पूर्ण स्तानपान प्रवद्र्धनका लागि आयुर्वेदसम्बन्धी अभिमुखीकरण

आर्युवेद तथा वैकल्पिक चिकित्सालय भक्तपुरको आयोजनामा पूर्ण स्तानपान प्रवद्र्धनका लागि आमा समूह र स्वास्थ्यकर्मीहरुलाई आयुर्वेदसम्बन्धी अभिमुखीकरण कार्यक्रम मंगलबार भक्तपुर नपाको सभाकक्षमा सम्पन्न भयो ।

कार्यक्रममा बोल्दै नगर प्रमुख प्रजापतिले शिशुको शारीरिक एवम् मानसिक विकासमा स्तनपानले महत्वपूर्ण भूमिका खेल्ने बताउँदै बजारमा पाइने विभिन्न प्रकारका पाउडर दुध आमाको दुधजस्तो पोषिलो नहुने बताउनुभयो ।

उहाँले पाउडर दुध निकै खर्चिलो भएको बताउँदै सरकारले आयुर्वेद क्षेत्रलाई प्राथमिकतामा राख्नुपर्नेमा जोड दिनुभयो ।

नेपाली जडीबुटीको सदुपयोग र संरक्षण गर्न पनि आर्युवेदलाई सरकारले उच्च प्राथमिकतामा राख्नुपर्ने बताउँदै उहाँले स्वदेशमै उत्पादित जडीबुटीबाट आयुर्वेदिक औषधी उत्पादन गरी त्यसको व्यवस्थापन र बजारीकरण गर्दै देशलाई आत्मनिर्भरताको बाटोतर्फ लान सकिने धारणा राख्नुभयो ।

स्वास्थ्य क्षेत्रमा व्यापक भ्रष्टाचार हुने गरेको बताउँदै उहाँले युवा विद्यार्थीहरुमा स्वयम्सेवी भावनाको विकास गराउनुपर्ने र सेवा दिने विषयमा स्वस्थ प्रतिस्पर्धा हुनु आवश्यक रहेको बताउनुभयो ।

कार्यक्रममा भक्तपुर नगरपालिकाका उपप्रमुख रजनी जोशीले प्राचिनकालदेखि प्रचलनमा आएको आयुर्वेदको विकास मानव विकासको यात्राभन्दा अगाडिदेखि भएको बताउँदै यसको प्रवद्र्धनमा सरकारले ध्यान दिनुपर्ने बताउनुभयो ।

कार्यक्रममा भक्तपुर नगरपालिका स्वास्थ्य शाखा प्रमुख डा. रत्नसुन्दर लासिवाले स्तनपानले आमा र शिशुको स्वास्थ्य सुधारमा महत्वपूर्ण भूमिका खेल्ने बताउँदै बाल्यकालमा पर्याप्त रुपमा आमाको दूध खान नपाएका बच्चाहरु तुलनात्मक रुपमा रोगी हुने गरेको बताउनुभयो ।

जिल्ला आर्युवेद स्वास्थ्य कार्यालय भक्तपुरका प्रमुख डा. नदन कँडेलले स्तनपान र आयुर्वेदिक उपचारबारे प्रस्तुतीकरण दिँदै गर्भधारणको प्रक्रियासँग आमाको स्तनमा दुध बन्ने प्रक्रिया सुरु हुने बताउँदै उहाँले पहिलो बिगौते दुध बच्चाको लागि अमृत सम्मान हुने र त्यसले बच्चाको रोग प्रतिराधात्मक क्षमता पनि बढाउने बताउनुभयो ।

अभिमुखीकरण कार्यक्रममा ख्वप अस्पतालका वडा नर्स र विभिन्न खोप केन्द्रका प्रतिनिधिहरुको उपस्थिति रहेको थियो ।