भनपा प्रमुख सुनिल प्रजापति र नेपाल ल क्याम्पसका क्याम्पस प्रमुख डा‍. डी.एन‍ पराजुलीबीच भेट

भक्तपुर नगरपालिकाका नगर प्रमुख सुनिल प्रजापति र नेपाल ल क्याम्पसका क्याम्पस प्रमुख डा. डी.एन. पराजुलीबीच बुधबार नगरपालिकाको सभाकक्षमा भेटघाट तथा छलफल भयो ।

भेटमा प्रमुख प्रजापतिले भक्तपुर नगरपालिकाले शिक्षा र स्वास्थ्यलाई प्राथमिकतामा राखेर काम गरिरहेको बताउनुभयो । उहाँले नगरपालिकाको तर्फबाट मौलिक शैलीमा मठ मन्दिर र निजी घरहरु निर्माणमा जोड दिइरहेको बताउनुहुँदै नेपाल ल कलेज भवन निर्माणमा प्राविधिक सहयोगको लागि आग्रह गर्नुभएकोमा आफूहरु सकारात्मक भएको बताउनुभयो ।

प्रमुख प्रजापतिले भक्तपुर नगरपालिकाले पुनःनिर्माणका कार्यहरु स्थानीय जनताको सहभागितामा उपभोक्ता समितिमार्फत् गरिरहेको बताउनुभयो । उहाँले भक्तपुरलाई सांस्कृतिक र ज्ञानविज्ञानको केन्द्रको रुपमा विकास गर्ने लक्ष्य नगरपालिकाको रहेको बताउनुभयो ।
क्याम्पस प्रमुख पराजुलीले नेपाल ल क्याम्पसको नयाँ भवन भक्तपुरको मौलिक शैलीमा निर्माण गर्न भक्तपुर नगरपालिकाको तर्फबाट भवनको डिजाइन बनाउन र प्राविधिक सहयोगको लागि अनुरोध गर्नुभयो । भक्तपुर नगरपालिकाका प्राचीन सम्पदाहरु अतुलनीय रहेको बताउँदै क्याम्पस प्रमुख पराजुलीले नगरपालिकाको तर्फबाट भवन निर्माणको लागि आवश्यक प्राविधिक सहयोग पाउनेमा विश्वास व्यक्त गर्नुभयो ।