Explore news and happenings at Bhaktapur

चौतारा साँगाचोकगढी नगरपालिकाका प्रतिनिधिमण्डल भक्तपुर अध्ययन भ्रमणमा

भक्तपुर । २०८१ फागुन २, शुक्रबार

0
भक्तपुर नगरपालिका र सिन्धुपाल्चोकको साँगाचोकगढी नगरपालिकाबीच आफूले गरेका असल अभ्यास तथा अनुभवहरु आदानप्रदान गरेका छन् ।
चौतारा साँगाचोकगढी नगरपालिकाका उपप्रमुख सीता थापासहित शुक्रबार अवलोकन भ्रमणका क्रममा भक्तपुर पुगेको प्रतिनिधिमण्डललाई भक्तपुर नगरपालिकाका प्रमुख सुनिल प्रजापतिले खादा ओढाई भक्तपुर नगरपालिकामा स्वागत गर्नुभयो ।
स्वागतका क्रममा नगर प्रमुख प्रजापतिले दुवै नगरपालिकाले गरेका राम्रा कामहरु एक अर्काका लागि सिकाई हुन सक्न्ने बताउँदै नगरपालिकाले शिक्षा, स्वास्थ्य, सम्पदा पुनःनिर्माण, विकास निर्माण, खेलकुद विकास आदि विषय समेटेर प्रस्तुतीकरण देखाउनुभएको थियो ।
संविधान र कानुनले प्रदान गरेको अधिकार क्षेत्रभित्र रही भक्तपुर नगरपालिकाले नीति निर्माण गरी त्यसको कार्यान्वयन गर्ने र व्यापक जनताको हितमा शिक्षा र स्वास्थ्य जस्ता विषयहरु न्यून शुल्कमा सेवा प्रदान गर्दै समाजवादउन्मुख काम गर्दै आएको उहाँले बताउनुभयो ।
संघ र प्रदेशले स्थानीय तहलाई वित्तीय समानीकरण अनुदान बढाउनुपर्नेमा त्यसको विपरीत कार्य भइरहेको बताउँदै स्थानीय तहलाई जनताको आवश्यकता र प्राथमिकता थाहा हुने हुँदा योजना छनोटको अधिकार स्थानीय तहलाई नै दिइनुपर्ने उहाँले प्रष्ट पार्नुभयो ।
भक्तपुर नपाले सस्तो र गुणस्तरीय शिक्षा प्रदान गर्ने, २१ औं शताब्दीको लागि योग्य, देशभक्त नागरिक तयार गर्ने र समाजलाई बुद्धिजिवीकरण गर्ने उद्देश्यले सातवटा शैक्षिक संस्थाहरु सञ्चालन गरिरहेको बताउँदै आत्मनिर्भरतालाई जोड दिएर अगाडि बढ्नु नै विकासको लागि उचित विकल्प भएको बताउनुभयो ।
साँगाचोकगढी नगरपालिकाका उपप्रमुख सीता थापाले भक्तपुर नगरपालिकाको असल अभ्यासहरु साँगाचोकगढीले अनुशरण गर्ने बताउँदै भक्तपुरले गरेका राम्रा कुराहरुका बारेमा सिक्न र अनुशरण गर्न भक्तपुर अवलोकन भ्रमणमा आएको बताउनुभयो ।
नगर प्रमुख प्रजापतिद्वारा प्रस्तुत गरिएको प्रस्तुतीकरणबाट भक्तपुर नगरलाई नजिकबाट जान्ने र बुझ्ने अवसर मिलेको बताउँदै उहाँले नेमकिपाका अध्यक्ष नारायणमान बिजुक्छेँ (रोहित) देशकै रोडमोडल भएको र उहाँको मार्गनिर्देशनमा भक्तपुरले गरेको विकास अनुकरणीय र उदाहरणीय भएको बताउनुभयो ।
कार्यक्रममा भक्तपुर नपाका प्रमुख प्रशासकीय अधिकृत वसन्त भट्टराई, भनपा वडा नं. १ का वडाध्यक्ष श्यामकृष्ण खत्री, २ का वडाध्यक्ष हरिप्रसाद बासुकला, चौतारा साँगाचोकगढी नपा वडा नं. १३ का वडाध्यक्ष रामप्रसाद गौतम, वडा नं. ४ का वडाध्यक्ष कुमार शर्मा, कार्यपालिका सदस्य सीता पौडेल र साँगाचोकगढी नपा नगर बाल सञ्जालका प्रतिनिधिहरुको उपस्थिति रहेको थियो ।
प्रमुख प्रजापतिले उपप्रमुख थापालाई मयुरको झ्याल र नपाका प्रकाशनहरु तथा सहभागी सबैलाई नपाका प्रकाशनहरु उपहार स्वरुप प्रदान गर्नुभयो ।
नगरपालिकामा भएको भेटघाट कार्यक्रमपश्चात चोतारा साँगाचोकगढी नपाका प्रतिनिधिमण्डलले नपाले सञ्चालन गरेको शिशुस्याहार केन्द्र, जनज्योति पुस्तकालय, शैक्षिक संस्था र अस्पतालमा समेत स्थलगत अवलोकन गरिने कार्यक्रम रहेको छ ।

Leave A Reply

Your email address will not be published.