भक्तपुर नगरपालिकाद्वारा सञ्चालित ख्वप बहुप्राविधिक अध्ययन संस्थानको आयोजनामा भक्तपुर नगरपालिकाका प्रमुख सुनिल प्रजापतिको प्रमुख आतिथ्यमा अन्तर्राष्ट्रिय नर्सिङ दिवस (२०२५ मे १२) कार्यक्रम सम्पन्न भयो ।
कार्यक्रममा प्रमुख प्रजापतिले नर्सहरुको मूल्यांकन उनीहरुले बिरामीहरुप्रति गरिने व्यवहारमा गरिने बताउनुभयो । नर्सिङ पेशामा सिान्त र व्यवहारमा एकरुपता कायम भएन भने सफल हुन नसक्ने बताउँदै उहाँले संकटको समयमा मानिसको मूल्यांकन हुने हुँदा संकटमा खटिनेहरुकै सच्चा मूल्यांकन हुने बताउनुभयो । नर्सहरुलाई जनताको सेवा र हितको लागि सरल, नम्र व्यवहारले काममा लाग्न प्रेरित गर्दै प्रमुख प्रजापतिले नर्सिङ पेशा सामाजिक सेवासँग जोडिएको पेशा हो भन्नुभयो ।
कार्यक्रममा कलेज व्यवस्थापन समितिका सदस्य एवम् भक्तपुर नपा वडा नं. ९ का वडाध्यक्ष रविन्द्र ज्याख्वले दिवस मनाउनुको उद्देश्यमाथि प्रष्ट पार्दै चिकित्सक तथा नर्सहरुले आफ्नो सामाजिक दायित्व र नैतिकताको ख्याल गरी आफ्नो कर्तव्य पूरा गर्नुपर्ने बताउनुभया ।
जस्तोसुकै परिस्थितिमा जनताको सेवा गर्ने भावनाले आफ्नो पेशाको पनि सम्मान हुने बताउँदै उहाँले आफ्नो जिम्मेवारीबोधलाई कहिल्यै पनि बिर्सन नहुने बताउनुभयो ।
सोही क्रममा अतिथि ख्वप अस्पतालका निमित्त मेडिकल डाइरेक्टर डा. मजेशप्रताप मल्लले प्रत्येक वर्ष करिब १ हजार नर्सहरु विदेशिने गरेको बताउँदै युवाहरु बाध्यता भन्दा पनि रहरले भन्दा पनि रोजगारी र देखासिकीको लागि विदेश जाने प्रचलन बढिरहेको बताउनुभयो ।
नर्सिङ पेशामा आबद्धहरुले आफ्नो पेशाप्रति इमानदार र नयाँ प्रविधिहरुको समयअनुसारको प्रयोग गर्न जान्नुपर्ने कुरा ख्वप बहुप्राविधिक अध्ययन संस्थानका प्राचार्य डा. रत्नसुन्दर लासिवाले राख्नुभयो ।
कार्यक्रममा नर्सिङ विभागका विभागीय प्रमुख इश्वरी डंगोलले स्वागत मन्तव्य राख्नुभएको थियो भने नर्सिङ तेस्रो वर्षका उपप्राध्यापक कृष्णशोभा प्रजापतिले नर्सिङ दिवससम्बन्धी प्रस्तुतीकरण दिनुभएको थियो भने नर्सिङ दोस्रो वर्षका विद्यार्थीहरुले नर्सिङ दिवस सम्बन्धी तयार पारेका कविताहरु पनि वाचन गरेका थिए ।