भक्तपुर नगरपालिकाका प्रमुख सुनिल प्रजापतिले बालबालिकाहरु देशको सम्पत्ति भएकाले सन्तानहरु राम्रो भएन भने जतिसुुकै सम्पत्ति भए पनि त्यसको कुनै अर्थ हुँदैन भन्नुभयो ।
प्रमुख प्रजापतिले हिमालय इ·लिश सेकेण्डरी स्कूलको ३० औं वार्षिक जयन्ती तथा पुरस्कार वितरण कार्यक्रममा प्रमुख अतिथिको आसनबाट बोल्दै सबै सन्तानहरुलाई अविभावकहरुले समान शिक्षा दिनुपर्ने बताउनुभयो ।
उहाँले विद्यालय र कलेजमा अध्ययन गर्ने विद्यार्थीहरुमा छात्राको बढ्दो संख्याले अबको केही वर्ष पछि हरेक क्षेत्रमा महिलाहरुको संख्या बढ्ने बताउँदै अध्ययन पैसा कमाउनको लागि नभइ असल नागरिक बन्न र समाज सेवाको लागि हुनुपर्छ भन्नुभयो ।
शिक्षा विना व्यक्ति, संस्था, समाज कोही पनि अगाडि बढ्न सक्दैन भन्दै उहाँले निःशुल्क शिक्षाको व्यवस्था भए जनताले महंगो शिक्षण शुल्क तिरेर पढाउनुपर्ने अवस्था नहुने बताउनुभयो ।
कार्यक्रममा भक्तपुर नगरपालिका वडा नं. ६ का वडाध्यक्ष हरिराम सुवालले विद्यार्थीहरुले स्वदेशमै अध्ययन गरी उच्च शिक्षा हासिल गरी कुनै न कुनै विषयमा विशेषज्ञता हासिल गरी देश र जनताको सेवा गर्न अभिप्रेरित हुनुपर्ने चर्चा गर्नुभयो ।
कार्यक्रममा विद्यालयका प्रधानाध्यापक शिवकुमार कोजूले विद्यालयले पुस्तकको ज्ञानसँगै व्यवहारिक र नैतिक शिक्षा पनि सिकाइ रहेको बताउँदै शिक्षकहरुको मेहनत र परिश्रमनै सफलताको आधार हो भन्नुभयो ।
कार्यक्रममा विद्यालय व्यवस्थापन समितिका अध्यक्ष शम्भो चरण राजभण्डारी र शिक्षिका सुलोचना दुवालले पनि बोल्नुभएको थियो ।
कार्यक्रमका प्रमुख अतिथि प्रजापतिले विद्यालयबाट एसईई २०८० परीक्षा उत्तीर्ण तथा एसईई २०८१ मा समावेश भएका विद्यार्थीहरुलाई प्रमाण पत्र तथा मायाको चिनो वितरण गर्नुभएको थियो भने कार्यक्रमको बीच बीचमा साँस्कृतिक प्रस्तुतीहरु पनि गरिएको थियो । साथै कार्यक्रममा अतिथिहरुले विद्यालयद्वारा वर्षभरी आयोजित विभिन्न प्रतियोगिताहरुमा विजयी विद्यार्थीहरुलाई पुरस्कार तथा प्रमाणपत्र वितरण गरिएको थियो ।
