनतालाई स्वास्थ्य उपचार उपलब्ध गराउन जोड दिँदै आएको बताउँदै उहाँले भक्तपुर र शान—नानबीचको सहकार्य आदानप्रदानले महामारी र विपदमा सहयोगी भूमिका खेल्ने बताउनुभयो ।

सोही क्रममा उपप्रमुख योङवनले ख्वप अस्पताल सञ्चालन, व्यवथापन र त्यहााबाट प्रवाहित सेवा सुविधा, स्वास्थय बीमा कार्यक्रमको प्रभावकारिता, चिकितसकहरुलाई प्रोत्साहन, आर्थिक व्यवस्थापन आदिबारे जिज्ञासा राख्नुभएको थियो ।

उक्त कार्यक्रममा अस्पतालका निमित्त मेडिकल डाइरेक्टर मजेशप्रताप मल्लले ख्वप अस्पतालको विगत, वर्तमान र भावी योजनाहरुबारे संक्षेपमा प्रस्तुतीकरण गर्नुभएको थियो ।

ख्वप अस्पतालका निमित्त मेडिकल डाइरेक्टर डा. मजेशप्रताप मल्लसहितले शान—नानका प्रतिनिधिमण्डललाई ख्वप अस्पतालमा स्वागत गर्नुभएको थियो । सोही क्रममा शान—नान प्रतिनिधिमण्डलले ख्वप अस्पतालको विभिन्न शाखा, अन्तरंगत सेवा, अक्सिजन प्लान्ट आदिमा स्थलगत अवलोकन गर्नुभई त्यहाँबाट प्रवाहित सेवासुविधाबारे जानकारी लिनुभयो । ख्वप अस्पतालले वार्षिक १८०० वटा शल्यक्रिया सम्पन्न गरेको, ४०० जनालाई प्रसुती सेवा, आ.व. २०८०।८१ मा ७५७७ वटा सानो सिलिण्डर र २०६७ वटा ठूलो सिलिण्डर गरी जम्मा ९६४४ वटा अक्सिजन सेवा निःशुल्क रुपमा प्रदान गरेको तथ्यांक प्रस्तुत गर्नुभयो । उहाँले घरदैलो नर्सिङ सेवाअन्तर्गत विभिन्न रोगहरुको संकलन गर्ने काम पनि हुँदै आएको बताउनुभयो ।

विशवव्यापी महामारीको रुपमा फैलिएको कोरोना संकटको समयमा भक्तपुर नपाको भगिनी शहर शान—नान शहरले मिति २०७८ जेठ २८ गते भेन्टिलेटर १ वटा, अक्सिजन कन्सनट्रेटर ३२ वटा, आइसीयु बेड ५० वटा, अकिसजन सिलिन्डर (४० लिटर) को १०० वटा र २०७९ सालमा भेन्टिलेटर १ वटा, अप्रेसन टेबल १ वटा र अप्रेसनको लिड ओटी लाइट दिएर सहयोग गरेको थियो ।