मिर्मिरे साकोसका प्रतिनिधिमण्डल टोलीद्वारा भक्तपुर अध्ययन भ्रमण

टोखास्थित मिर्मिरे बचत तथा ऋण सहकारी संस्था लिं महिला तथा बालबालिका उपसमितिका प्रतिनिधिमण्डल टोलीले आज भक्तपुर नगरपालिकाको अध्ययन भ्रमण गरेको छ । टोलीले भक्तपुर नगरपालिकाका प्रमुख सुनिल प्रजापतिसँग भेट गरी भक्तपुरको शैक्षिक संस्था, सहकारी, अस्पताल तथा सम्पदा संरक्षण र पुनःनिर्माणबारे अनुभव हासिल गरे ।

टोलीलाई भक्तपुर नगरपालिकामा स्वागत गर्दै नगर प्रमुख प्रजापतिले ऐतिहासिक नगर भक्तपुर र टोखाबीच सांस्कृतिक, राजनीतिक, आर्थिक र सामाजिक सम्बन्ध कायम रहेको बताउँदै भक्तपुर नपाले यहाँ अवस्थित सहकारीहरुलाई सहकारीमार्फत जनताको सेवा गर्न घच्घच्याइरहेको बताउनुभयो ।

सहकारी संस्थाहरुले सहकारीमा रहेको रकम लेनदेनमा मात्रै सीमित नराखी सदस्यहरूलाई आत्मनिर्भर बनाउन सीपमूलक तालिम दिनुपर्ने र शेयर सदस्यहरुको आर्थिक, शैक्षिक र राजनीतिक स्तर उकास्न आवश्यक भूमिका खेल्नुपर्ने बताउनुभयो ।

ऐतिहासिक र सांस्कृतिक नगरहरुको मौलिकता संरक्षणमा स्थानीय तहहरुले विशेष जोड दिनुपर्ने बताउँदै उहाँले भक्तपुर नपाको ऐन नियमअनुसार मौलिक शैलीमा घर निर्माण गर्ने घरधनीहरुलाई आर्थिक सहयोग गर्दै आइरहेको बताउनुभयो ।

कार्यक्रममा मिर्मिरे साकोसका अध्यक्ष शैलेश डंगोलले भ्रमणको उद्देश्यमाथि प्रष्ट पार्नुभयो भने भक्तपुर नपा वडा नं. ९ का वडाध्यक्ष रविन्द्र ज्याख्वले पनि बोल्नुभएको थियो ।

भक्तपुर नपाको अध्ययन भ्रमणका क्रममा उक्त टोलीले भक्तपुर नपाबाट सञ्चालित ख्वप अस्पताल, ख्वप इ. कलेज, भक्तपुरको सिद्धि गणेश साकोस, भाजु पोखरी, सिद्ध पोखरी, दरबार परिसर, पाँचतल्ले मन्दिर र संग्रहालयहरुमा स्थलगत अध्ययन भ्रमण गरेका थिए ।