भक्तपुर नगरपालिकाका मेयर सुनिल प्रजापतिले विद्यमान सरकारी र निजी विद्यालयकै कारण सामुदायिक विद्यालयको स्तर खस्किएको बताउनुभयाे ।
भक्तपुरको राममन्दिरस्थित शान्ति निकेतन माविको स्वर्ण जयन्तीको अवसरमा आयोजित कार्यक्रममा मेयर प्रजापतिले शिक्षा नीतिको कमजोरीको कारण सरकारी स्कूलहरु झन्झन् बिँग्रदै ग्एको बताउनुभयाे ।
मेयर प्रजापतिले शिक्षा नीतिकै कारण निजी लगानीमा सञ्चालित स्कूलहरु फस्टाउँदै गएको र निजी विद्यालयका सञ्चालकहरु बलिया हुँदै गएको जनाउँनुहुँदै शिक्षाले समानता ल्याउनुपर्नेमा देशमा विद्यमान व्यवस्थाको कारण दुई प्रकारका नागरिक तयार हुँदै गएको पनि बताउनुभयाे ।
‘घाम एउटै, पानी एउटै तर शिक्षा किन फरक भो ? यहाँ हुँदा खानेले पढ्ने र हुने खानेले पढ्ने स्कुल फरक छ ।’ मेयर प्रजापतिले भद्दनुभयाे, ‘एउटा शिक्षाले मालिक बन्ने, अर्कोले खरिदार बन्ने शिक्षा दिइरहेको छ, यो सबै हुनुको कारण शिक्षा नीतिकै कमजोरी हो ।’
कार्यक्रममा मेयर प्रजापतिले शिक्षासँगै सन्तानलाई संस्कार दिन जरुरी रहेको बताउँदै संस्कार दिनका लागि अभिभावक वर्ग नै सचेत र सजग हुन जरुरी रहेकोमा जोड दिनुभयाे ।
कार्यक्रममा शिक्षा विकास तथा समन्वय इकाइका प्रमुख खेमराज पोखरेलले भक्तपुरका केही राम्रा सामुदायिक विद्यालयले शिक्षामा गरेको प्रगतिले सामुदायिक विद्यालयको साख जोगिएको बताउनुहुँदै भक्तपुरमा बढ्दो अस्थायी बसोबासले विद्यालयहरुमा ड्रप आउटको समस्या देखिन थालेको बताउनुभयाे ।
कार्यक्रममा विद्यालयका प्रधानाध्यापक महेन्द्रगोपाल कर्माचार्यले विद्यालयले शैक्षिक क्षेत्रमा गरिरहेको प्रयास, अभ्यास र शिक्षा क्षेत्रमा पाएको उपलब्धि तथा सफलताबारेमा जानकारी दिँदै विद्यालयलाई अझ प्रभावकारी तवरले सञ्चालन गर्ने योजना रहेको बताउनुभयाे ।
विद्यालयले सोही अवसरमा शैक्षिक सत्र २०७६ का वर्ष अभिभावकको रुपमा सानुमाया तामाङ र वर्ष विद्यार्थीका रुपमा विवेकलाई सम्मान गरेको छ ।
विद्यालयको स्वर्ण जयन्तीको अवसरमा आयाेजित निबन्ध प्रतियोगिता तथा स्थानीय खेल कसिमला पायँ खेलका उत्कृष्ट विद्यार्थीलाई सोही अवसरमा पुरस्कार प्रदान गरिएको थियो ।
सोही अवसरमा शान्ति निकेतन मावि पूर्व विद्यार्थी समाजले विद्यालयका पूर्व प्रधानाध्यापकद्वय रमालक्ष्मी प्रजापति र मिनाक्षीलक्ष्मी प्रजापति, शिक्षकहरु धनञ्जय शर्मा, बालमुकुन्द श्रेष्ठ, धर्तीमाया सुजखु, सविना किबाछें, चन्द्रकान्त प्रजापति, ज्योति प्रजापति, महेश प्रजापति, सीताराम प्रजापति र रामद्वारिका साखलाई दोसल्ला ओढाएर सम्मान पत्रका साथ सम्मान गरिएको थियो ।
