शाखा अधिकृतहरुको टोलीले भक्तपुर नपाको अध्ययन भ्रमणमा

भक्तपुर नगरपालिकाका प्रमुख सुनिल प्रजापतिले राष्ट्रसेवक कर्मचारीहरु इमानदार भए जनताले सहज सेवा प्राप्त गर्न सक्ने हुँदा जनताको सेवकको हैसियतले कर्मचारीहरुले आ–आफ्नो जिम्मेवारीमा रही काम गर्नुपर्छ भन्नुभयो ।

नेपाल प्रशासनिक प्रशिक्षण प्रतिष्ठानमा सेवा प्रविष्ट तालिम (Basic Administrative Training) लिइरहेका प्रशिक्षार्थी शाखा अधिकृतहरुको अध्ययन अवलोकनको सिलसिलामा भक्तपुर नगरपालिकामा आयोजित भेटघाट तथा अन्तरक्रिया कार्यक्रममा उक्त विचार व्यक्त गर्नु भएको हो ।

प्रमुख प्रजापतिले संविधान र कानूनले संघीयताको व्यवस्था गरेपनि अझै पनि संघ र प्रदेश सरकारमा बस्नेहरुमा संघीय सोच नभएको कारण देश संघीयताको मर्म अनुसार संचालन हुन नसकेको बताउनुभयो । उहाँले स्थानीय जनताको समस्या सम्बोधन गर्न विशेष अनुदान बढाई सशर्त अनुदान घटाउँदै लानुपर्नेमा उल्टो सशर्त बजेट बढाइएको हुँदा संघ र प्रदेश सरकारले बजेटमार्फत स्थानीय तहलाई नियन्त्रण गर्न खोजेको बताउनुभयो ।

स्थानीय सरकारलाई कर्मचारी भर्नाको अधिकार नहुनु स्थानीय स्वायत्त शासन ऐन, २०५५ भन्दा पनि प्रतिगामी देखिएको जानकारी दिनुहुँदै स–साना योजनाहरु समेत संघ र प्रदेश सरकारले सञ्चालन गर्नु संघीय भावना विपरीत भएको तथा साझा सूची अन्तर्गतका कानूनहरु समयमा नबनाउनु, सम्पदा पुनःनिर्माणको लागि काठको सहज उपलब्ध नहुनु संघीयता कार्यान्वयनका चुनौतीहरु हुन् भन्नुभयो ।

सहभागीहरुको जिज्ञासा मेटाउनुहुँदै प्रमुख प्रजापतिले सम्पदाले भक्तपुरलाई राष्ट्रिय र अन्तर्राष्ट्रिय क्षेत्रमा पहिचान दिने भएकोले भनपाले सम्पदा पुनःनिर्माण अध्ययन, अनुसन्धान र अन्वेषणको आधारमा गर्दै आएको तथा राष्ट्रिय कला संग्रहालय र लाल बैठकलाई प्राचीन मल्लकालीन शैलीमै पुनःनिर्माण गर्ने उद्देश्य नपाको रहेको, भक्तपुर नगरपालिकाले छोटो समयमा स्वास्थ्य सुविधाको सुनिश्चितता गर्न आप्mनै अस्पताल सञ्चालन, स्वास्थ्य केन्द्रहरु, शिशु स्याहार केन्द्रहरु र घरदैलो नर्सिड्ड सेवा लगायतको स्वास्थ्य सेवा प्रवाह तथा नगरवासीहरुलाई निःशुल्क अक्सीजन र रगतको व्यवस्था गर्दै आइरहेको जानकारी दिनुभयो ।

कार्यक्रममा भक्तपुर नपाका प्रमुख प्रशासकीय अधिकृत बसन्त भट्टराई, प्रशासकीय अधिकृत दामोदर सुवाल र लेखा अधिकृत राम सुन्दर सुजखुले आ–आफ्नो अनुभव सुनाउनु भएको थियो भने प्रशिक्षार्थी शाखा अधिकृतहरुले शिक्षा, स्वास्थ्य, सम्पदा संरक्षण, सरसफाइ, विकास निर्माण लगायतमा भक्तपुर नपाले गरिरहेका कार्यहरुबारे विभिन्न जिज्ञासाहरु राख्नुभएको थियो ।