भक्तपुर नगरपालिकाद्वारा संचालित भर्चुअल कक्षा प्रभावकारी हुँदै

नेपाल सरकारले लकडाउन गरेको विषम परिस्थितिमा यसवर्ष एसइइ परीक्षा दिने विद्यार्थीहरुलाई लक्षित गरी भक्तपुर नगरपालिकाले भादगाउँ टेलिभिजन तथा सामाजिक सञ्जालमार्पmत संचालन गरेको भर्चुअल कक्षा अत्यन्त प्रभावकारी रहेको र नगरपालिकाभित्रका मात्र नभई देशैभरिका विभिन्न जिल्लाका विद्यार्थीहरुबाट सकारात्मक प्रतिकृया आएको छ । नगर प्रमुख सुनिल प्रजापतिको अध्यक्षतामा बिहिबार सामाजिक दुरी कायम गरी भर्चुअल कक्षा संचालन गर्ने शिक्षकहरुबीच सम्पन्न समीक्षा बैठकमा सहभागी शिक्षकहरुले आपूmहरुलाई विभिन्न जिल्लाबाट विद्यार्थीहरुले सम्पर्क गरी सल्लाह सुझाव तथा प्रश्नहरु सोध्ने गरेको जानकारी दिनुभयो ।

बैठकमा नगर प्रमुख प्रजापतिले विश्वव्यापी रुपमा फैलिएको कोरोना भाइरस रोग संक्रमणको जोखिमलाई मध्यनजर गरी नेपाल सरकारले सबै परीक्षाहरु स्थगित गर्दा परीक्षाको अन्तिम तयारीमा बसेका विद्यार्थीहरु निराश बनेको चर्चा गर्दै उनीहरुको शैक्षिक भविष्यप्रति नगरपालिका जिम्मेवार भई कक्षा संचालन गरेको स्पष्ट पार्नुभयो ।

पहिलो प्रयास हुँदा निश्चय पनि केही कमी कमजोरी रहेको उल्लेख गर्दै उहाँले नगरपालिकाको अनुरोधलाई स्वीकार गरी चुनौतिका बीचमा पनि कक्षा संचालन गर्न मेहनत गर्नुहुने सबै शिक्षक शिक्षिकाहरुलाई नगरपालिकाको तर्फबाट धन्यवाद ज्ञापन गर्नुभयो ।

उहाँले व्यक्तिगत स्वार्थभन्दा माथि उठेर समग्र नेपाली समाज र देशकै हितका लागि नगरपालिकाले सबैको सुझाव अनुसार कार्य गरिरहेको बताउनुभयो । भक्तपुर नगरपालिकाका कतिपय कार्यहरु अन्यका लागि नमूना र अनुकरणीय भइरहेको उल्लेख गर्दै नगर प्रमुख प्रजापतिले चर्चाको निम्ति भन्दा पनि व्यापक जनताको हितका निम्ति नगरपालिका अघि बढिरहेको प्रष्ट पार्नुभयो ।

लकडाउनको समयमा प्रतिकूल परिस्थितिका बीच जनताको सुविधालाई ध्यानमा राखेर नगरपालिकाले प्रहरी प्रशासनसंग समन्वय गरी अनुमति पत्र वितरण गरेको, तरकारी बजार व्यवस्थापन गरेको, जात्रापर्वलाई औपचारिक ढंगमा मात्र सीमित गर्न जनतालाई आह्वान गरेको उहाँको भनाइ थियो ।
नगर शिक्षा अधिकृत कृष्ण प्रसाद कर्माचार्यले भर्चुअल कक्षा संचालन गर्नाको अवधारणाबारे चर्चा गर्दै यसबाट देशभरिकै विद्यार्थीहरुलाई लाभ पुगेको प्रतिकृया आएको बताउनुभयो ।

बैठकमा बोल्दै शिक्षक ज्ञानसागर प्रजापतिले स्थानीय सरकारको अगुवाइमा भर्चुअल कक्षा शुरु गर्ने भक्तपुर नगरपालिका मात्र रहेको चर्चा गर्दै कक्षाले विद्यार्थीलाई मात्र नभई स्वयं शिक्षकहरुलाई समेत धेरै कुरा सिकाएको बताउनुभयो ।

शिक्षक महेन्द्र गोपाल कर्माचार्यले थोरै समयको तयारीमा सीमित स्रोत साधन र सीमित शैक्षिक जनशक्तिको उपयोग गरी नमूना कार्य गरेकोमा नगरपालिकालाई धन्यवाद दिनुभयो । उहाँले विद्यार्थीहरुको सिर्जनशीलतालाई ध्यानमा राखेर आधुनिक प्रविधिको प्रयोग गरी कक्षा संचालन गर्नुपर्नेमा जोड दिनुभयो ।

अर्का शिक्षक रोशनराज तुइतुईले नगरपालिकाबाट संचालित कक्षाको विश्वसनीयता बढेको बताउनुभयो । उहाँले कक्षाहरुलाई नगरपालिकाको आधिकारिक फेसबुक पेज तथा युट्युव च्यानलमार्फत प्रशारण भए थप प्रभावकारी हुनेमा विश्वास व्यक्त गर्नुभयो ।
शिक्षक हरिप्रसाद ढकालले हाल एसइइ केन्द्रीत विद्यार्थीहरुलाई सचालन गरिरहेको कक्षालाई थप परिस्कृत गरी १० कक्षाभन्दा माथि र तलका विद्यार्थीहरुलाई समेत यही विधिबाट कक्षा संचालन गर्न सकिनेमा जोड दिनुभयो ।

शिक्षक कृष्ण बहादुर प्रजापतिले कोरोना भाइरस रोगका कारण लामो समयसम्म विद्यालय संचालन नहुने स्थिति सिर्जना भएमा विद्यालय तहका सबै विद्यार्थीहरुलाई लक्षित गरी वैकल्पिक शिक्षण विधि तयार गर्न सुझाव दिनुभयो ।

बैठकमा शिक्षक गंगादत्त भट्ट, एनबी खाताखो, रत्नप्रसाद फैजू, बीजेन्द्रवीर कर्माचार्य, मंगलेश्वर ध्वजू, पुजा शाक्य, नविन्द्रलाल कर्माचार्य लगायतले विद्यार्थीहरुलाई आकर्षित गर्न प्रविधिको अधिकतम् प्रयोग गरी कक्षा संचालन गर्नुपर्ने सुझाव दिनुभयो । उहाँहरुले विद्यार्थीका लागि कक्षा बोझ नभई खेलको रुपमा मनोरञ्जन लिंदै सिकाउने विधि प्रयोग गर्न पाए थप प्रभावकारी हुने धारणा राख्नुभयो ।

नगरपालिकाले एसइइ परीक्षा दिने विद्यार्थीहरुलाई लक्षित गरी यही २०७७ बैशाख ३ गतेबाट भादगाउँ टेलिभिजन मार्फत प्रत्येक दिन साँझ ५ बजेदेखि ८ बजेसम्म भर्चुअल कक्षा शुरु गरेको थियो । विहिबारसम्म अंग्रेजी विषयको १० वटा, नेपाली विषयको ११ वटा र सामाजिक विषयको १४ वटा कक्षाहरु प्रशारण भएको नगर शिक्षा अधिकृत कर्माचार्यले जानकारी दिनुभयो । उहाँका अनुसार यस अवधिमा विज्ञान विषयको १३ वटा, गणित विषयको १३ वटा, स्वास्थ्य जनसंख्या तथा वातावरण विषयको २ वटा र लेखा विषयको १ वटा गरी जम्मा ६४ वटा कक्षाहरु प्रशारण भइसकेका छन् । विद्यार्थीहरुले टेलिभिजन बाहेक फेसबुक, युट्युवलगायतका सामाजिक सञ्जालहरुमार्फत आप्mनो अनुकूल समयमा ती कक्षाहरु हेर्न र पढ्न सकिने व्यवस्था गरिएको उहाँले बताउनुभयो ।