सिद्धपोखरीको उत्तरतर्फको खेलमैदानमा सरसफाइ सम्पन्न

भक्तपुर नगरपालिकाको आयोजनामा मिति २०७६ कार्तिक १७ देखि २३ गते सम्म हुन गईरहेको भक्तपुर नगरव्यापी विद्यालय स्तरीय खेलकुद प्रतियोगिता हुने स्थलहरु मध्येको सिद्धपोखरीको उत्तरपट्टिको खेल मैदानको सरसफाइ कार्यक्रम शुक्रबार सम्पन्न भयो ।

सरसफाइ कार्यक्रममा बोल्नुहुँदै प्रमुख अतिथि भक्तपुर नगरपालिकाका उपप्रमुख रजनी जोशीले नपाले आयोजना गर्न गइरहेको खेलकुदलाई महोत्सवको रुपमा मनाउनुपर्ने बताउनुभयो । भक्तपुर नगरलाई शिक्षित, स्वस्थ र खेलकुदमा अग्रसर नगरको रुपमा परिचित गराउन सबैले आ–आफ्नो तर्फबाट सहभागिता र सहयोगको लागि उहाँले आव्हान गर्नुभयो ।

भक्तपुर नगरपालिकाको सरसफाइ कार्यक्रममा विद्यार्थीहरुलाई सहभागी गराउनुको मुख्य उद्देश्य सरसफाइ, अनुसन्धान, सम्पदा संरक्षण लगायतका कार्यहरु नयाँ पुस्तालाई हस्तान्तरण गर्दै भविष्यसम्म निरन्तरताको लागि हो भन्नुहुँदै उहाँले समाजको सकारात्मक परिवर्तनको लागि सबैले हात्तेमालो गर्दै सिङ्गो देशको विकासको लागि नपाले अनुकरणीय कार्यहरु गर्दै जानुपर्ने बताउनुभयो ।

कार्यक्रममा भक्तपुर न.पा. वडा नं. ९ का वडाध्यक्ष रबिन्द्र ज्याख्वले नियमित सरसफाइ कार्यक्रमलाई जनप्रतिनिधि,कर्मचारीहरु, स्थानीय समाजसेवी र संघसंस्थाहरुले साझा जिम्मेवारी दायित्वको रुपमा लिनुपर्ने बताउनुहुँदै सरसफाइलाई प्रचारमुखी भन्दा पनि “आफ्नो ठाउँ आफै सफा गरौं” भन्ने भावनाले गर्नुपर्ने बताउनुभयो ।

उहाँले नेपाल मजदुर किसान पार्टीका अध्यक्ष नारायणमान विजुक्छेंज्यूको प्रमुख आतिथ्यतामा मिति २०७६ कार्तिक १७ देखि २३ सम्म हुन गईरहेको भक्तपुर नगरव्यापी विद्यालय स्तरीय खेलकुद प्रतियोगिताको मिति २०७६ कार्तिक १७ गते विहान ७ः०० बजे हुने उद्घाटन र्‍यालीमा उपस्थितिको लागि अनुरोध गर्नुहुँदै सो प्रतियोगितामा १४ विधामा खेलकुद प्रतियोगिता हुने जानकारी गराउनुभयो ।
कार्यक्रममा भक्तपुर नपा वडा नं. १ का वडाध्यक्ष श्यामकृष्ण खत्री र समाजसेवी लक्ष्मी नारायण राजलवटले पनि बोल्नुभएको थियो ।