तारा माध्यमिक विद्यालयको ४५ औं वार्षिकोत्सव कार्यक्रम सम्पन्न

वार्षिकोत्सव समारोहको उद्घाटन गर्दै नगर प्रमुख प्रजापतिले विद्यार्थीहरुले अनुशासनका कायम गर्न सके विद्यार्थीको भविष्य सफल र पूर्ण बन्ने बताउँदै अनुशासनले विद्यार्थीको चारित्रिक गुणको विकास गर्ने बताउनुभयो ।

विद्यार्थीहरुलाई स्वयम्सेवी भावनाको विकास गरी जनताको निम्ति काम गर्न प्रेरित गर्नुपर्ने बताउँदै उहाँले आजको सामाजिक कार्यकर्ता भविष्यका राजनैतिक कार्यकर्ता हुने हुँदा विद्यालय जीवनदेखि सक्षम र योग्य बनाउनतर्फ शिक्षकहरुले जोड दिनुपर्ने बताउनुभयो ।

प्रमुख प्रजापतिले भक्तपुर अहिले शैक्षिक क्षेत्रमा अगाडि बढेको नगरको रुपमा विकास भइरहेको बताउँदै नेमकिपाका अग्रज नेता कार्यकर्ताहरुको दूरदर्शी सोचकै कारण भक्तपुरलाई देशकै उत्कृष्ट शैक्षिक गन्तव्यस्थलको रुपमा विकास गर्न सम्भव भएको हो भन्नुभयो ।

उहाँले विद्यार्थीहरुको जग राम्रो भए उनीहरुको भविष्य निश्चित रुपमा राम्रो हुने विचार राख्दै शिक्षाको गुणस्तर विद्यालयको भौतिक संरचनामा मात्र निर्भर नहुने बताउँदै त्यहाँ कार्यरत शिक्षक, कर्मचारी, व्यवस्थापन समितिहरुको सामूहिक प्रयासले कुनै पनि संस्थालाई दिगो र सफल बनाउने धारणा राख्नुभयो ।

सामुदायिक र निजी शिक्षालाई समान ढंगले विकास गर्ने प्रयास भक्तपुर नपाले गर्दै आएको बताउँदै उहाँले भक्तपुर नपाले ख्वप विश्वविद्यालय सञ्चालन गरी देशभरिका विद्यार्थीलाई सस्तो र गुणस्तरीय उच्च शिक्षा प्रदान गर्ने उद्देश्य लिएको बताउनुभयो ।

कार्यक्रमका सभापति भक्तपुर नपा वडा नं. ४ का वडाध्यक्ष उपेन्द्र सुवालले भक्तपुरको शिक्षा विकासमा तारा माध्यमिक विद्यालयको भूमिकाबारे प्रष्ट पार्दै विद्यालयले आजको अवस्थासम्म आइपुग्नुमा यहाँका अग्रज, समाजसेवी, शिक्षासेवीहरुको महत्वपूर्ण देन रहेको बताउनुभयो ।

तारा माध्यमिक विद्यालय व्यवस्थापन समितिका सदस्य उद्धव सुजखूले विद्यालयको विकासमा यहाँका किसान, मजदुर, शिक्षासेवी, जनप्रतिनिधि, शिक्षकहरुको भूमिकाबारे प्रष्ट पार्दै नेमकिपाको मार्गनिर्देशनमा विद्यालयको विकास भएको बताउनुभयो ।

नेक्राशिसंघ भक्तपुर नगर समितिका अध्यक्ष विष्णुप्रसाद दुमरुले विद्यार्थीलाई देशभक्तिपूर्ण भावना जगाउने काममा शिक्षकहरु क्रियाशील हुनुपर्ने बताउँदै विद्यार्थीमा आत्मनिर्भरताको भावनाको विकास गर्नुपर्ने बताउनुभयो ।

तारा माविका संस्थापक अध्यक्ष पुष्पलाल सुजखूले भक्तपुरको शैक्षिक विकासमा तारा माविले उदाहरणीय कार्य गर्दै आएको बताउँदै पाठ्यक्रम कार्यान्वयन, विकास र व्यवस्थापनमा पनि तारा माविको भूमिका उल्लेखनीय रहेको बताउनुभयो ।

संयुक्त परीक्षा समितिका अध्यक्ष रोशनराज तुईतुईले धेरै समस्या र चुनौतीबीच पनि तारा माविले विद्यार्थीहरुलाई गुणस्तरीय शिक्षा प्रदान गर्दै आएको बताउँदै २०३३ सालमा स्थापना भएको तारा मावि संयुक्त परीक्षा समितिको पनि सक्रिय विद्यालयको रुपमा रहेको बताउनुभयो ।

विद्यालयका प्रधानाध्यापक प्रेमलक्ष्मी त्वायनाले विद्यालयको वार्षिक प्रतिवेदन प्रस्तुत गर्नुभएको थियो भने कार्यक्रममा अनिवार्य अवकाशप्राप्त शिक्षक कृष्णगोविन्द दुवाल, शिक्षक हरिकृष्ण प्रजापति, लेखा सहायक रविन्द्र सुजखू, शिक्षक विनोद कासुला र शिक्षक हरिप्रसाद बास्तोलाले पनि बोल्नुभएको थियो ।

कार्यक्रमका प्रमुख अतिथि प्रजापतिले वार्षिक परीक्षामा उत्कृष्ट विद्यार्थीहरुलाई पुरस्कार वितरण गर्नुभएको थियो भने विशेष अतिथि तथा अन्य अतिथिहरुले विद्यालयको आयोजनामा भएका अतिरिक्त क्रियाकलापका विजेताहरुलाई प्रमाणपत्र वितरण गर्नुभएको थियो ।

सोही क्रममा नगर प्रमुख प्रजापतिले विद्यालयबाट अनिवार्य अवकाश प्राप्त शिक्षक कृष्णगोविन्द दुवाललाई दोसल्ला ओढाई बिदाइ गर्नुभयो ।

कार्यक्रममा विद्यार्थीहरुले सांस्कृतिक प्रस्तुतीहरु पनि प्रदर्शन गरेका थिए ।