नगर प्रमुख प्रजापतिद्वारा नविन आधारभूत विद्यालयको ४४ औं वार्षिकोत्सव कार्यक्रम उद्घाटन

भक्तपुर नगरपालिकाका प्रमुख सुनिल प्रजापतिले भक्तपुर नपा वडा नं. ७ गोल्मढीस्थित नविन आधारभूत विद्यालयको ४४ औं वार्षिकोत्सव कार्यक्रम, पुरस्कार वितरण तथा सांस्कृतिक कार्यक्रमको आज उद्घाटन गर्नुभयो ।

कार्यक्रममा बोल्दै प्रमुख प्रजापतिले समाजवादी देशमा बालबालिका पढ्ने विद्यालयहरुलाई ‘केटाकेटीको दरबार’ भनिने बताउँदै विद्यार्थीको शैक्षिक जग मजबुत र बलियो बनाउन गुणस्तरीय शिक्षा आजको आवश्यकता हो भन्नुभयो ।

भक्तपुरको सामुदायिक विद्यालयहरुको स्तरोन्नति र विकासमा भक्तपुर नगरपालिकाबाट सम्भव हुने सबै किसिमको सहयोग गर्न प्रतिबद्ध रहेको बताउँदै उहाँले ४४ वर्षअघि स्थापना भएको नवीन आधारभूत विद्यालयले देश र समाजप्रति उत्तरदायी जनशक्ति उत्पादन गरिसकेको बताउनुभयो ।

प्रमुख प्रजापतिले विद्यालयस्तरबाट सिकाइने अनुशासन विद्यार्थीहरुले जीवनभर अंगीकार गर्ने बताउँदै विद्यार्थीलाई शिक्षित सँगै अनुशासित बनाउने दायित्व शिक्षक र अभिभावकहरुको हो भन्नुभयो ।

विद्यार्थीहरुमा आफ्नो काम आफै गर्ने स्वयम्सेवी भावनाको विकास गर्नुपर्ने आवश्यकता औंल्याउँदै उहाँले भक्तपुर नपाले गरिब तथा जेहेनदार विद्यार्थीहरुलाई प्रदान गर्दै आएको शैक्षिक ऋण र छात्रवृत्ति कार्यक्रमले धेरै विद्यार्थीहरु शिक्षित र दिक्षित हुने अवसर मिलेको बताउनुभयो ।

नविन आधारभूत विद्यालय व्यवस्थापन समितिका अध्यक्ष एवम् भक्तपुर नपा वडा नं. ७ का वडाध्यक्ष उकेश कवांले विद्यालय समाज रुपान्तरण गर्ने प्रारम्भिक थलो भएको बताउँदै विद्यालयका शिक्षकहरु समाज निर्माता हुन् भननुभयो ।

देशको भविष्य बालबालिकामा निहित हुने बाउँदै उहाँले बालबालिकालाई योग्य र सक्षम बनाउन सके देशको विकासमा पनि सकारात्मक प्रभाव पार्ने बताउनुभयो ।

आधारभूत विद्यालय समितिका अध्यक्ष सूर्यबहादुर फोँजुले भक्तपुरका सामुदायिक विद्यालयहरुले सीमित स्रोतसाधनबीच पनि विद्यार्थीहरुलाई गुणस्तरीय शिक्षा प्रदान गर्न निजी शिक्षकको व्यवस्था गरी पठनपाठन गर्दै आएको बताउँदै विद्यालयको आयोजनामा हुने खेलकुद र सांस्कृतिक गतिविधिले उनीहरुको प्रतिभा उजागर गर्न मद्दत पु¥याइरहेको बताउनुभयो ।

नवीन आधारभूत विद्यालयका प्रअ प्रकाश गोसाईले विद्यालयको प्रगति प्रतिवेदन र भावी योजनाहरु प्रस्तुत गर्दै हाल नविन स्कूलमा २१७ जना विद्यार्थीहरु अध्ययनरत रहेको र नविन आ.वि.लाई माध्यमिक विद्यालय बनाउने दीर्घकालीन उद्देश्यले काम गर्दै आइरहेको बताउनुभयो ।

कार्यक्रममा शिक्षिका शोभा कवांले स्वागत मन्तव्य र शिक्षिका सरु दुवालले धन्यवादज्ञापन मन्तव्य राख्नुभएको थियो भने शिक्षिकाद्वय कृतिका श्रेष्ठ र करुणा सुवालले पनि बोल्नुभएको थियो ।

कार्यक्रमका प्रमुख अतिथि तथा अतिथिहरुले अवकाश प्राप्त शिक्षकलाई सम्मान तथा बिदाइ, विद्यालय व्यवस्थापन समितिका पदाधिकारीहरुलाई प्रमाणपत्र वितरण तथा विभिन्न क्रियाकलापमा विजेता विद्यार्थीहरुलाई पुरस्कार वितरण गरेको थियो ।