अध्यक्ष बिजुक्छेँसँग महिला कबड्डी प्रतियोगिताका खेलाडीहरुको भेट : खेलाडीहरुद्वारा ख्वप कलेज र ख्वप अस्पतालको अवलोकन

नेपाल मजदुर किसान पार्टीका अध्यक्ष नारायणमान बिजुक्छेँ (रोहित)ले खेलकुदलाई अतिरिक्त क्रियाकलापसँग मात्र नजोडी देशको शिक्षा, स्वास्थ्य र संस्कृतिसँग पनि जोड्नुपर्ने आवश्यकता रहेको बताउनुभयो ।

भक्तपुर नगरपालिकाको आयोजनामा भइरहेको अन्तर नगर महिला कबड्डी प्रतियोगिताका सहभागी खेलाडीहरुसँग भेटघाट कार्यक्रममा अध्यक्ष बिजुक्छेँले खेलकुदमा महिलाहरुको प्रस्तुती रोचक भएको बताउँदै महिलाहरुले खेल जीवनलाई निरन्तरता दिनुपर्नेतर्फ जोड दिनुपर्छ भन्नुभयो ।

विकसित देशहरुले खेलकुदको विषयमा विद्यार्थीहरुलाई उच्च शिक्षा हासिल गर्ने व्यवस्था गरेको प्रसंग जोड्दै नेपालमा पनि विस्तारै खेलकुद विषयको अध्ययन अध्यापन र उच्च शिक्षा पाउने बन्दोबस्त हुँदै जाने विश्वास दिलाउनुभयो ।

खेल शारीरिक र मानसिक स्वास्थ्यको लागि आवश्यक विषय भएको बताउँदै उहाँले अनुशासन, समय परिपालना खेलाडीहरुको राम्रो र स्वागतयोग्य पक्ष भएको बताउनुभयो ।

प्रतियोगिता अवधिभर खेलाडीहरुलाई उत्साहित बनाइराख्नुपर्ने भन्दै अध्यक्ष बिजुक्छेँले विद्यार्थी जीवनमा सिकेको ज्ञान र सीप जीवनभर अंगिकार गर्नुपर्ने बताउनुभयो ।

खेलकुद देश विदेशको राजनीति र लडाइँसँग पनि जोडिएको विषय भएको बताउँदै उहाँले अन्तर्राष्ट्रिय जगतमा खेलाडीहरुले आफूलाई देशको राजदूतको रुपमा प्रस्तुत गर्नुपर्छ भन्नुभयो ।

देशको रक्षा गर्न र शत्रुमाथि हमला गर्ने भावनाले खेलकुदलाई अगाडि बढाउनुपर्नेमा जोड दिँदै उहाँले खेलाडीहरुले नागरिक भावनाले प्रतियोगिताहरुमा सहभागी हुनुपर्छ भन्नुभयो ।

कार्यक्रममा भक्तपुर नगरपालिकाका प्रमुख सुनिल प्रजापतिले भक्तपुर क्षेत्रफलको आधारमा सानो नगर भए पनि कला संस्कृतिले समृद्ध र संसारकै जीवित संग्रहालयको रुपमा परिचित नगर भएको बताउनुभयो ।

प्रतियोगितामा सहभागी खेलाडीहरुलाई भक्तपुर नपाबाट सञ्चालित कलेज र अस्पताल अवलोकनको उद्देश्यमाथि प्रष्ट पार्दै उहाँले जनताको अझ बढी सेवा गर्ने उद्देश्यले भक्तपुर नपाले काम गरिरहेको बताउनुभयो ।

मेडिकल कलेज सञ्चालन गर्ने उद्देश्यअनुरुप ख्वप विश्वविद्यालय सम्बन्धनको लागि भक्तपुर नपाले निरन्तर पहल गर्दै आएको बताउँदै उहाँले भक्तपुर नपालाई ज्ञानविज्ञानको केन्द्रको रुपमा विकास गर्ने नगरपालिकाको उद्देश्यले विस्तारै मूर्त रुप लिँदै गइरहेको बताउनुभयो ।

कार्यक्रममा जिल्ला कबड्डी संघ दार्चुलाका प्रशिक्षक श्यामराजा अवस्थीले भक्तपुर नपाको आयोजनामा भएको महिला कबड्डी प्रतियोगिता निकै उत्साहपूर्वक सञ्चालन भइरहेको र प्रतियोगिताका सहभागीहरुलाई नपाले खान र बस्ने व्यवस्थाले खेलाडीहरुलाई धेरै सहजता प्राप्त गरेको बताउनुभयो ।

कार्यक्रममा भक्तपुर नपा वडा नं. ९ का वडाध्यक्ष रबिन्द्र ज्याख्वले विभिन्न नगरपालिकाबाट उपस्थित खेलाडीहरुलाई खेलमार्फत जोडिएको सम्बन्धलाई अझ प्रगाढ बनाउँदै लानुपर्नेमा जोड दिनुभयो ।

भक्तपुर नगरपालिकाको आयोजनामा भएको अन्तर नगर महिला कबड्डी प्रतियोगितामा १५ वटा नगरपालिकाबाट सहभागी खेलाडीहरुले भक्तपुर नगरपालिकाद्वारा सञ्चालित ख्वप कलेज, ख्वप अस्पताल, ख्वप इन्जिनियरिङ कलेजसहित सातवटा संस्थाहरुको स्थलगत अवलोकन गरी त्यहाँबाट प्रवाहित सेवासुविधाहरुबारे अवगत हुनुभयो ।