अन्तर्राष्ट्रिय युवा दिवसको अवसरमा भक्तपुर नपा वडा नं. १ दुधपाटीस्थित भाजु पोखरी परिसरमा भक्तपुर नगरपालिकाद्वारा सञ्चालित छिकोङ शारीरिक व्यायामको बृहत प्रदर्शनी आज सम्पन्न भयो ।
नेपाल मजदुर किसान पार्टीका सचिव एवम् संघीय सांसद प्रेम सुवालको प्रमुख आतिथ्यमा सम्पन्न उक्त प्रदर्शनीमा भक्तपुर नगरपालिकाका १० वटै वडाका छिकोङ प्रशिक्षार्थीले एकैसाथ छिकोङ शारीरिक अभ्यास गरेका थिए ।कार्यक्रममा बोल्दै सांसद सुवालले शारीरिक र मानसिक स्वास्थ्यको लागि व्यायाम निकै फाइदाजनक हुने बताउँदै नियमित व्यायाम र स्वस्थ जीवनशैलीले शरीरलाई स्फूर्ति दिनुका साथै रोग प्रतिरोधात्मक क्षमताको पनि विकास गर्ने बताउनुभयो ।
राष्ट्र निर्माणमा सबै उमेर र अवस्थाका व्यक्तिहरुको भूमिका महत्वपूर्ण हुने तर युवाहरुको भूमिका अझ अर्थपूर्ण र क्रियाशील रुपमा हुने हुँदा युवाहरुलाई सशक्त बनाउनुपर्ने बताउनुभयो ।
अरुको देशमा काम गरेर नेपालको विकास नहुने बताउँदै उहाँले युवाहरुलाई स्वदेशमै रोजगारीको अवस्था सिर्जना गर्नुपर्ने बताउनुभयो ।
उहाँले देशलाई आत्मनिर्भर बनाउनतर्फ पनि सरकारले पहलकदमी चाल्नुपर्ने बताउँदै देशको कला संस्कृति जोगाउन युवाहरुलाई अग्रसर पार्नुपर्ने बताउनुभयो ।
त्यस्तै भक्तपुर नगरपालिकाका प्रमुख सुनिल प्रजापतिले मानव जीवनलाई चलायनमान बनाइराख्न शारीरिक व्यायमको भूमिका महत्वपूर्ण रहेको बताउँदै नगरबासीलाई स्वस्थ र तन्दुरुस्त बनाउन खेलकुद क्षेत्रलाई प्राथमिकतामा राखी काम गरिरहेको बताउनुभयो ।युवाहरुलाई सैद्धान्तिक रुपले सशक्त बनाउनुपर्ने बताउँदै उहाँले युवा उमेरले होइन उसको विचार र दृष्टिकोणले उसलाई युवा बनाउने धारणा राख्नुभयो ।
कार्यक्रममा भक्तपुर नपा वडा नं. १ का वडाध्यक्ष श्यामकृष्ण खत्रीले युवा परिवर्तनका संवाहक भएको बताउँदै युवाहरुलाई राजनैतिक र सामाजिक रुपमा सक्रिय बनाउन सके मात्र देश र समाजको विकासमा टेवा पुग्ने बताउनुभयो ।
कार्यक्रममा कार्यपालिका सदस्य रञ्जना त्वाती र सुनिता अवालले पनि शारीरिक अभ्यासको महत्वमाथि प्रकाश पार्नुभएको थियो । बृहत छिकोङ प्रदर्शनीमा करिब ५०० भन्दा बढी प्रशिक्षार्थीहरुको सहभागिता रहेको थियो ।