विद्यार्थीहरुमा श्रमलाई माया गर्ने र श्रमिकलाई सम्मान गर्ने बानीको विकास गर्नुपर्ने

भक्तपुर नगरपालिकाका प्रमुख सुनिल प्रजापतिको प्रमुख आतिथ्यमा आधारभूत विद्यालय समिति भक्तपुरको २६ औं वार्षिकोत्सव कार्यक्रम २०८१ को अवसरमा शिक्षक सम्मान, पुरस्कार वितरण तथा सांस्कृतिक कार्यक्रम सम्पन्न भयो ।

कार्यक्रमको उद्घाटन गर्दै उहाँले विद्यालयहरुले गुणस्तरीय शिक्षाको साथसाथै विद्यालय तथा कलेजमा अध्ययनरत विद्यार्थीहरुलाई देशभक्त, समाजसेवी र अनुशासित बनाउनु शिक्षकहरुको कर्तव्य भएको बताउँदै शिक्षा देशको समृद्धिको आधार हो भन्नुभयो ।

श्रमलाई माया गर्ने र श्रमिकलाई सम्मान गर्ने बानीको विकास गर्नुपर्ने बताउँदै उहाँले भक्तपुर नगरपालिकाले नगरभित्रका विद्यालयहरुमा शिक्षकहरुलाई तालिम, विद्यालयको भौतिक निर्माणको लागि आर्थिक सहयोगलाई जोड दिँदै आएको बताउनुभयो ।

१२ कक्षा उत्तीर्ण हुने बित्तिकै विद्यार्थीहरु विदेशिनुमा विद्यार्थीहरु मात्र होइनन्, सरकार मुख्य रुपमा दोषी रहेको बताउँदै उहाँले शिक्षकहरुले नयाँ पुस्तालाई उच्च शिक्षासम्म अध्ययन गरी कुनै न कनै विषयमा विशेषज्ञ बनेर नेपालमै बसेर काम गर्न विद्यार्थीलाई उत्साहित गर्नु आवश्यक रहेको बताउनुभयो ।

विद्यार्थीहरुले जहिल्यै आफू प्रथम हुने उद्देश्यका साथ अध्ययन गर्नुपर्ने बताउँदै उहाँले विद्यार्थीको मेहेनत र परिश्रमले उनीहरुलाई सफलता दिलाउने बताउनुभयो ।

आधारभूत विद्यालय समितिका अध्यक्ष सूर्यबहादुर फोँजुले समितिको वार्षिक प्रतिवेदन प्रस्तुत गर्दै आधारभूत तह बालबालिकाको प्रारम्भिक बाल विकास तह भएको हुँदा यसलाई बलियो बनाउन सके उपलब्धीमूलक हुने बताउनुभयो । समितिले शिक्षक तथा पेशागत संगठनको हकहितमा काम गर्दै आएको र समितिको कार्यलाई अझै प्रभावकारी ढंगले सञ्चालन गर्ने नीति लिइएको उहाँले बताउनुभयो ।

समितिका संस्थापक विश्वराम कवांले आधारभूत विद्यालय समिति बि.सं. २०५५ सालमा प्रावि, निमावि समितिको नाममा स्थापना भएको स्मरण गर्दै सामुदायिक विद्यार्थीको शैक्षिक स्तरमा एकरुपता, परीक्षा र बीदामा एकरुपता र विद्यालयका समस्या एकापसमा समन्वय र सहकार्यमा गर्ने उद्देश्यले समिति स्थापना भएको बताउनुभयो ।

आधारभूत विद्यालय समितिका निवर्तमान अध्यक्ष दिपक माकले आधारभूत विद्यालय समिति विद्यार्थी, शिक्षक र अभिभावकको साझा संस्था भएको बताउँदै समिति स्थापनाको २६ वर्ष समयावधिमा समितिले विभिन्न आरोहअवरोध पार गरिसकेको बताउनुभयो । विद्यार्थीको बौद्धिक, नैतिक, सांस्कृतिक, समाजिक, व्यवहारिक विकासको जिम्मेवारीबोध गर्दै समिति अगाडि बढिरहेको बताउँदै उहाँले पेशागत विषयमा मात्र ध्यान नदिई शिक्षकले विद्यार्थीलाई देशप्रति उत्तरदायी हुन प्रेरित गर्नुपर्छ भन्नुभयो ।

कार्यक्रममा ब्रम्हायणी आविका प्रअ तीर्थलक्ष्मी धन्छा, समितिका सदस्य असलमाया वनमाला र समितिका सदस्य प्रकाश गोसाइले पनि बोल्नुभएको थियो ।

वार्षिकोत्सवको अवसरमा प्रमुख अतिथि प्रजापति र अन्य अतिथिहरुले आ.वि. समितिमा नवनियुक्त प्रअलाई स्वगत, अवकाशप्राप्त शिक्षक सम्मान, समितिका शिक्षकलाई कदरपत्र, अतिरिक्त क्रियाकलापका विजेता विद्यार्थीहरुलाई पुरस्कार वितरण गरेको थियो ।