नगर प्रमुख प्रजापतिद्वारा भक्तपुरका प्रजिअ ढकाल, प्रहरी उपरीक्षक खड्का र राष्ट्रिय अनुसन्धान विभागका कार्कीलाई स्वागत
भक्तपुर । २०८२ कार्तिक २८
भक्तपुर नगरपालिकाले भक्तपुरमा भर्खरै सरुवा भई आउनुभएका भक्तपुरका प्रमुख जिल्ला अधिकारी उमेशकुमार ढकाल, प्रहरी उपरीक्षक सूर्यबहादुर खड्का र राष्ट्रिय अनुसन्धान विभाग उपअनुसन्धान निर्देशक हेमन्त कार्कीको स्वागत तथा परिचयात्मक कार्यक्रम ग¥यो । सोही क्रममा भक्तपुर नगरपालिकाका नगर प्रमुख सुनिल प्रजापतिले उहाँहरुलाई पुष्पगुच्छा, भादगाउँले टोपी र खादा ओढाई नगरपालिकामा स्वागत गर्नुभयो ।
कार्यक्रममा बोल्दै नगर प्रमुख प्रजापतिले सांस्कृतिक सम्पदाहरुको जीवन्त सहरको रुपमा प्रख्यात भक्तपुर नगरपालिकाले भ्रष्टाचारमुक्त र स्वायत्तताको अभ्यास गरिरहेको बताउनुभयो ।
भक्तपुर नपाका विकास निर्माणलगायतका गतिविधिमा नगरपालिकाले जिल्ला प्रशासन कार्यालयसँग सहकार्य गरेर काम गरिरहेको बताउँदै उहाँले विगतका केही प्रमुख जिल्ला अधिकारीहरुबाट भक्तपुरबासीहरुले सम्झनालायक काम भएको स्मरण गर्नुभयो ।व्यवस्थित आवास योजना सञ्चालन गर्ने उद्देश्यअनुरुप भक्तपुर नपाले तुमचो दुगुरे आवास योजना र लिबाली आवास योजना सफलतापूर्वक सम्पन्न गरिसकेको बताउँदै उहाँले देका मिवा आवास योजनामा देखिएका प्राविधिक समस्या सम्बोधनको लागि गुनासोकर्ताहरुसँग छलफल चालु रहेको बताउनुभयो ।
प्रमुख जिल्ला अधिकारी उमेश कुमार ढकालले विभिन्न जिल्लाको आफ्नो कार्य अनुभव सुनाउँदै भक्तपुरको शान्ति सुरक्षा, विकास निर्माणमा नगरपालिकासँग सहकार्य, समन्वय र सहजीकरण गरी अगाडि बढ्ने प्रतिबद्धता जनाउनुभयो । उहाँले सांस्कृतिक नगर भक्तपुरको सुरक्षामा विशेष निगरानी हुने बताउँदै उहाँले भक्तपुरको न्यानो स्वागतको लागि धन्यवादज्ञापन गर्नुभयो ।
भक्तपुरका प्रहरी उपरीक्षक सूर्यबहादुर खड्काले ऐतिहासिक नगरको शान्ति सुरक्षा कायम गरी एकताबद्ध र समन्वयात्मक ढंगबाट अगाडि बढ्ने विश्वास व्यक्त गर्नुभयो । जेनजी आन्दोलनका कारण शान्ति सुरक्षामा चुनौती थपेको बताउँदै उहाँले देशलाई सुदृढ अवस्थामा ल्याउन सबैजना मिलेर अगाडि बढ्नुपर्ने बताउनुभयो ।
भक्तपुर नपाका उपप्रमुख रजनी जोशीले भौगोलिक रुपले देशकै सानो नगरपालिका सांस्कृतिक हिसाबले अत्यन्त महत्वपूर्ण नगर भएको बताउनुभयो ।
भक्तपुर नपा वडा नं. ९ का वडाध्यक्ष रबिन्द्र ज्याख्वले पनि बोल्नुभएको उक्त परिचयात्मक कार्यक्रममा भक्तपुर नगरपालिकाका कार्यपालिका सदस्य, नगरपालिकाका शाखा प्रमुखहरुको उपस्थिति रहेको थियो । सोही क्रममा नगर प्रमुख प्रजापतिले उहाँहरुलाई नगरपालिकाका महत्वपूर्ण प्रकाशनहरु उपहारस्वरुप प्रदान गर्नुभयो ।
