भक्तपुर नगरपालिकाका प्रमुख सुनिल प्रजापतिले बालविकास इङ्गलिस स्कूलको ‘फूलजस्तै भक्तपुर’ बोलको गीत आज एक कार्यक्रमबीच सार्वजनिक गर्नुभयो ।
कार्यक्रमको उद्घाटन गर्दै नगर प्रमुख प्रजापतिले भक्तपुरको विषयमा लेखिएको ‘फूलजस्तै भक्तपुर’ बोलको गीत रचनाको लागि बालविकास स्कूलप्रति आभार व्यक्त गर्दै देशको लागि यस्ता रचनात्मक गीतहरुको अझ खाँचो रहेको बताउनुभयो ।प्रस्तुत गीत भक्तपुरको विषयवस्तुलाई प्रतिकात्मक विषय बनाएर रचना गरिएको र यस गीतमार्फत भक्तपुरलाई संसारसामु चिनाउने सुनौलो अवसर बन्ने विश्वास उहाँले व्यक्त गर्नुभयो ।
शिक्षा, स्वास्थ्य, सम्पदा संरक्षण, सरसफाइ, खेलकुदलगायतका क्षेत्रमा भक्तपुरले हासिल
गरेको प्रगतिमा भक्तपुरका धेरै अग्रजहरुको भूमिका स्मरणीय रहेको बताउँदै प्रमुख प्रजापतिले प्रस्तुत गीतले भक्तपुरलाई ‘हिलोमा फुलेको सुन्दर फूल’ को रुपमा चित्रण गरिएको समय—सान्दर्भिक छ भन्नुभयोे ।
भक्तपुरका जनप्रतिनिधिले भक्तपुरको विकासमा जनताको साथ र सहयोगलाई सँगसँगै अगाडि बढाएर काम गर्दै आएको बताउँदै उहाँले शिक्षा र स्वास्थ्य मात्र नभई भक्तपुरको समग्र क्षेत्र नमुना बनाउन निरन्तर प्रयासरत रहेको बताउनुभयो ।गीतका लेखक एवम् बालविकास इंगलिश स्कूलका प्रिन्सिपल सुरेन्द्रराज गोसाईंले ‘फूलजस्तै भक्तपुर’ गीतले भक्तपुरको ऐतिहासिक एवम् सांस्कृतिक पक्षलाई उजागर गर्ने प्रयास गरिएको बताउँदै भक्तपुरबासी हुनु आफैमा गौरवको विषय हो र देशका अन्य ठाउँलाई पनि भक्तपुरजस्तै बनाउन संकल्प गर्नुपर्ने आवश्यकता औंल्याउनुभयो ।
बाल विकास इंगलिश स्कूलले विद्यार्थीहरुलाई किताबी ज्ञानसँगसँगै नैतिकता, विचार र संघर्षको भावनाबाट पनि अभिप्रेरित गर्ने प्रयत्न गरिरहेको बताउनुभयो ।
कार्यक्रममा बोल्दै कवि एवम् गीतकार हरिहर तिमिल्सिनाले भक्तपुरको बारेमा बनेको ‘फूलजस्तै भक्तपुर’ गीत कर्णप्रिय छन् भन्दै यसको शब्द, संगित, लय र स्वर पनि उत्कृष्ट रहेको बताउनुभयो । गीतबारे टिप्पणी गर्दै गीतकार तिमिल्सिनाले गीतले भक्तपुरलाई फूलको रुपमा व्याख्या गरेको स्पष्ट पार्नुभयो ।बाल विकास स्कूलले अभिभावक र विद्यार्थीहरुको विश्वास जितेर आफ्ना शैक्षिक तथा अतिरिक्त क्रियाकलापहरु अगाडि बढाउनु सकारात्मक भएको बताउँदै उहाँले विद्यालयले विद्यार्थीको चौतर्फी विकासमा जोड दिँदै आएको बताउनुभयो ।
कार्यक्रममा गीतका संगितकार सुमन गैंडाले गीतमा संगित निर्माण गर्दाको आफ्नो अनुभव सुनाउँदै यो गीत भक्तपुर चिनाउने एउटा सुन्दर गीतको रुपमा प्रस्तुत भएको बताउनुभयो ।
‘फूलजस्तै भक्तपुर’ गीतको शब्द बालविकास इङ्गलिस स्कूलका प्रिन्सिपल सुरेन्द्रराज गोसाईंले कोर्नुभएको हो भने गीतमा दिपा कुसी र रियाज बासुकलाको स्वर तथा संगित सुमन गैंडाको रहेको छ ।
