भक्तपुर नगरपालिकाको आयोजनामा चार दिने विपद् व्यवस्थापन तालिमको समापन कार्यक्रम एक समारोहबीच भक्तपुर नगरपालिकाका प्रमुख सुनिल प्रजापतिको प्रमुख आतिथ्यतामा वडा नं १ कार्यालयको सभाहलमा शनिवार सम्पन्न भयो ।
कार्यक्रममा प्रमुख अतिथि सुनिल प्रजापतिले तालिम लिएकाहरुले डराएर होइन साहसपूर्वक काम गर्नुपर्ने बताउनुभयो ।
उहाँले हाम्रो सुरक्षा हामी आफैले गर्ने हो र आत्मरक्षा गरी विपद्मा आफू नबचे अरुको उद्धार गर्न नसक्ने बताउनुभयो । उहाँले भन्नुभयो — ‘तालिम प्राप्त गरी जनताको सेवा गर्ने हो, उद्धार भनेकै सेवा हो । उद्धारमा आफ्नो ज्यान पनि जान सक्छ र त्यसको मुल्याङ्कन जनताले गर्नेछ ।’
तालिमको प्रमाणपत्र भन्दा उद्धार गरी जनताबाट अनुमोदित प्रमाण पत्र महत्वपूर्ण हुनेछ । तर परिवारका र सम्पत्तिको वेवास्ता गरी उद्धार गर्नु ठुलो कुरा हो — उहाँले भन्नुभयो
बिपदमा सम्पदा जोगाउने कार्य महत्वपूर्ण भएको बताउनुहुँदै फ्रान्सको ८०० वर्ष पुरानो चर्च आगजनीको उदाहरण प्रस्तुत गर्नुभयो । उहाँले सामान्य घटनाले ठूलो क्षति हुने भएकोले सम्पदा जोगाउनेमा ध्यान दिनुपर्ने बताउनुभयो ।
कार्यक्रममा प्रमुख सेनानी शिवप्रसाद पौडेलले बिकास, स्वास्थ्य र शिक्षा सबै आयाम कभर हुने गरी कार्य गरेको भक्तपुर नगरपालिकाले विपद्मा पनि उद्दार गर्न तालिम दिएकोमा खुसि व्यक्त गर्दै विपद्मा तुरुन्तै उद्दार गर्न आधारभूत तालिम महत्वपूर्ण छ भन्नुभयो ।
उहाँले भक्तपुरमा दमकल नछिर्ने स्थानहरुको लागि पोखरीबाट पाईप लगेर आगलागीबाट बचाउने उपाय नगरपालिकाले गर्नुपर्ने बताउनुभयो ।
कार्यक्रममा प्रहरी उपरिक्षक सबिन प्रधानले स्वर्ण समयमा उद्दार गर्न सके विपद्मा धेरैको ज्यान जोगाउन सक्ने बताउँदै उद्दारमा समुदायको नै पहिलो हात हुन बताउनु भयो । उहाँले ज्ञान र सीपले उद्दार गर्दा मासिसको ज्यान जोगाउन सक्ने तर ज्ञान र शीप विना उद्दार गरे जोखिममा पर्ने बताउनु भयो ।
कार्यक्रममा सशस्त्रका प्रहरी उपरीक्षक रमेशसिं ठकुरीले विपद्मा एकजुट भई उद्दार गर्नु पर्ने बताउनुभयो ।
कार्यक्रममा उपप्रमुख रजनी जोशीले स्वागत र वडाध्यक्ष श्याम खत्रीले उद्घोषण गर्नुभएको थियो भने प्रशिक्षार्थी बलराम न्हिसुतुले पनि बोल्नुभएको थियो । प्रमुख सुनिल प्रजातिले प्रशिक्षार्थीहरुलाई प्रमाणपत्र वितरण गर्नुभएको थियो ।
