नेपाल मजदुर किसान पार्टीको ५१ औं स्थापना दिवसको अवसरमा प्रशिक्षण

नेपाल नगरपालिका कर्मचारी एशोसियसन भक्तपुर नगरपालिका समिति र नेपाल कर्मचारी समाज केन्द्रीय समितिको आयोजनामा नेपाल मजदुर किसान पार्टीको ५१ औं स्थापना दिवसको अवसरमा बुधबार प्रशिक्षण एवम् प्रवचन कार्यक्रम सम्पन्न भयो ।

कार्यक्रमका प्रमुख अतिथि नेपाल मजदुर किसान पार्टीका संघीय सांसद प्रेम सुवालले नेपाल मजदुर किसान पार्टी स्थापनाको मुख्य उद्देश्य भनेकै राजनीतिलाई निःस्वार्थ रुपले जनताको हितमा अगाडि बढाउनु हो भन्नुभयो ।

जनतालाई राजनीतिक रुपमा सचेत र संगठित गरी उत्पादनका मुख्य मुख्य साधन, स्रोत र सेवा सामाजिकीकरण गरी समाजवाद हुँदै साम्यवादमा पुग्ने पार्टीको दीर्घकालीन लक्ष्य भएको बताउँदै उहाँले देशको सार्वभौमिकता, भूअखण्डता र स्वाधिताको निम्ति संघर्षरत नेमकिपाले कामदार वर्गका जनतालाई सचेत र संगठित गर्ने काम गर्दै आएको बताउनुभयो ।

युवालाई विदेश पठाएर रेमिट्यान्स भित्र्याएर धनी बन्ने सोच राख्ने सरकार नेपाली जनताप्रति जवाफदेही हुन नसकेको बताउँदै उहाँले नेमकिपाले देशको सार्वभौमिकता रक्षा र सीमा सुरक्षाको विषयमा संसद र सदमा आफ्नो आवाज बुलन्द पार्दै आएको स्पष्ट पार्नुभयो ।

राजनीतिक संकट र अस्थिरतामा नेमकिपाले खेल्दै आएको भूमिकाबारे मनन् गर्न सकेको भए देश आर्थिक र सामाजिक रुपमा धेरै माथि उठ्ने उहाँले बताउनुभयो ।

संयुक्त राज्य अमेरिकाले हतियार उत्पादन र बिक्री गरी आम्दानी गर्ने र सार्वभौम राष्ट्रहरुलाई थिचोमिचो गरी कब्जा गर्ने अमेरिकी साम्राज्यवादको नीति भएको बताउँदै अमेरिकी साम्राज्यवादले सार्वभौम राष्ट्र क्यृुवा र प्रजग कोरियालाई हालसम्म पनि नाकाबन्दी गरी दुःख दिँदै आएको बताउनुभयो ।

नेमकिपाका केन्द्रीय सदस्य एवम् भक्तपुर नगरपालिकाका प्रमुख सुनिल प्रजापतिले नेपाल मजदुर किसान पार्टीले प्रत्येक वर्ष माघ १० लाई आफ्नो स्थापना दिवसको रुपमा मनाउँदै आएको बताउँदै देशमा आमूल परिवर्तन गर्ने उद्देश्यले पार्टीको स्थापना भएको बताउनुभयो ।

प्रमुख प्रजापतिले जनप्रतिनिधि र कर्मचारीहरुको संयुक्त प्रयासले भक्तपुरलाई उत्कृष्ट नगर बनाउन सम्भव भएको बताउँदै नेमकिपाले न्यायप्रेमी जनताको लागि सँधै ऐक्यबद्धता जनाउँदै आएको बताउनुभयो । कर्मचारी पनि देशको सचेत वर्ग भएको बताउँदै उहाँले राजनीति देश र जनताको पक्षमा हुनुपर्ने बताउनुभयो ।

भक्तपुर नगरपालिकाका उपप्रमुख रजनी जोशीले भक्तपुर नपाले पार्टीको मार्गनिर्देशनअनुसार देश र जनताको सेवा गर्दै भक्तपुरलाई संसारकै उत्कृष्ट गन्तव्यस्थल बनाउने लक्ष्यमा अगाडि बढिरहेको बताउनुभयो ।

कार्यक्रममा नेपाल कर्मचारी समाज भक्तपुरका अध्यक्ष गौतमप्रसाद लासिवाले पार्टी स्थापनाका आधारहरुबारे प्रष्ट पार्दै नेमकिपाले संसदलाई राजनैतिक, वैचारिक र वर्गसंघर्षको थलोको रुपमा उपयोग गर्दै आएको बताउनुभयो ।

कार्यक्रममा भक्तपुर नपाका प्रमुख प्रशासकीय अधिकृत वसन्त भट्टराईले कर्मचारीहरुको काम, कर्तव्यबारे प्रष्ट पार्नुभयो भने समाजका सदस्यद्वय विद्यालक्ष्मी प्रजापति र रामकृष्ण प्रजापतिले पनि बोल्नुभएको थियो ।